Փաստ ինֆո

Արդարադատության նախարարի կողմից կարգապահական վարույթ հարուցելու խնդրանքով Բարձրագույն դատական խորհրդին ներկայացված 11 դատավորներին մեղսագրվող ենթադրյալ խախտումը կապված է գործի քննության ընդունման ինստիտուտի հետ: Այս մասին այսօր «Փաստինֆո»-ի հետ զրույցում ասաց Բարձրագույն դատական խորհրդի նախագահ Գագիկ Հարությունյանը. «Ենթադրյալ խախտումը կապված է գործի քննության ընդունման ինստիտուտի հետ. արդյո՞ք պետք է գործը քննության չընդունվեր, պատասխան տրվեր, թե՞ նույն պատասխանը պետք է տրվեր գործը քննության ընդունելուց հետո»:

Հիշեցնենք, որ օրեր առաջ ՀՀ արդարադատության նախարարը դիմել էր Բարձրագույն դատական խորհուրդ` 11 դատավորի նկատմամբ կարգապահական վարույթ հարուցելու խնդրանքով:

Ի պատասխան «Փաստինֆո»-ի այն հարցին, թե ինչ փուլում է գործն այս պահին, ԲԴԽ նախագահը պատասխանեց. «Այս պահին գործն ընթացքի մեջ է, սահմանված ժամկետներում քննություն կլինի»:

Նշենք, որ Արդարադատության նախարարի կամ հանձնաժողովի՝ կարգապահական վարույթ հարուցելու հարցերը լուծելու համար խորհուրդը պարտավոր է 1-ամսյա ժամկետում նշանակել քննություն, եւ քննելուց հետո 15-օրյա ժամկետում հրապարակել որոշումը:

Գագիկ Հարությունյանի խոսքով` ԲԴԽ-ի գործունեության 1-ին յոթ ամիսների ընթացքում դիմումներ գրեթե չկային, եւ դա իրենց մտահոգում էր. «Նույնիսկ կասկածում էինք, որ կարգապահական վարույթի ինստիտուտը հավանաբար արդյունավետ չէ. Արդարադատության նախարարը խուսափում էր, իսկ Դատավորների ընդհանուր ժողովի կարգապահական հարցերի հանձնաժողովը լիարժեք չէր ձեւավորվել: Բայց հետո շատ ինտենսիվացավ. արդեն 6 կարգապահական վարույթ իրականացվել է, եւ գրեթե նույն թվով էլ ընթացքի մեջ է: Սա թվով մի քանի անգամ ավելին է, քան նախորդ 4-5 տարին միասին վերցրած»:

Գագիկ Հարությունյանը նշեց, որ իրենք չեն ուզում, որ այս ինստիտուտը դառնա մահակի գործառույթ իրականացնող, բայց այն պետք է ունենա նաև սթափեցնող դեր. «Մեր իրավական դիրքորոշումներով պետք է տվյալ խնդիրների լուծման վերաբերյալ փորձենք ձեւավորել միասնական մոտեցում, որովհետեւ օրենքը շատ հստակ է ասում, որ, օրինակ, եթե քաղաքացին դիմել է, եւ դատարանը դիմումի մեջ տեսնում է տեխնիկական բնույթի թերություններ, պետք է բոլորը նշի, վերադարձնի, եւ քաղաքացու նորից ներկայացնելուց հետո դա պետք է ընդունվի վարույթ, եւ համապատասխան դիրքորոշում արտահայտվի, բայց դատավորները 2-3 անգամ տանում-բերում են։ Սրա վերաբերյալ կա նաեւ ՍԴ-ի դիրքորոշում առ այն, որ չի կարելի այդ ձեւով սահմանափակել մատչելիության իրավունքը»,- ասում է ԲԴԽ նախագահը և վստահեցնում. «Մենք ուզում ենք մեր իրավական դիրքորոշումներով նպաստել նրան, որ պրակտիկայից դուրս գան բացասական, հաճախ` նույնիսկ օրենքին հակասող երեույթները»:

Հեղինակ` Միլենա Խաչիկյան