Փաստ ինֆո

Կենդանիների սպանություն, դաժան վերաբերմունքի, խոշտանգման համար ծիծաղելի տուգանքներ են նախատեսվում, անհրաժեշտ է քրեականացնել, տուգանքները բազմապատկել: Այսօր Ազգային ժողովում հայտարարեց ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ, ‹‹Բարգավաճ Հայաստան›› խմբակցության պատգամավոր Նաիրա Զոհրաբյանը՝ պաշտպանելով «Կենդանական աշխարհի մասին›› ՀՀ օրենքում լրացումներ կատարելու մասին Տիգրան Ուրիխանյանի ներկայացրած օրինագիծը։

Նա նշեց, որ կենդանիների նկատմամբ դաժան վերաբերմունքը քրեականացնելու հարցը ինքը քննարկել է նաեւ կենդանիների պաշտպանության բազմաթիվ հասարակական կազմակերպությունների հետ և ինքը եւս մշակել է օրինագիծ, որին կառավարությունը դրական գնահատական էր տվել, անգամ նշվել էր, որ ազատազրկումը պետք է ավելի խիստ լինի՝ մինչև 3 տարի:

Զոհրաբյանի խոսքով, նախագիծը դրական մոտիվացիայով եկել է ԱԺ, իսկ երեկ իրենք կառավարությունից լրացուցիչ կից գրություն են ստացել, որտեղ գրված է՝ նախագծի մոտեցումը լավն է, բայց իրենք քննարկում են, ուստի ապա առաջարկում են ձեռնպահ մնալ ներկայաված օրենքի նախագծի ընդունումից:

‹‹Եթե շունն ու կատուն էլ եք քաղաքականացնում և ուզում եք՝ անպայաման դա ներկայացված լինի ‹‹Իմ քայլը››-ի կողմից, քավլիցի, խնդիր չկա, արեք դուք, ես նախագիծը չեմ հանելու շրջանառությունից, իսկ դուք դրեք մերժեք իմ նախագիծը››,-ասաց ԲՀԿ պատգամավորը:

Նա նշեց, որ եթե ‹‹Իմ քայլը››-ի պատգամավորները գտնում են, որ սա այն հարցն է, որ անպայման իրենք պետք է անեն, ապա հնարավորինս պետք է արագացնեն, քանի որ վիճակագրությունը բավականին ծանր է:

‹‹Ես զարմանում եմ, կառավարությունում տալիս են դրական եզրակացություն, հետո նստում մտածում են ‹‹Բայց լավ ինչի՞ իրենք անեն, այս լավ բանը մենք կարող ենք անել: Դուք արեք այդ լավ բանը, ես իմ նախագիծը շրջանառությունից չեմ հանելու››,-ասաց Նաիրա Զահրաբյանը:

Հիշեցնենք, որ Տիգրան Ուրիխանյանի օրինագիծը չի ընդգրկվել ԱԺ նիստերի օրակարգ։ Այլ նախագիծ ունի նաեւ Նաիրա Զոհրաբյանը։

Աղբյուր` Փաստինֆո