Փաստ ինֆո

Օրերս մի խումբ կենդանասերներ և կենդանաբանական այգու նախկին աշխատակիցներ բողոքի ակցիայով հանդես եկան՝ պահանջելով այգու տնօրեն Ռուբեն Խաչատրյանի հրաժարականը։ Նրանք դժգոհում էին տնօրենի կառավարումից՝ պնդելով, որ վերջինիս սխալ կառավարման արդյունքում կենդանիների անկում է տեղի ունեցել։ Ռուբեն Խաչատրյանը կենդանաբանական այգում տնօրենի պաշտոնում նշանակվել է 2011 թվականին։ Ավելի վաղ «Փաստինֆո»-ի հետ զրույցում նա նշել էր, որ կենդանաբանական այգու գործունեության հետ կապված գնահատականներ ոչ թե բողոքի ակցիայի մասնակիցներն են տալիս, այլ մասնագետները, որոնք պարբերաբար այցելում են այգի և բարձր գնահատում նրանց  գործունեությունը։ «Փաստինֆո»-ն զրուցեց Ռուբեն Խաչատրյանի հետ։

- Բողոքի ակցիայի մասնակիցների կողմից բարձրացված հարցերն ուսումնասիրելու համար քաղաքապետարանի ստեղծած հանձնաժողովին ծանո՞թ եք , տեղյա՞կ եք արդյունքներին ։

Ինքս այդ հանձնախմբում չեմ եղել և տեղյակ չեմ։ Տեղյակ եմ մեկ ուրիշ հանձնախմբից, որը  այգու 3 տարիների ֆինանսական և թղթային մանրամասն ուսումնասիրությունն է իրականացրել։ Հուսով եմ՝  արդյունքները  շուտով կհրապարակեն։ Կենդանաբանական այգին քաղաքապետարանի կառույցն է, հետևաբար նրանց հետ մեր շփումն ամենօրյա է, եթե ոչ ամենժամյա։ Իրենք ամեն ինչից տեղյակ են, տիրապետում են իրավիճակին։ Եթե լիներ ապօրինություն, լինեին դիրքի, պաշտոնի  չարաշահումներ, ապա ինչին պետք է  սպասեր  քաղաքապետարանը։ Այն, ինչ հասցեագրվում է կենդանաբանական այգուն, հասցեագրվում է քաղաքապետարանին, որովհետև ինքն է տերն այս կառույցի։ Մեղադրել ինձ, որ կապ ունեմ նախարարի կամ որևիցե այլ պաշտոնյայի հետ, և դա է պատճառը, որ պաշտոնից չեն հեռացնում, այն էլ մեր օրերում՝ ծիծաղելի է։

- Քանիցս նշել եք, որ ցույցերն ուղղորդված են և բողոքողներն էլ շահեր ունեն։ Կմանրամասնե՞ք։

-Խնդիրն  անձնական մակարդակի վրա է։ Այն  կապ չունի կենդանասիրության կամ կենդանիների անկումների հետ, որոնք նաև ուղղորդված են եղել, նույն զեբրի մոտ բացահայտեցինք մկնդեղի թունավորում։ Ցավոք սրտի սա մի տեղ է, որտեղ միշտ անձնական խնդիրները լուծելու համար օգտագործել են կենդանիներին։ Ժամանակին այգու  գիշատիչների ամբողջ մի բաժին անկում է ապրել, որովհետև  խնդիր է եղել տնօրենի և փոխտնօրենի միջև։  Թե ովքեր են այսօր բողոքող այդ մի քանի անհատները` հեշտ է այդ ամենը բացահայտելը։ Ովքեր են նրանք, ովքեր են նրանց  հետևում կանգնած մարդիկ, ինչ հետաքրքրություններ ունեն, ինչով են իրենք զբաղվում։ Այդ մարդկանց շարքերում են Արտյոմ Վարդանյանը (Ջամբո էկզոտիկ պարկի հիմնադիր), Մանուկ Մանուկյանը (Ռուբեն Խաչատրյանի նախկին տեղակալ) և այլք։ Խնդիրն անձնական շահերն են, սակայն ես ուժեղ եմ իմ դիրքում, որովհետև ազնիվ եմ աշխատել միշտ։ Արդեն  հայտարարել եմ, որ ընդունում եմ մարտահրավերը և բաց եմ ստուգումների համար, ինչպես նաև պատրաստ եմ կրել պատիժը, եթե մեղավոր եմ։

- Իսկ ավելի ստույգ ի՞նչ շահեր են հետապնդում այդ անձինք։

- Այս պահին որոշ լրագրողներ զբաղվում են այդ հարցով։ Նրանք կտեղեկացնեն հասարակությանը, ոչ թե ես։

- Կենդանաբանական այգում երբևէ առողջ կենդանուն էֆթանազիայի ենթարկե՞լ եք։

- Այնպիսի դեպք չենք ունեցել, որ առողջ կենդանի էֆթանազիայի ենթարկվի։ Բայց առհասարակ առողջ կենդանուն էֆթանազիայի ենթարկելու կետ գոյություն ունի կենդանաբանական այգու կառավարման մոդելում։ Դա այն դեպքում է կատարվում, երբ  տվյալ կենդանին  չի համապատասխանում իր գենետիկ տվյալներին։ Բազմիցս նշել եմ, որ կենդանաբանական այգին հետևում է ԵԱԶԱ-ի կանոնակարգերին։ Այս տարի ԵԱԶԱ-ի ստուգումն է, երբ վերջնական արդյունքով պետք է հաստատեն մեր լիիրավ մասնակցությունը։ Այդ կառույցի կենդանաբանական այգիներն ունեն հստակ դիրքորոշում, որ չեն նպաստելու ապօրինի առք ու վաճառքին, ոչ մի կենդանի չեն գնելու և չեն վաճառելու։ Իսկ այն մարդիկ, որոնք այսօր բողոքում են՝ բոլորը զբաղվում են կենդանիների առք ու վաճառքով։ Գուցե փոքր տարիքում սիրել են կենդանիներ, բայց  իրենք էլ չեն նկատել, թե ինչպես են կենդանասերից դարձել կենդանի սպառող։  

- Ձիարշավարանը փակելու և տարածքը որպես սրճարան օգտագործելու մասին խոսակցություններ կային։ Որքանո՞վ են դրանք համապատասխանում իրականությանը։

- Այգու  ձիարշավարանը կապ չունի Երևանի կենդանաբանական այգու հետ։ Այդ տարածքը մասնավոր կերպով վարձակալել է մի կառույց, որը քաղաքապետարանի կողմից տենդերով շահել է այն և  ծառայություն է իրականացնում։ Երբ կամ ինչպես կաշխատի այն, դա այդ կառույցի ղեկավարի գործն է։ Կենդանաբանական այգին  իրավաբանորեն ոչ մի տեսակ առնչություն չունի ձիարշավարանի հետ։

-  Ի՞նչ կառույցի մասին է  գնում խոսքը։

- Կարող եմ ճշտել կամ էլ դուք հարցման միջոցով տեղեկանաք։

Հեղինակ` Հասմիկ Կոշկարյան