Փաստ ինֆո

ՀՀ փոխվարչապետ, Վերակառուցման և զարգացման եվրոպական բանկում Հայաստանի կառավարիչ Տիգրան Ավինյանի գլխավորած պատվիրակությունը մայիսի 6-ից 10-ը  Սարաևոյում մասնակցում է ՎԶԵԲ տարեկան ժողովի աշխատանքներին: 

Ինչպես հայտնեցին ՀՀ փոխվարչապետ Տիգրան Ավինյանի գրասենյակից, մայիսի 7-ին այցի շրջանակներում փոխվարչապետը մի շարք հանդիպումներ է ունեցել ՎԶԵԲ բարձրաստիճան ղեկավարության և ֆինանսական հատվածի ներկայացուցիչների հետ:

Աշխատանքային այցի առաջին օրը կայացել է փոխնախագահ Պիեր Հեյլբրոննի հետ փոխվարչապետի հանդիպումը, որի ընթացքում զրուցակիցները մտքեր են փոխանակել ՎԶԵԲ-ի հետ Հայաստանի համագործակցության ներկա փաթեթի, գործընկերության առաջիկա ուղղությունների և այդ համատեքստում երկրի առաջնահերթությունների ու հնարավոր ծրագրերի շուրջ: Զրույց է ծավալվել մասնավոր ու ֆինանսական հատվածների զարգացման վերաբերյալ ու շեշտադրվել դրանցում ՎԶԵԲ ներգրավվածության կարևորությունը: Անդրադարձ է կատարվել էներգետիկ ենթակառուցվածքների ու էներգարդյունավետության, ճանապարհաշինության, ջրային, “խելացի” գյուղատնտեսության ոլորտներում պետության նախաձեռնություններին, հանրային բարեփոխումների ծավալուն օրակարգին: Քննարկվել է պետություն-մասնավոր հատված երկխոսության արդյունավետ ինստիտուցիոնալ հարթակներ ձևավորելու հարցը, ինչպես նաև “Աշխատիր Հայաստան” և պետական ընկերությունների մասնավորեցման ու կապիտալի շուկայի զարգացման ուղղությամբ Կառավարության մեկնարկած ծրագրերը: Զրուցակիցները պայմանավորվել են նշված ուղղություններով համագործակցության շուրջ առաջիկայում շարունակել առարկայական երկխոսությունը:

Այնուհետև հաջորդել է ՎԶԵԲ-ում Հոլանդական խմբի ղեկավար, Հայաստանի գծով գործադիր տնօրեն Ֆրանս Վիքերսի հետ հանդիպումը՝ Նիդերլանդների ֆինանսների ու արտաքին գործերի նախարարությունների ներկայացուցիչների ուղեկցությամբ: Քննարկվել են ՎԶԵԲ-ի հետ Հայաստանի գործընկերության նոր ռազմավարության մշակման ուղղությամբ տարվող աշխատանքները, ինչպես նաև այն հնարավոր ոլորտներն ու ծրագրային ուղղությունները, որոնք կկազմեն կառույցի հետ առաջիկա երկխոսության օրակարգը: Զրուցակիցներն առանձնակի անդրադարձել են տնտեսական ենթակառցվածքների, գյուղատնտեսության արդիականացման, էներգարդյունավետության ոլորտներում երկրի կողմից կարևորվող ասպեկտներին ու իրականացվող ծրագրերին, ջրային ոլորտի զարգացման հայեցակարգային հարցերին: 

Տիգրան Ավինյանը նաև հանդիպել է ՎԶԵԲ գլխավոր տնտեսագետ Սերգեյ Գուրիևին: Զրուցակիցները մտքեր են փոխանակել Հայաստանի ու տարածաշրջանի տնտեսական զարգացման վիճակի, առաջիկա սպասումների ու հեռանկարային միտումների շուրջ: Անդրադարձ է կատարվել Հայաստանի տնտեսական բարեփոխումների օրակարգին և կառավարության կողմից հռչակված գերակայություններին, որոնց հաջող իրագործումը պետք է կայուն հիմք ապահովի երկրի զարգացման որակական տեղաշարժերի համար: Քննարկման առանցքում են եղել ենթակառուցվածքային ծրագրերը, երկրի կողմից իրականացվող հարկային բարեփոխումների օրակարգը, ինչպես նաև` աշխատաշուկայի, կրթական ու առողջպահական ոլորտներում հիմնարար բարեփոխումների օրակարգ ձևավորելու ուղղությամբ կառավարության ջանքերն ու տեսլականը: Զրուցակիցները պատրաստակամություն են հայտնել փոխադարձ հետաքրքրվածություն ներկայացնող բնագավառներում երկխոսությունը շարունակել և խորացնել:

Փոխվարչապետը նաև հանդիպում է ունեցել JP Morgan ընկերության կառավարիչ տնօրեն Ստեֆան Վեյլերի հետ: Հանդիպման հիմնական թեման արժեթղթերի միջազգային շուկայի ընթացիկ միտումներն էին, եվրապարտատոմսերի միջազգային շուկայում Հայաստանի բարենպաստ դիրքավորման հնարավորությունները և այդ ուղղությամբ ջանքերն ակտիվացնելու հետ կապված առաջիկա անելիքները, մասնավորապես` տեղական արժույթով եվրապարտատոմսեր թողարկելու հնարավորությունը:

Այցի առաջին օրը եզրափակվել է ՎԶԵԲ նախագահի կողմից ՎԶԵԲ կառավարիչների և բարձրաստիճան պատվիրակների պատվին տրված արարողությամբ, որի ընթացքում կարևոր շփումներ են կայացել ՎԶԵԲ նախագահի, ինչպես նաև` տարբեր երկրների ներկայացուցիչների հետ: 

Պատվիրակության անդամները նաև առանձին հանդիպումներ են ունեցել մասնավոր ու խորհրդատվական ընկերությունների ներկայացուցիչների հետ, ծանոթացել պետական կառավարման տարբեր ոլորտներում վերջիններիս կողմից իրականացվող ծրագրերին, այլ երկրներում տարբեր բարեփոխումներին ցուցաբերված աջակցության արդյունքում ունեցած դրական փորձին: 

Աղբյուր` Փաստինֆո