Փաստ ինֆո

Դաշտում առկա բոլոր ուժերն էլ հակված են այլևս «Բարգավաճ Հայաստան» կուսակցությանը քաղաքականությունից հեռացնելու,- «Փաստինֆո»-ի հետ զրույցում նման կարծիք է հայտնել քաղաքագետ Հայկ Մարտիրոսյանը։ Ըստ նրա՝ հետհեղափոխական իրականությունում ԲՀԿ-ին առաջինը բախվեց «Լուսավոր Հայաստան» կուսակցությունը, իսկ  հիմա «Քաղաքացու որոշում» սոցիալ-դեմոկրատական կուսակցությունն ու «Իմ քայլը»: «Դա համակարգային խնդիր է»,- ասաց քաղաքագետը:

Նրա խոսքերով՝ որքան էլ  Փաշինյանը մինչ այս պահը ոչինչ չէր ձեռնարկում՝ հին համակարգը կազմաքանդելու գործում, բայց կան այդ համակարգի դետալներ, որոնք քաղաքական դաշտում շատերն այլևս չեն կարողանալու հանդուրժել: Բացի այդ՝ սեփական վարկանիշի անկման պայմաններում Փաշինյանի համար Ծառուկյանի անձը քաղաքական գործչի կարգավիճակում կարող է վտանգավոր դառնալ:

«Որոշակի իրավիճակում՝ երբ գործող վարչապետն այլևս բարեհաջող կերպով սեփական կերպարը սեփական անգործությամբ կկործանի՝ Ծառուկյանը կարող է դառնալ այլ ուժերի հենարանն ու վճռական նետաձիգը: Դա նույնպես, թերևս, Փաշինյանն այլևս հասկանում է»,-ասաց քաղաքագետը։

Նրա խոսքով, հենց սկզբից ակնհայտ էր, որ Նիկոլ Փաշինյանը շահագրգռված էր, որ «Սասնա Ծռերի», «Քաղաքացու որոշման» և այլոց փոխարեն խորհրդարան մտնի հենց ԲՀԿ-ն, բայց Փաշինյանն ամենևին չէր պատրաստվում հանդուրժել ԲՀԿ-ի ներկայությունը հետագայում:

«Իհարկե, իր հաշվարկներում այս հարցում նույնպես վարչապետը սխալվեց և դա իրեն քաղաքականապես թանկ է արժենալու: Բայց կա այն՝ ինչ կա: ԲՀԿ-ն, անշուշտ, քաղաքական առումով իրավիճակներին հարմարվելու բացառիկ կարողություն է ցուցաբերել նախկինում, բայց դա կարող է այլևս չաշխատել»,-ասաց Մարտիրոսյանը։

Նա նշեց, որ եթե Փաշինյանը Ծառուկյանի ազդեցությունը չեզոքացնելու որոշում ունի, ապա դա թեև իրեն հատուկ երկար, դանդաղկոտ ու անհեթեթորեն ցավագին մեթոդներով, բայց այնուամենայնիվ կկարողանա իրականացնել:

Քաղաքագետի կարծիքով, դրա արդունքում առանց այդ էլ ապականված հետհեղափոխական դաշտն առավել կապակայունանա, և դա նույնպես Փաշինյանի անհեռատեսության արդյունքը կլինի:

Հարցին, թե արդյոք Ազգային ժողովի նախագահը Ծառուկյանին կզրկի մանդատից, և այդ որոշումը որքանո՞վ է ձեռնտու «Իմ քայլը»-ին՝ Մարտիրոսյանը պատասխանեց. «Ծառուկյանին մանդատից զրկելը  «Իմ քայլի» քայլիչների համար անչափ ձեռնտու հանգամանք է»:

«Կզրկվի Ծառուկյանը մանդատից թե ոչ՝  միայն Փաշինյանի որոշումից և դրա վրա հնարավոր արտաքին ազդեցություններից է կախված»,-նշեց նա։

Փորձեցինք ճշտել նաև, թե ինչին կհանգեցնի Ծառուկյանի մանդատից զրկվելը, և ինչ վտանգներ կարող է պարունակել այն։

«Կհանգեցնի դաշտում ցնցումների: Ահռելի կապիտալով և ընտրազանգած  պահպանած մարդուն դաշտից հեշտորեն կարելի է հեռացնել միայն հեղափոխական իրավիճակներում, կամ էլ՝ երկաթե ձեռքով վճռական կառավարման պայմաններում: Երկուսն էլ Հայաստանում այլևս չկան»,-ասաց Մարտիրոսյանը։

Քաղաքագետը նշեց, որ Ծառուկյանը հեշտորեն չի հանձնվի: Եվ նկատի ունենալով, որ Փաշինյանը «ասֆալտին է ծեփում» և «պատերով է տալիս» միայն մանր ու միջին տրամաչափի գործիչներին, նաև՝ իր թիմի անդամ մեկ-երկու անհատականություններին, ապա այս առումով Ծառուկյանն այլևս պատճառներ չունի չփորձելու առանց պայքարի հանձնվել:

Հեղինակ` Սոնա Գեւորգյան