Փաստ ինֆո

Մանվել Գրիգորյանի վերաբերյալ քրեական գործով տեղի է ունենում ընտրովի արդարադատություն։Այսօր նման հայտարարությամբ է հանդես եկել Մ.Գրիգորյանի պաշտպան Լեւոն Բաղդասարյանը։

Ի հիմնավորումն իր խոսքի փաստաբանը նշեց, որ Մանվել Գրիգորյանին մեղադրանք է առաջադրվել նաև հարկային պարտավորություններից խուսափելու համար։ «Բայց Քրեական օրենսգիրքը նաև պահանջում է՝ եթե անձը առերևույթ հարկային պարտավորությունները չկատարելու հիմքով փոխհատուցում է այդ պարտավորությունները, ուղղակի պարտավոր են գործը կարճել։ Դա իմպերատիվ պահանջ է։ Սակայն վարույթն իրականացնող մարմինը (ՀՔԾ-ն-խմբ.) այդ գործն ուղարկեց դատարան»,- ասաց փաստաբանը։

Նա հայտարարեց, որ Գրիգորյանի պաշտպանական խումբը, ըստ էության, սպառված է համարում արդարադատությունը ներպետական ատյաններում և օրենքով սահմանված կարգով դիմելու է Մարդու իրավունքների եվրոպական դատարան։ «Վերջին դատական ակտը չենք սպառելու ներպետական ատյաններում և աղաղակող խախտումներով դիմելու ենք Եվրոպական դատարան», - հայտարարեց փաստաբանը։

Ինչ վերաբերում է Գրիգորյանի կալանավորմանը, որը վերացնելու համար պաշտպանական կողմի բազում միջնորդություններ մերժվել են դատարանների կողմից, փաստաբանն ասաց, որ մեղադրող կողմը հիմքեր չի ներկայացնում, թե ինչպես կարող է Մանվել Գրիգորյանը, կալանքից ազատվելով, խոչընդոտել քննությանը։

Ավելին՝ նաև նկատեց, որ Մանվել Գրիգորյանը թոքերի քաղցկեղով հիվանդ է ունի շաքարային դիաբետ, ամեն օր մեծ չափերի ինսուլին է ընդունում։
Ինչ վերաբերում է դատախազի այն հայտարարությանը, թե Մանվել Գրիգորյանի քաղցկեղը բուժվել է, փաստաբանը նկատեց «Եթե գիտությանը հայտնի է մեկ դեպք, որ քաղցկեղը բուժվել է, ես կհամաձայնեմ նրա հետ։ Ավելին, մեր ձեռքի տակ կան հեղինակավոր բժիշկների կարծիքներ, որոնք ահազանգում են Մանվել Գրիգորյանի կյանքին վտանգ սպառնալու մասին՝ կապված նրա քաղցկեղի ու շաքարային դիաբետի հետ»։

Աղբյուր` Փաստինֆո