Փաստ ինֆո

«Փաստինֆո»-ն շարունակում է ներկայացնել, թե 2008 թ. մարտի 1-ին տեղի ունեցած զանգվածային անկարգությունների ժամանակ 10 զոհերից յուրաքանչյուրն ինչ հանգամանքներում է ստացել կյանքի հետ անհամատեղելի մարմնական վնասվածքները:

Սամվել Հարությունյան՝ ծնված 05.12.1979 թվականին Արարատի մարզի Լուսառատ գյուղում, նախկինում չդատված, չի աշխատել, զբաղվել է հողագործությամբ, անկուսակցական, փաստացի բնակվել է Արարատի մարզի Եղեգնավան գյուղում։

2008թ. մարտի 1-ին` ժամը 22-ի սահմաններում, գանգուղեղային բաց վնասվածքով, անգիտակից վիճակում նա տեղափոխվել է Երևանի թիվ 3 կլինիկական հիվանդանոց, այնուհետև՝ «Արմենիա» հանրապետական բժշկական կենտրոն, որտեղ գիտակցության չգալով ապրիլի 11-ին մահացել է:

Դավիթ Պետրոսյանը որովայնի հատվածում մահացու վնասվածք է ստացել «ՊՄ» տեսակի ինքնաձիգից արձակված կրակոցի հետեւանքով` Պարոնյան փողոցում

Դատաբժշկական փորձաքննության եզրակացության համաձայն՝ Սամվել Հարությունյանի դիակի վրա հայտնաբերվել է գանգուղեղային բաց, բութ, թափանցող վնասվածք, գլխի ձախ քունքա-կողմնային շրջանի սալջարդ վերք, կարծրենու պատռված դեֆեկտով, գլխուղեղի ջնջխում և արտաթափում, ձախից կողմնոսկրի և քունքոսկրի բազմաբեկորային կոտրվածքներ: Մահը վրա է հասել օրգանիզմի ընդհանուր ինտոքսիկացիայից, որը պայմանավորված է եղել գանգուղեղային բաց, բութ, թափանցող վնասվածքով, վերջինիս հետևանքով զարգացած թարախային մենինգիտով, երկկողմանի թարախային թոքաբորբով:

Կատարված նախաքննությամբ պարզվել է, որ Սամվել Հարությունյանը բողոքի ակցիաներին միացել է 2008 ժամը մարտի 1-ին՝ 18.30-ի սահմաններում ընկերոջ՝ Արամ Բարսեղյանի, և մորաքրոջ որդու` Գեղամ Գևորգյանի հետ: Ժամը 21։30 -ի սահմաններում Սամվել Հարությունյանը, բաժանվելով Արամ Բարսեղյանից և Գեղամ Գևորգյանից, մի խումբ անձանց հետ գնացել է Երևան քաղաքի Մաշտոցի պողոտայի և Գր. Լուսավորչի փողոցի խաչմերուկ և քարեր նետելով` շարժվել առաջ, որի ընթացքում էլ ստացել է մարմնական վնասվածք և տեղափոխվել հիվանդանոց: Հիշյալ հանգամանքը պարզվել է հարցաքննված շուրջ 20 անձանց` այդ թվում՝ Արամ Բարսեղյանի, Գեղամ Գևորգյանի, Սամվել Հարությունյանի մարմնական վնասվածք ստանալուն ականատես Կառլեն Առաքելյանի և Վարդան Անդրեասյանի, Սամվել Հարությունյանի հոր` տուժողի իրավահաջորդ Էդիկ Հարությունյանի ցուցմունքներով, Կառլեն Առաքելյանի և Վարդան Անդրեասյանի մասնակցությամբ լուսանկարով ճանաչման ներկայացնելու, ինչպես նաև վերջիններիս մասնակցությամբ կատարված քննչական փորձարարության արձանագրություններով և քրեական գործի այլ նյութերով:

Ըստ նախաքննական մարմնի՝ Սամվել Հարությունյանի հայրը` Էդիկ Հարությունյանը, շուրջ 2 ամիս թաքցրել է իրականությունը, չի հայտնել, թե ում հետ է Սամվել Հարությունյանը գնացել զանգվածային անկարգությունների կատարման վայր: Հիշյալ հանգամանքն ի հայտ է եկել Սամվել Հարությունյանի հեռախոսահամարի մուտքային և ելքային հեռախոսազանգերի վերծանումների ուսումնասիրությամբ և լրացուցիչ քննչական գործողություններ կատարելու արդյունքում միայն:

2008 թվականին ՀՀ ոստիկանությանը և ազգային անվտանգության ծառայությանը տրվել են հանձնարարություններ` Սամվել Հարությունյանի վիրավորվելուն ականատես այլ անձանց հայտնաբերելու, մեղավորի ինքնությունը պարզելու և նրան հայտնաբերելու ուղղությամբ օպերատիվ միջոցառումներ ձեռնարկելու վերաբերյալ:

Թեեւ 2018 թվականի օգոստոսի 17-ին ՀՀ վարչապետ Նիկոլ Փաշինյանը հայտարարեց, որ «Մարտի 1-ի գործը, ըստ էության, բացահայտված է», սակայն Սամվել Հարությունյանի սպանությունը, ինչպես ավելի վաղ ներկայացված մյուս 6 անձանց սպանությունը չի բացահայտվել եւ որեւէ մեկի մեղադրանք չի առաջադրվել։

Շարունակելի

Աղբյուր` Փաստինֆո