Փաստ ինֆո

Որ լրատվամիջոցը, որ աղբյուրը, որ կներկայացնի կաշառք վերցնելու տեսանյութը, խոստանում եմ ձեռքս իրենց լրատվամիջոցում կկտրեմ: Այսօր հրավիրված ասուլիսում  ասաց Պետական վերահսկողական ծառայության պետ Դավիթ Սանասարյանը՝ ժխտելով իր կաշառք վերցնելու տեսանյութի առկայությունը:

Նա նշեց, որ ինքը վստահ է՝ սա հակահեղափոխական հենք ունեցող ապատեղեկատվություն է և  արվում է նրա համար, քանի որ տեսնում են՝ իրեն  վստահողների մեծ բանակ կա, որը չի հավատում, որ ինքը կարող է կապ ունենալ կոռուպցիոն դրսևորումների հետ:

«Նրանց տարբեր մասերը մռմուռ է գալիս դրանից, բայց ոչինչ, ես անձամբ սովոր եմ այդ  վիճակներին և ներողամտությամբ եմ վերաբերվում››,-ասաց ՊՎԾ պետը:

Խոսելով դատախազությունում հեմոդիալեզի գնումների հետ կապված հարուցված գործի մասին, Սանասարյանն ասաց, որ իրենց նպատակը եղել է ‹‹Գնումների մասին›› օրենքին համապատասխանեցնելը պետական գնումներին:

Սանասարյանը նշեց, որ Դատախազության մեղադրանքի հիմքում մեծամասնությամբ դրված է այն տեղեկանքը, որը ինքը տվել է:

ՊՎԾ պետի խոսքով, ամբողջ աշխարհում հեմոդիալեզի պարագաների հետ կապված մաֆիա գոյություն ունի և տարբեր երկրներում տարբեր ձևով են տիրանում այդ մաֆիային:

«Մենք ասում ենք, որ «Գնումների մասին» օրենքի մի շարք դրույթների խախտումով է իրականացվել հեմոդիալեզի գնման մրցույթը» ,-ասաց Սանասարյանը:

Նա նշեց, որ մրցակցության դեպքում շուկայւոմ այլ մասնակիցներ կլինեն, և պետությունը ավելի քիչ կվճարի քան վճարել է:

«Սա իրենց բնորոշմամբ բիզնես խլել է, որովհետև այդ մենաշնորհը տվյալ բժշկական կենտրոնում վերացավ: Եվ ես վստահ եմ, որ գնալով ավելի է վերանալու, անկախ նրանից թե այս գործը իմ հետ կապված ինչ ընթացք կստանա»,-ասաց ՊՎԾ պետը:

Սանասարյանը նշեց՝ երբ ՊՎԾ-ի առաջարկը ԲԿ-ներից մեկը ընդունել է, պետությունը  մի մրցույթի մասով  13մլն դրամ է շահել: Իսկ Վանաձորի ԲԿ-ն՝ չընդունելով իրենց առաջարկը, գնումների պրոցեսը իրականացրել է 30%-ով ավելի թանկ:

Ամփոփելով խոսքը, ՊՎԾ պետն ասաց՝ ինքը վստահ է և  որևիցե վայրկյան չի կասկածում, որ այս գործը չունի այլ ելք քան մեղադրանքի կասեցումը: Նրա խոսքով, հակառակ դեպքում բավականին լուրջ պայքար է սկսվելու նոր Հայաստանում և  դա լինելու է իրավական դաշտը մաքրելու պայքար:

Նկատենք, որ Դավիթ Սանասարյանը ողջունեց միայն դատախազության կողմից նշված քրեական գործի հարուցումը, մինչդեռ նույն դատախազությունը նաեւ հայտարարել է, որ Դավիթ Սանասարյանին մեղադրանք առաջադրելու համար բավարար հիմքեր կան, ավելին՝ մերժել ԱԱԾ-ից գործի քննությունը այլ քննչական մարմին ուղարկելու փաստաբանների միջնորդությունը։ 

Աղբյուր` Փաստինֆո