Փաստ ինֆո

Տեսչական մարմինների աշխատանքների համակարգման գրասենյակի նախկին ղեկավար Հայկ Այվազյանը կարծում է, որ վերջին շրջանում կառավարության մի շարք աշխատակիցների ազատման պատճառը կարող է լինել ՀՀ վարչապետի աշխատակազմի ղեկավար Էդուարդ Աղաջանյանի աշխատանքի թերացումը:

Նա «Փաստինֆո»-ի թղթակցի հետ զրույցում նշեց, որ եթե մարդը իր որակներով, հմտություններով և այլնով իր տեղում չէ, բանականաբար, դա արտահայտվում է տարբեր մարդկանց վրա, տարբեր ուղղություններով:

«Եթե մեկ պետական մարմնում 4 թե 5 առանցքային պաշտոնյա պաշտոնանկ է արվում, և հիմքում դրվում է աշխատանքում թերանալը, դա ինչ-որ կերպ պետք է իրենց ղեկավարի վրա անդրադառնար»,-ասաց Այվազյանը:

Նա ասաց՝ գոնե իր ազատման դեպքում վստահ է, որ ՀՀ վարչապետ Նիկոլ Փաշինյանը լիարժեք ինֆորմացիա չի ստացել:

Օրերս Այվազյանը ֆեյսբուքում գրառում էր կատարել և անդրադարձել իր աշխատանքից հեռացման պատճառներին` նշելով, որ աշխատակազմի ղեկավարի կողմից իջեցված որոշ հանձնարարականներ համարում է պաշտոնեական դիրքի չարաշահում: «Փաստինֆո»-ն փորձեց ճշտել արդյոք գրառմանն արձագանքել են,  մասնավորապես Աղաջանյանը:

«Աղաջանյանն ո՞վ է, որ…հնարավոր է ինքը չի էլ հասկացել՝ ինչի մասին է խոսքը»,-ասաց Այվազյանը:

Ինչ վերաբերում է գրառման մեջ արված այն դիտարկմանը` «ասելիք շատ կա, բայց այս պահին սահմանափակվում է այսքանով»` գրասենյակի նախկին ղեկավարը նշեց, որ  ‹‹դեռ պահը չի եկել: Պահը կգա կիմանաք ինչի մասին եմ խոսելու»:

Իսկ թե երբ է գալու պահը հարցին պատասխանելով ասաց, որ դա կախված է իրենից, իր զգալուց և տրամադրությունից:

Այվազյանը «Փաստինֆո»-ին տեղեկացրեց նաև, որ փորձել է և շարունակում է փորձել կապ հաստատել վարչապետի հետ, սակայն չի հաջողվում:

«Պաշտոնականով փորձեցի չստացվեց: Փախվարչապետին եմ ասել, փոխվարչապետը չկարողացավ ասել Փաշինյանին, գցեց օգնակնի վրա, օգնականն էլ չասեց»,-նշեց գրասենյակի նախկին ղեկավարը:

Այվազյանը լուրջ պրոբլեմ որակեց այն, որ վարչապետի անմիջական ենթական չի կարողանում խոսել վարչապետի հետ:

Հարցին՝ արդյոք միտում տեսնում է, որ իր հանդիպումը Փաշինյանի հետ ոչ մի կերպ չի հաջողվում, գրասենյակի նախկին ղեկավարն ասաց, որ «ամեն ինչ էլ տեսնում է»:

Հեղինակ` Սոնա Գեւորգյան