Փաստ ինֆո

«Ես եւ Ադրբեջանի նախագահն այս շրջանում փոխադարձ տեղեկություններ եւ մտահոգություններ ենք փոխանակում, որոնք նաեւ փոխադարձ մեղադրանքներ են պարունակում»,- այսօրվա ասուլիս ժամանակ  հայտարարել է ՀՀ վարչապետ Նիկոլ Փաշինյանը՝ պատասխանելով Պաշտպանության նախարարության «Զինուժ» մեդիայի լրագրողի այն հարցին, թե ինչով կարող է պայմանավորված լինել արցախաադրբեջանական սահմանին դիպուկահարների ակտիվացումը. «Դուք գիտեք, որ հաղորդակցության ուղիներ են հաստատվել իմ եւ Ադրբեջանի նախագահի միջեւ, եւ ես այս շրջանում փորձում եմ հասկանալ, թե ինչ է կատարվում, բայց իմ գնահատմամբ՝ ընդհանուր առմամբ կայունությունը եւ հանդարտությունը սահմանին պահմանվում են, եւ ակտիվացում նկատվում է վերջին երկու ամսվա ընթացքում որոշ օրերին»։

Ինչ վերաբերում է լրագրողի այն հարցին, թե արդյոք վարչապետը կիսում է որոշ փորձագետների այն կարծիքը, թե Ադրբեջանը ինտենսիվ կերպով նախապատրաստվում է պատերազմի,  Նիկոլ Փաշինյանն ասել է, որ Ադրբեջանը վերջին քսանհինգ տարում ինտենսիվորեն պատրաստվում է պատերազմի, եւ եթե մենք ամենօրյա ռեժիմով կրակոցներ ենք տեսնում, նշանակում է՝ կիսապատերազմական իրավիճակի մեջ ենք. «Այդ առումով ոչինչ չի փոխվել, եւ քանի դեռ հարցը կարգավորված չէ, չի փոխվելու, սա մենք՝ թե ես, թե ՊՆ-ն, ընդունում ենք որպես ի գիտություն, բայց նաեւ կարծում ենք, որ Վիեննայի հայտարարությանը բոլոր կողմերը պետք է հավատարիմ մնան, իսկ այնտեղ մենք ասել ենք, որ հրադադարի ռեժիմը պետք է պահպանվի եւ ամրապնդվի»։

Նիկոլ Փաշինյանի խոսքով՝ պետք է հասկանալ՝ արդյոք կողմերից որեւէ մեկը տվել է հրահանգ ապակայունացնելու իրավիճակը. «Եթե ոչ, ապա ինչո՞ւ է ապակայունանում իրավիճակը, չնայած ես դա ապակայունացում չէի անվանի»,-ասել է նա։

Վարչապետը շուտափույթ ապաքինում է մաղթել օրերս վիրավորված զինծառայողներին։

Աղբյուր` Փաստինֆո