Փաստ ինֆո

Նուբարաշեն քրեակատարողական հիմնարկում գտնվող «Իրավաբան» ՍՊԸ-ի հիմնադիր-տնօրեն Ներսես Խաչատրյանն այսօր պաշտոնապես հացադուլ է հայտարարել, իսկ մայիսի 10-ից պատրաստվում է նաև ջրադուլ անել։ «Փաստինֆո»-ն այդ մասին այսօր նամակ է ստացել է, ըստ որի կալանավորված իրավաբանն այդպիսով իր բողոքի ձայնն է բարձրացնում դեպի պետական բարձրաստիճան պաշտոնյաները, մասնավորապես՝ պահանջում է հանդիպում ՀՀ կառավարության վարչապետի և ՀՀ Գլխավոր դատախազի հետ:

Այս տեղեկությունը «Փաստինֆո»-ի հարցին ի պատասխան հաստատեց նաեւ  ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանը՝ նշելով, որ հացադուլ հայտարարելու մասին կալանավորի դիմումն ստաացել են այսօր։

Ներսես Խաչատրյանը նախնական կալանքի տակ է գտնվում  2019 թվականի մարտի 12-ից  եւ մեղադրվում է  ՀՀ քրեական օրենսգրքի  178 հոդվածի 3-րդ մասի 1-ին կետի  և 178 հոդվածի 2-րդ մասի 2-րդ կետի համաձայն՝ խարդախություն կատարելու համար։

Կալանավորի կինը՝ Գայանե Դավթյանը «Փաստինֆո»-ի հետ զրույցում ասաց, որ քննիչը պատվեր է կատարում, - «Այս ամենի հետևում հավանաբար «Նաիրի Ինշուրանս»-ի հովանավորներն են կանգնած։ Նախկինում նրանց հետ համագործակցում էինք, սակայն ընդհանուր լեզու չգտնելու պատճառով պայմանագիրը դադարեցվեց»։ Գայանե Դավթյանի  պնդմամբ իր ամուսինը սկզբում 4 դրվագով էր մեղադրվում, իսկ հետո ավելացավ  ևս երկուսը, - «Ամուսինս դրանցից անտեղյակ էր և երբեք չի հարցաքննվել։ Խախտվել են նրա իրավունքները։ Պարզապես ցանկանում են հանել նրան իրենց ճանապարհից», - ասաց «Իրավաբան» ՍՊԸ-ի ներկայիս տնօրեն Գայանե Դավթյանը։

Հեղինակ` Հասմիկ Կոշկարյան