Փաստ ինֆո

«Կենդանաբանական այգու գործունեության հետ կապված գնահատականներ ոչ թե բողոքի ակցիայի մասնակիցներն են տալիս, այլ մասնագետները, որոնք պարբերաբար այցելում են այգի և բարձր գնահատում մեր գործունեությունը», - լրագրողների հետ զրույցում ասաց կենդանաբանական այգու տնօրեն Ռուբեն Խաչատրյանը։ Վերջինս իր դեմ ուղղված բողոքի ակցիան որակեց որպես զավեշտ ու զրպարտանք։ Բողոքի ակցիայի մասնակիցների պահանջին ի պատասխան՝ այգու տնօրենն ասաց, որ պաշտոնից հրաժարվելու որևէ հիմք չի տեսնում։

Ավելի վաղ «Փաստինֆո»-ին այգու նախկին աշխատակիցները տեղեկացրել էին, որ Ռուբեն Խաչատրյանը երեխաներին հրավիրել է՝ վագրի վիրահատությունը դիտելու։ Տնօրենն իր պարբերաբար ուղիղ հեռարձակումները մեկնաբանեց հետևյալ կերպ,-«Հանրությունը շատ հետաքրքված է այգով։ Հեռարձակումներ եմ արել, որ  գան ու տեսնեն վիրահատությունը պատուհանից այն կողմ»։ Հարցին արդյոք վիրահատական գործընթացին  երեխաների մասնակցությունը նորմալ է, այգու տնօրենն ասաց, - «Ծնողներն են որոշում՝ իրենց երեխաները գան, թե ոչ։ Այս պրակտիկան ողջ աշխարհում է կիրառվում և չկա օրենքի այն սահմանափակումը, որով կարող են մեղադրել ինձ։ Դա ատամների վիրահատություն էր, որը կարծում եմ բոլոր երեխաների համար հետաքրքիր է»։

Հիշեցնենք, որ վաղ առավոտյան կենդանասերների նախաձեռնությունը և այգու մի շարք նախկին աշխատակիցներ բողոքի ակցիա էին սկսել։ «Կենդանաբանական այգին առանց Ռուբենի», «Ռուբեն հեռացի՛ր» վանկարկումներով նրանք պահանջում էին կենդանաբանական այգու տնօրեն Ռուբեն Խաչատրյանի պաշտոնից հեռացումը։ Նրանք պնդում էին, որ այս պահին Ռուբեն Խաչատրյանը չի կարող շարունակել պաշտոնավարել, քանի որ նա այգին տանում է դեպի անկում։ Լրագրողների հետ զրույցում աշխատակիցները ներկայացրեցին իրենց հիմնավորումները, - «Մենք խոսում ենք սխալ կառավարման մասին։ Այս ընթացքում անընդհատ առողջ կենդանիների անկում է տեղի ունենում։ Երեք որձ առյուծները, զեբրը, բոլորին քնացնում են»։ «Փաստինֆո»-ի հետ զրույցում այգու գիշատիչների նախկին ավագ խնամող Արման Պետրոսյանը նշեց, որ առաջին վագրի անկման ժամանակ ոչ մի նախանշան չի եղել, - «Եթե խնդիր տեսնեի, կբարձրաձայնեի։ Բժիշկն էլ ամեն օր ստուգում էր նրանց։ Վագրն առողջ էր, բայց մի օր հանկարծ սատկեց։ Հերձման ժամանակ էլ տալիս են մի հիվանդւթյան անուն՝ խշխշան պալար, որը հատուկ է խոշոր եղջերավորներին, այլ ոչ կատվազգիներին», - ասաց Արման Պետրոսյանը՝ ավելացնելով, որ առյուծներին քնացնելիս պատճառաբանել են, որ նորակառույց տարածքում հնարավոր չէ պահել այդքան որձ առյուծ։

Հիշեցնենք, որ կենդանաբանական այգու տնօրեն Ռուբեն Խաչատրյանի դեմ բողոքի ցույցեր անցկացվել են նաև տարեսկզբին։ Քաղաքապետարանն էլ նախաձեռնել էր  ստեղծել հանձնախումբ։ «Փաստինֆո»-ի հետ զրույցում այգու նախկին անասնաբույժ Անուշ Ռաֆայելյանն ասաց, որ եղել է ընդամենը երկու հանդիպում, որից հետո արդեն  չորս ամիս է արձագանք չկա, - «Առաջին հանդիպման ժամանակ քաղաքապետն ասաց, որ ակնկալում է 100 տոկոսանոց ճիշտ և երկարատև համագործակցություն։ Որոշվեց գրավոր ներկայացնել մեր բողոքները, առաջարկներն ու խնդրի հնարավոր լուծումները։ Մենք դա արեցինք, սակայն երկրորդ հանդիպման ժամանակ հասկացանք, որ նրանք տեղյակ չեն և չեն կարդացել մեր ներկայացրածը»։

Պարբերաբար այգի հաճախող քաղաքացիներից ոմանք նույնպես կիսում են այն կարծիքը, որ կենդանիների անկման մեջ որևէ միտում կա, քանի որ չեն կարող կենդանիներն իրար հետևից սատկել։ Նրանցից մեկը վրդովվել էր, որովհետև իմացել էր այգու ձիարշավարանի փակման մասին, - Երկու օր առաջ առանց որևէ բացատրության ասացին, որ այն փակվում է։ Լուրեր կան, որ այդ տարածքն օգտագործվելու է որպես սրճարան։ Չգիտեմ՝ որքանով է իրականությանը համապատասխանում դա»։

Կենդանասերների նախաձեռնության անդամները և այգու նախկին աշխատակիցները դիմել են նաև ԱԺ երեք խմբակցություններին, - ««Բարգավաճ Հայաստան» խմբակցության երեք ներկայացուցիչ մեզ անմիջապես ընդունեց։ Եթե չեմ սխալվում Արման Աբովյանը վերցրեց դիմումները, պարզաբանումներ խնդրեց և ասաց, որ հետամուտ կլինեն», - ասացին կենդանաբանական այգու նախկին աշխատակիցները։

Նրանք կշարունակեն բողոքի ակցիաները և արդյունքի չհասնելու դեպքում, հարցը կբարձրացնեն վարչապետի մակարդակով։ Բողոքի մասնակիցները պահանջում են անհապաղ Ռուբեն Խաչատրյանի տնօրենի պաշտոնից հեռացումը և մասնագետների խմբի ստեղծում, որը կկարգավորի բոլոր հարցերը։

Հեղինակ` Հասմիկ Կոշկարյան