Փաստ ինֆո

Տարիների ընթացքում տրամադրվել են մեծ գումարներ՝ թափառող շների հարցը լուծելու համար: Միայն Երևան քաղաքի համար տրամադրվել է շուրջ 100 մլն դրամի հասնող գումար, բայց ստերջացում, տեղահանում, համապատասխան վայրերի կառուցելու և այլ հումանիտար քայլեր ձեռնարկվելու փոխարեն, դրանք ուղղակի գնդակահարվել են:

Այսօր Ազգային ժողովում ելույթի ժամանակ ասաց ‹‹Բարգավաճ Հայաստան›› խմբակցության պատգամավոր Տիգրան Ուրիխանյանը՝անդրադառնալով ‹‹Կենդանական աշխարհի մասին›› ՀՀ օրենքում լրացումներ կատարելու մասին իր առաջարկած նախագծին:

Նա նշեց, որ գնդակահարելուց հետո կենդանիների դիակները, լեշերը հաճախ նետվում են բնակավայրեր, երեխաների խաղալու վայրեր, աղբամաններ և այլն:

‹‹Վերջին շրջանում մենք ականատես ենք եղել անտանելի իրավիճակին, երբ կոկորդից գնդակահարված, բայց չսատկած կենդանին հասարակական վայրում մայթին նստած արնահոսում էր, և մարդիկ նկարահանում էին, այդ թվում նաև անչափահաս երեխաները››,-ասաց պատգամավորը:

Նրա խոսքով, եղել են դեպքեր, երբ անխղճությամբ գնդակահարել են շան թաթերից՝ չթողնելով, որ սատկի ու նայել են, թե ինչպես է տառապում:

Ուրիխանյանը նշեց, որ հենց այս դեպքերն են եղել նախագծի առաջարկման պատճառը, որպեսզի արգելվի զենքի միջոցով կենդանիների ոչնչացման հնարավորությունը:

Օրինագծը չընդգրկվեց ԱԺ նիստերի օրակարգ։

Հեղինակ` Սոնա Գեւորգյան