Փաստ ինֆո

«Առանձին տարիների դեպքերը հանած՝ սպանությունների տենդենցը մեր երկրում նվազման է գնում. 2018 թվականին վերջին 30-40 տարիների ընթացքում ամենացածր ցուցանիշն է գրանցվել՝ սպանության 38 դեպք»,-ԱԺ Պետաիրավական հարցերով հանձնաժողովի նիստի ընթացքում այսօր այս մասին հայտարարել է ՀՀ գլխավոր դատախազ Արթուր Դավթյանը. «Միեւնույն ժամանակ հնարավոր բոլոր գործիքները պետք է գործադրվեն աճ գրանցած հանցագործությունների, տվյալ դեպքում՝ հափշտակությունների, բնակարանային գողությունների եւ ճանապարհային երթեւեկության կանոների հանցավոր խախտումներին նվազեցման համար»,-ասել է նա։

Արթուր Դավթյանի խոսքով՝ 2018 թվականի համեմատությամբ՝ բնակարանային գողությունները շուրջ 60, իսկ երթեւեկության կանոների հանցավոր խախտումներով պայմանավորված հանցագործությունները 30  տոկոսով աճ են գրանցել, ինչի կանխարգելման համար դեռեւս նախորդ տարվա վերջից սկսել են միջոցառումներ իրականացնել. «Թեեւ բնակարանային գողությունները 2011 թվականից համարվում են ծանր հանցագործություններ, սակայն դատական պրակտիկան այդ փոփոխությանը ժամանակի ընթացքում է ադապտացվել, դրանց համար նախատեսված պատիժն ու պատասխանատվությունը պետք է խստացվեն»։ Այս նպատակով Դատախազությունն արդեն օրենսդրական փոփոխությունների անհրաժեշտ փաթեթ է ներկայացրել Արդարադատության նախարարություն։

Նույնը վերաբերում է նաեւ ճանապարհային երթեւեկության կանոների հանցավոր խախտումներին. «Մեկ անձի մահվան ելքով այս հանցագործությունը նախատեսում է մինչեւ 5 տարի ազատազրկում,  սակայն մեր պրակտիկայում շատ են պատիժը պայմանականորեն չկիրառելու ինստիտուտի իրացումները։ Ըստ էության, կոպիտ խախտումները դիտարկվում են պատիժը խստացնող հանգամանքներ, սակայն մեր գնահատմամբ՝ սրանք պետք է դառնան հանցակազմը ծանրացնող հատկանիշներ։ Մենք առաջարկում ենք այս հանցակազմի համար նախատեսել առավել խիստ պատիժներ, եւ ոչ թե թողնել, որ կոնկրետ դեպքում դատարանն իր հայեցողական լիազորություններն իրականացնի»։

Գլխավոր դատախազի գնահատմամբ՝ մեր երկրում հանցավորության դեմ պայքարը չի իրականացվում ամբողջական ինստիտուցիոնալ գնահատականի հիման վրա, ուստի պետք է մշակել հանցավորության դեմ պայքարի հատուկ ռազմավորություն. «Դա պետք է ներառի աշխատանքներ դպրոցից մինչեւ պատժի կատարման վերջին փուլ, այսինքն՝ դպրոցից սկսած պետք է դաստիարակել օրինական վարք, որպեսզի հետո խիղճներս հանգիստ լինի, որ պետությունն իրենից հասնող ամեն ինչ արել է»,-ասում է Արթուր Դավթյանը։

Աղբյուր` Փաստինֆո