Փաստ ինֆո

Ազգային Անվտանգության ծառայությունն իր գործն անում է շատ մաքուր, շատ թափանցիկ, օրենքի բոլոր կետերի պահպանմամբ։ Այսօր հայտարարել է ՀՀ ԱԱԾ տնօրեն Արթուր Վանեցյանը` լրագրողների հետ զրույցում խոսելով Պետական վերահսկողական ծառայության պետ Դավիթ Սանասարյանի գործի մասին։

ԱԱԾ տնօրենի խոսքով` անկախ նրանից մարդը պաշտոն է զբաղեցնում, թե ոչ, այս կամ այն կուսակցությանը պատկանում է, թե ոչ, նա նույն կերպ պատասխան է տալու օրենքի առջև։ «Եթե մարդն օրենք չի խախտել, անկախ նրանից նա մեր համախոհն է, թե «թշնամին», մենք նրան չենք հետապնդի»,–հավաստիացրեց Վանեցյանը։

Լրագրողների այն հարցադրմանը, թե պատրաստ եք արդյոք հրաժարական տալ, եթե պարզվի, որ Դավիթ Սանասարյանն անմեղ է, Արթուր Վանեցյանն արձագանքեց. «Իսկ ինչո՞վ է տարբերվում Դավիթ Սանասարյանը ՀՀ այլ քաղաքացիներից, դուք պատկերացնում եք` ինչքան մարդու է ԱԱԾ մեղադրանք առաջադրում, որը հետո նախաքննության ընթացքում չի հաստատվում։ Այ, եթե կապացուցվի, որ Դավիթ Սանասարյանի գործի շրջանակում ԱԱԾ–ի կողմից թույլ են տրվել կեղծիքներ, ապօրինություններ, ով թույլ է տվել դրանք պատասխան կտա օրենքի առաջ, ես էլ, որպես ԱԱԾ տնօրեն, այդ ժամանակ պատասխան կտամ»,–ասաց Վանեցյանը։

Նա հայտարարեց, որ պատրաստ եմ պատասխան տալ թե՛ օրենքի առաջ, թե՛ ողջ հասարակության, եթե կլինի մի դեպք, որ ԱԱԾ ինչ-որ մեկի նկատմամբ ապօրինի հետապնդում կիրականացնի։ Հորդորում եմ բոլորին չփորձել արհեստական աղմուկ սարքել ԱԱԾ–ի շուրջ։ ԱԱԾ–ն այս կարճ ժամանակահատվածում հասարակության շրջանում ձեռք է բերել մեծ հեղինակություն, և որևէ մեկը թող չփորձի ԱԱԾ–ի հետ խոսել շանտաժի լեզվով»,–ասաց Վանեցյանը։

Աղբյուր` Փաստինֆո