Փաստ ինֆո

Լրատվական դաշտում խոսքի ազատության վիճակը բարելավվել է, և այս փոփոխությունը կապված է Թավշյա հեղափոխության և նոր իշխանությունների հետ: Այս մասին այսօր հրավիրված ասուլիսում ասաց ‹‹Խոսքի ազատության պաշտպանության կոմիտե››-ի նախագահ Աշոտ Մելիքյանը:

‹‹Ներկայիս իշխանությունները, ի տարբերություն նախկինների, չեն խառնվում լրատվամիջոցների գործունեությանը, եթե նույնիսկ հայտարարություններ են լինում, ապա դրանց չի հետևում որևէ լծակների կիրառում ընդդեմ լրատվամիջոցների և լրագրողների››,-ասաց ‹‹Խոսքի ազատության պաշտպանության կոմիտե››-ի նախագահը:

Ըստ նրա՝ այս մասին է փաստում նաև ‹‹Լրագրողներ առանց սահմանների›› կազմակերպության զեկույցը, ըստ որի Հայաստանը 19 նիշով բարելավել է իր դիրքերը և հասել է խոսքի ազատության 61-րդ հորիզոնականին:
Մելիքյանը նշեց, որ չնայած այս հանգամանքին, Հայաստանում դեռ մի շարք խնդիրներ կան խոսքի ազատության հետ կապված: Մասնավորապես՝ օրենսդրական բարեփոխումներ են պետք ‹‹Հեռուստատեսության և ռադիոյի մասին›› օրենքում, անհրաժեշտ է նոր նախագիծ պատրաստել, և հիմա ‹‹Խոսքի ազատության պաշտպանության կոմիտեն››, ‹‹Երևանի մամուլի ակումբը ›› և ‹‹Մեդիա նախաձեռնությունների կենտրոնը›› համատեղ աշխատում են այդ նախագծի ստեղծման վրա:

‹‹Ամենայն հավանականությամբ այդ նախագիծը շրջանառության մեջ կդրվի մեկ ամսվա ընթացքում››,-ասաց Մելիքյանը:
Նա նշեց, որ խնդիրներ կան նաև ‹‹Զանգվածային լրատվության մասին›› ՀՀ օրենքում, քանի որ այն ընդունվել է 2003թ.-ին և 15-16 տարվա ընթացքում որոշ առումներով հնացել է, դրանում արտացոլված չեն ժամանակակից տեխնոլոգիաներն ու դրանց դերը:

‹‹Խոսքի ազատության պաշտպանության կոմիտե››-ի նախագահը շեշտեց, որ պետք է մտածել նաև ատելության խոսքը առցանց մեդիայում նվազագույնի հասցնելու մասին:

‹‹Այս մասին իրենց մտահոգությւոնները հայտնել են և՛ քաղաքական ուժերը, և՛ հասարակական կազմակերպությունները, և՛ միջազգային կազմակերպությունները: Այդ ուղղությամբ պետք է լուրջ աշխատել››,-նշեց Մելիքյանը:
‹‹Խոսքի ազատության պաշտպանության կոմիտե››-ի նախագահի խոսքով, որոշ բացասկան միտումներ կան իրավապահ մարմինների գործողություններում: Մասնավորապես, նա մտահոգիչ համարեց անցած տարվա խուզարկությունները և խմբագրություններ կատարած այցելությունները՝ նշելով, որ իրավապահ մարմիններին ուղղակի պետք հեռու պահել լրատվամիջոցների գործունեությունից:

‹‹Այն հավաստիացումները, որոնք լսվում են վարչապետի շուրթերից, պետք է հաշվի առնեն նաև իրավապահ մարմինները: ‹‹Yerevan today››-ի պատմությունը այդպես էլ մութ մնաց, և քննչական կոմիտեն չհրապարակեց, թե ինչ արդյունքներ տվեց այն փորձաքննությունը, որի համար ամբողջ տեխնիկան տարվել էր ուսումնասիրման››,-ասաց Մելիքյանը:

Նա անընդունելի համարեց նաև ոստիկանության այցելությունը ‹‹News.am››՝ և հեռարձակված նյութի հիմքերը ներկայացնելու պահանջը:

Բանախոսի արձանագրմամբ՝ հետհեղափոխական շրջանում որևէ ֆիզիկական բռնություն լրագրողի նկատմամբ չի եղել:

Աղբյուր` Փաստինֆո