Փաստ ինֆո

Երկրապահ կամավորականների միության վարչության նախագահ Սասուն Միքայելյանը շնորհավորական ուղերձ է հղել Երկրապահի օրվա և մայիսյան տոների կապակցությամբ՝ նշելով, որ երկրապահները հանուն Հայաստանի անառիկության, հանուն ազատագրված Արցախի դարձյալ պատրաստ են անհրաժեշտության դեպքում խաղաղություն պարտադրել թշնամիներին:

Ինչպես տեղեկացրին Երկրապահ կամավորականների միությունից, ուղերձում նշված է.

«Հարգելի´ հայրենակիցներ, մարտական ընկերներ, երկրապահներ:

Շնորհավորում եմ բոլորիս Երկրապահի օրվա և մայիսյան տոների կապակցությամբ: Մեր ժողովրդի համար մայիսը միշտ հաղթանակների ամիս է եղել: Թե´ Ավարայրի ճակատամարտը, թե´ 1918-ի Սարդարապատի, Բաշ Ապարանի և Ղարաքիլիսայի մայիսյան հերոսամարտերը  փառքով են գրվել մեր պատմության մեջ:  Անչափ կարևորում ենք  74 տարի առաջ մեր պապերի`ֆաշիստական Գերմանիայի դեմ  Հայրենական Մեծ պատերազմում տարած հաղթանակը, կրկնակի հպարտության առիթ է 1992-ին Շուշիի հաղթական ազատագրումն  ու  Արցախի Պաշտպանության Բանակի ստեղծումը: Խորհրդանշական է,  որ մայիսյան հաղթանակները հենց Երկրապահի օրով են սկսվում մեր տոնացույցում:

Այս տոնը մենք` երկրապահներս, վաստակել ենք մեր անձնուրաց պայքարով, հայրենիքի հանդեպ նվիրումով, մեր արյան ու մեր զինակից ընկերների թանկ կյանքի գնով: Մայիսի 8-ին, փառաբանելով մեր նահատակված ընկերներին, մեզնից յուրաքանչյուրը հպարտությամբ է հիշում իր անցած պատերազմական ուղին: Այս պատերազմում մեր հաղթանակի գրավականը մեր համազգային համախմբվածությունն էր:

Սպարապետ Վազգեն Սարգսյանն ասում էր . «Ամեն ժողովուրդ իր պատմության մեջ իր կռիվը գոնե մեկ անգամ մինչև վերջ պետք է տա»: Մենք մեր սուրբ պարտքը փառքով կատարեցինք:  Այսօր էլ հպարտությամբ ամրագրելով ազատամարտում մեր տարած փառավոր հաղթանակը` վստահորեն կարող ենք ասել, որ այո´, արդեն մենք ապրում ենք այն երկրում, որի մասին երազել է ամեն մի հայ իր կռիվը տալիս, և հանուն մեր երկրի անառիկության, հանուն ազատագրված Արցախի դարձյալ պատրաստ ենք անհրաժեշտության դեպքում խաղաղություն պարտադրելու մեր թշնամիներին:

Մայիսի 8-ը նաև ստեղծարար աշխատանքով իր հայրենին շենացնող հայի տոնն է, սահմանում կանգնած հայ  զինվորի տոնն է, Եռաբլուրում հանգչող մեր ընկերների  տոնն է, և, վերջապես,  Սպարապետի և մե′ր տոնն է:

Փա´ռք Երկրապահին ու ԵԿՄ հիմնադիր հավերժ նախագահ Սպարապետ Վազգեն Սարգսյանին:
Մեծ խոնարհում մեր բոլոր նահատակ ընկերներին:

Փա´ռք  ազատամարտիկներին:

Փա´ռք  հայ ժողովրդին»:

Աղբյուր` Փաստինֆո