Փաստ ինֆո

«Հայբիզնեսբանկ»-ի սեփականատեր Վիտալի Գրիգորյանցի եւ հայազգի գործարար-կինոպրոդյուսեր Ս. Մ.-ի վերաբերյալ գործը հետաքրքիր զարգացում է ստանում։ Մի կողմից դատարանում քննվում է  գործարարի կողմից Գրիգորյանցից առանձնապես խոշոր չափով՝ 50 միլիոն ԱՄՆ դոլարի հափշտակության դեպքի առթիվ քրեական գործը, մյուս կողմից հարուցվում է նոր քրեական գործ Գրիգորյանցի ներկայացուցիչների կողմից կեղծ փաստաթղթեր օգտագործելու փաստի առթիվ։

Քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Նաիրա Հարությունյանից  «Փաստինֆո»-ն տեղեկացավ, որ իրենց մոտ օրերս հարուցվել է քրեական գործ ՀՀ քրեական օրենսգրքի 325-րդ հոդվածի 1-ին մասով. «Կազմակերպված հանցավորության դեմ պայքարի վարչությունում նյութեր են նախապատրաստվել եւ ուղարկվել Քննչական կոմիտե, որտեղ էլ գործ է հարուցվել  առերևույթ կեղծ փաստաթղթով իրավապահներին դիմելու դեպի առթիվ»։

Հարությունյանի փոխանցմամբ՝ գործով մեղադրյալներ այս պահին չկան։

Հիշեցնենք, որ ըստ փաստաբան Կարեն Բատիկյանի՝ Վիտալի Գրիգորյանցի ներկայացուցիչները կեղծ դիմումներ են ներկայացրել իր պաշտպանյալի ռուսաստանյան փաստաբանների անունից, որոնցով պնդել են, թե իր պաշտպանյալը ահաբեկիչ է եւ հակաօրինական վարք ունեցող մարդ. «Ես դիմել եմ կազմակերպված հանցավորության գլխավոր վարչություն, որտեղ նյութեր են նախապատրաստվել եւ ապրիլի 12-ին գործ հարուցվել իմ պաշտպանյալի Ռուսաստանի փաստաբանների դիմումները կեղծելու դեպքի առթիվ»,- «Փաստինֆո»-ի հետ զրույցում ասել էր նա։

Ավելի վաղ հայտնել ենք, որ Բատիկյանը ներկայացնում է հայազգի մի գործարար-կինոպրոդյուսերի շահերը, ով մեղադրվում է Վիտալի Գրիգորյանցից առանձնապես խոշոր չափի՝ 20.203.565.650 ՀՀ դրամին համարժեք 49.045.000 ԱՄՆ դոլարի հափշտակություն կատարելու մեջ: Նրան մեղադրանք է առաջադրվել ՀՀ ՔՕ-ի 178-րդ հոդվածի 3-րդ մասի 1-ին կետով, սակայն նա իրեն մեղավոր չի ճանաչում՝ պնդելով, որ մեղադրանքը ուռճացված է եւ հիմնավոր չէ։

Ըստ մեղադրանքի՝ հիշյալ անձը 2010 թվականի սկզբին Վիտալի Գրիգորյանցին առաջարկել եւ համոզել է ներդրումներ կատարել ֆիլմերի արտադրության մեջ՝ վստահեցնելով, որ նման ներդրումների դիմաց հնարավոր է ստանալ մեծ եկամուտներ։ Ֆիլմարտադրության շուկա մուտք գործելու համար նա Գրիգորյանցին առաջարկել է մի ընկերություն, որը փաստացի պատկանել է իրեն, սակայն որպես հիմնադիր-տնօրեն ներկայացրել է գոյություն չունեցող այլ անձի տվյալներ։ Վիտալի Գրիգորյանցը տվել է իր համաձայնությունը եւ իր գործընկերոջը վստահել ֆիլմերի նկատմամբ իրավունքներ ձեռք բերելու, ապա նաև՝ դրանք վաճառելու կամ այլ ֆիլմերի նկատմամբ իրավունքների հետ փոխանակելու հարցում ֆիլմերի արտադրությամբ, վաճառքով և ձեռք բերմամբ զբաղվող ընկերությունների հետ բանակցությունների վարումը, կազմակերպչական աշխատանքների իրականացումը:

Լուսանկարում՝ «Հայբիզնեսբանկ»-ի սեփականատեր Վիտալի Գրիգորյանցը

Աղբյուր` Փաստինֆո