Փաստ ինֆո

«Փասատթղթերի կեղծման դեպքի առթիվ վեցերորդ վարչության հարուցած քրեական գործը մենք համարում ենք ապօրինի. դա իրականությանը չի համապատասխանում»,- «Փաստինֆո»-ի հաղորդմամբ` այսօր դատարանի դահլիճում հայտարարեց «Հայբիզնեսբանկ»-ի սեփականատեր Վիտալի Գրիգորյանցի ներկայացուցիչ, փաստաբան Վարդգես Գեւորգյանը:

Արդեն հայտնել ենք, որ ՀՀ քաղաքացի Ստեփան Մարտիրոսյանը մեղադրվում է Վիտալի Գրիգորյանցից առանձնապես խոշոր չափի՝ 20.203.565.650 ՀՀ դրամին համարժեք 49.045.000 ԱՄՆ դոլարի հափշտակություն կատարելու մեջ: Նրան մեղադրանք է առաջադրվել ՀՀ ՔՕ-ի 178-րդ հոդվածի 3-րդ մասի 1-ին կետով: Նրա նկատմամբ Երեւանի ընդհանուր իրավասության դատարանը որպես խափանման միջոց էր ընտրել կալանավորումը, ինչի դեմ  Մարտիրոսյանի պաշտպանական կողմը բողոք էր  ներկայացրել Վերաքննիչ քրեական դատարան:

Նիստի սկզբում գործով տուժող Գրիգորյանցի ներկայացուցիչ Վարդգես Գեւորգյանը պնդեց իր այն կարծիքը, որ մեղադրյայը պետք է մնա կալանքի տակ: Ըստ նրա` վեցերորդ վարչության հարուցած քրեական գործը ապօրինի է. «ՌԴ քաղաքացի Ռոշենը երեք անգամ դիմում է ուղարկել Հայաստան` մակագրված Գլխավոր դատախազին եւ ՀՔԾ պետին, ուստի դիմումների կեղծումը իրականությանը չի համապատասխանում, մակագրություններ կան, որ դրանք ուղարկվել են Ռուսաստանից, եւ նաեւ` գրութուն` Գլխավոր դատախազությունից, որ իրենք ստացել են դիմումները»,-ասում է Գեւորգյանն ու հավելում. «Վեցերորդ վարչությունը այդ ե՞րբ հասցրեց փորձաքննություն անել, պարզել դրանց կեղծ լինելը»:

Մյուս կարեւոր փաստարկը, ըստ տուժողի ներկայացուցչի, այն է, որ մեղադրյալն իր առողջական վիճակի մասին տեղեկությունները խեղաթյուրում է: Մասնավորապես` առաջին ատյանի դատարանում մարտի 18-ին նախատեսված նիստը տեղի չունեցավ, քանի որ ներկայացվեց գրություն, թե մեղադրյալը չի կարող ներկայանալ առողջական խնդիրների պատճառով, ինչը իրենք կասկածի տակ առան. «Նշվեց, որ նա գտնվում է Էրեբունի բժշկական կենտրոնում, մենք էլ ճշտեցինք նրա առողջական վիճակը եւ պարզեցինք, որ մեկնաբանությունը, թե վիճակը ծանր, նախակաթվածային է, իրականությանը չի համապատասխանում»,- ասաց տուժողի ներկայացուցիչը` ավելացնելով. «Ես զրուցել եմ թե բաժնի վարիչի, թե բուժող բժշկի հետ. ստացիոնալ բուժման հիմքեր չեն եղել, եթե լինեին, ապա նրանք դատարան կներկայացնեին այդպիսի տեղեկանք»:

Գեւորգյանի խոսքով` նմանատիպ խաբեության զոհ է դարձել նաեւ Ռուսաստանի քաղաքացի Դոյխինը, ումից, ըստ նրա,  Մարտիրոսյանը հափշտակել է շուրջ 8 միլիոն ԱՄՆ դոլար. «Ի դեպ, մեզ համար անհասականլի է, թե ինչու այդ դրվագով Ստեփան Մարտիրոսյանին այդպես էլ մեղադրանք չառաջադրվեց»,-ասաց նա:

Բանկի սեփականատիրոջ` Վիտալի Գրիգորյանցի մյուս ներկայացուցիչ Մնացական Մարուքյանի խոսքով` մեղադրայլի պաշտպանը ամեն կերպ ճնշում է գործադրում իրենց վրա` թե մամուլով, թե առանձին հրապարակումներով տարածելով կեղծ տեղեկություններ. «Կալանավորումից ազատվելով` Մարտիրոսյանը սպառնալիքներ է հնչեցրել Տիմոշենկոյի եւ նրա ընտանիքի հասցեին»,-ասաց նա. «Երբ ես կապ հաստատեցի «Ալիաս» ընկերության հետ, գնացի ՌԴ, հանդիպեցի Տիմոշենկոյին, նրա ներկայացուցչի եւ իմ միջեւ կնքվեց համատեղ արձանագրություն, որտեղ նա ներկայացրեց տեղեկություն` իր հասցեին հնչած սպառնալիքների մասին»:

Նա հիշատակեց նաեւ այն հանգամանքը, ըստ որի` քրեական հետախուզության վարչության պետը գրություն է ստացել այն մասին, որ Մարտիրոսյանը մահափորձ է ծրագրում Գրիգորյանցի եւ Արսեն Միքայելյանի դեմ. «Այդ մարդուց ի՞նչ եք ուզում, նա պարկեշտ անձնավորություն է, եւ արդյո՞ք սա ճնշում չէ «Հայբիզնեսբանկ»-ի կամ բանկային համակարգի վրա»:

Մարուքյանի պնդմամբ` ամբաստանյալը փորձում է դուրս գալ կալանքից, սակայն այդ կերպ նա կարող է ճնշում գործադրել տուժողների, վկաների վրա:

Ըստ տուժող կողմի փաստաբանների` Մարտիրոսյանը Վիտալիի Գրիգորյանցի հետ առերեսման ժամանակ ընդունել է, որ ինքը կատարել է հափշտակություն. «Նա զղջացել է իր արածի համար, աղերսել է, ասել` հետ քաշվիր, թող, ես իմ սխալը կուղղկեմ... Սա վկայում է նրա` խարդախությանը մասնակցության մասին»,-կարծում է տուժող կողմը:

Նիստի ընթացքում ամբաստանյալ Ստեփան Մարտիրոսյանի պաշտպան Կարեն Բատիկյանը եւս ելույթ ունեցավ: Նա ներկայացրեց միջնորդություններ` արտասահմանյան ռեժիսորների եւ բռնցքամարտիկների կողմից իր պաշտպանյալին որպես ազնիվ ու հայրենասեր մարդու բնութագրող փաստաթղթերի տեսքով, սակայն թե տուժող, թե մեղադրող կողմերը առարկեցին: Դատավորը մերժեց միջնորդությունը` հաշվի առնելով, որ կողմը նախկինում զրկված չեն եղել ամբասանյալի վերաբերյալ անձը բնութագրող փաստաթղթեր դատարան ներկայացնելուց:

Կարեն Բատիկյանը շարունակեց պնդել, որ մեղադրանքն անհիմն է. «14 ֆիլմ է արտադրվել, եթե հափշտակվել է, այդ ո՞նց եղավ, որ արտադրվեց»,-ասաց նա եւ հիշատակեց Մարտիրոսյանի` ԱՄՆ-ում ունեցած հողատարածքների մասին:

Ելույթ ունեցավ նաեւ գործով մեղադրյալ Ստեփան Մարտիրոսյանը, ում խոսքով` վեցերորդ վարչությունում գտնվելու ժամանակ Ռոշենը զանգել է եւ քննիչների ներկայությամբ հերքել է իրեն սպառնալու մասին տեղեկությունները. «Դա հարյուր տոկոսանց սուտ է»,-ասաց նա:

Մեղադրյալը պնդեց նաեւ, որ չորս տարբեր քաղաքացիների ստորագրություններ կամ կնիքներ են կեղծվել, որոնք ներկայացվել են մեր իրավապահ մարմիններին. «Վիտալի Գրիգորյանցը մտածված անում է ամեն ինչ, որ ես, լինելով բանտային պայմաններում, ստանամ տարբեր ճնշումներ»,-հայտարարեց Ստեփան Մարտիրոսյանը:

Խորհրդակցական սենյակից վերադառնալով` դատարանը որոշեց  փոխել  մեղադրյալի խափանման միջոցը եւ գրավի դիմաց ազատ արձակեց:

Հեղինակ` Միլենա Խաչիկյան