Փաստ ինֆո

Կոպենհագենի համալսարանական քոլեջի ուսանողներն իրենց պրակտիկան անցկացնում են Հայաստանում՝ ուսումնասիրելով մեր երկրի քաղաքացիական ավիացիայի փորձն ու հնարավորությունները: Բոլոր ծախսերը հոգում է դանիական կողմը:

Քաղավիացիայի կոմիտեի նախագահ Տաթևիկ Ռևազյանը «Արմենպրես»-ի հետ զրույցում նշեց, որ նպատակ ունի քաղաքացիական ավիացիան որպես կառույց բաց պահել, որպեսզի երիտասարդները հնարավորություն ունենան ներսից ծանոթանալու ոլորտին:

«Շատ կարևոր է, որ քաղավիացիան ու ընդհանրապես տարբեր պետական մարմիններ, մասնավոր հիմնարկներ ուսանողների հետ շատ ջերմ համագործակցեն: Արդյունքում՝ կառույցը բացվում է, մարդիկ հնարավորություն են ունենում ծանոթանալու աշխատանքին, հասկանալու այդտեղ աշխատելու հավանականությունը: Շատերը պատկերացում չունեն այս կամ այն կառույցի գործունեության մասին: Ու շատ հաճախ այնպես է ստացվում, որ եթե ասենք պապիկդ օդաչու է, ապա դու կարող ես իմանալ ավիացիայի մասին և ցանկանաս աշխատել այդտեղ: Հակառակ դեպքում դու չես պատկերացնում և չես տեսնում քո հնարավորությունն այդ ոլորտում: Դռները բացելով՝ ուզում եմ, որ երիտասարդները հետաքրքրվեն և, միգուցե, ցանկություն առաջանա գալ աշխատել այս ոլորտում»,-ասաց կոմիտեի նախագահը:

Այդպես եղավ Տաթևիկ Ռևազյանի հետ, երբ նա տարիներ առաջ Դանիայից, որտեղ սովորել է Կոպենհագենի բիզնես դպրոցում, Հայաստան էր եկել, այցելել էր «Զվարթնոց» օդանավակայան, ծանոթացել տեղի ավիացիայի հնարավորություններին, նա նաև աշխատել է Կոպենհագենի օդանավակայանում և այդ ամենից տպավորված էլ որոշել է իր գործունեությունը շարունակել հենց այս ոլորտում:

«Ամեն ինչ անում եմ, որ և՛ դպրոցականները, և՛ համալսարանների ուսանողները գան, ծանոթանան, հետաքրքրվեն ոլորտով: Ու չեմ սահմանափակվում Հայաստանով: Իմ աջակցությունն եմ հայտնում, որ այլ երկրներից էլ ուսանողներ գան մեր երկիր: Տվյալ դեպքում, մեզ մոտ են դանիացի ուսանողները, որոնք ուսումնասիրում են ավիացիայի ոլորտում մեր հնարավորությունները»,-ասաց նա: Նախորդ տարի Դանիայից երկու ուսանող էին եկել, սակայն վերադառնալուն պես նրանք այնքան են պատմել Հայաստանի մասին, որ իրենց ընկերներից նույնպես ցանկացողներ եղան պրակտիկան անցկացնել Երևանում: Այդ ամենին նպաստում է նաև Կոպենհագենի համալսարանական քոլեջի դասախոս Յակոբ Ցյուղուփը, ով ևս եղել է Հայաստանում և Դանիայում ուսանողներին մեր երկրի մասին պատմելու առիթը բաց չի թողնում:

Դանիացի ուսանող Մեդս Էգը բավական տպավորված է Հայաստանով: Քաղավիացիայի ոլորտի հնարավորություններին ծանոթանալուց բացի, նպատակ ունի հնարավորինս շատ վայրեր այցելել՝ բացահայտելու երկրի մշակույթը, պատմությունը, խոհանոցը:

«Երբ եկավ պրակտիկայի ժամանակը, ես ցանկացա ընտրել մի երկիր, որն ուրիշ է՝ Դանիա չէ, Եվրոպա չէ: Հայաստանի մասին շատ էի լսել, որոշեցի գալ այստեղ, մանավանդ, որ Տաթևիկ Ռևազյանի գործոնն էլ կար: Նախատեսում ենք լինել մի քանի քաղաքներում, այցելել եկեղեցիներ: Կլինենք Ցեղասպանության թանգարանում»,-ասաց Մեդս Էգը:

 
Նիկոլա Թոմսոնը Հայաստանում ուսումնասիրում է քաղավիացիայի շինությունների անվտանգության հարցերը: Նա Դանիայում աշխատել է այդ ոլորտում, և իր համար հետաքրքիր է այստեղ ուսումնասիրություն կատարելը, խնդիրները բարձրաձայնելը:

Նիլս Շմիթը հետաքրքրված է փոքր ավիացիայով: Ուսումնասիրում է մեր երկրում այդ ոլորտի զարգացման հնարավորությունները, տարածաշրջանի փորձը և առանձնացնում, թե ինչը կարելի է կիրառել Հայաստանում ոլորտը զարգացնելու համար:

Դանիացի ուսանողները հիացած են հայկական խոհանոցով: Նրանք ընդգծում են, որ Հայաստանում ամեն ուտեստ արժե փորձել: Նրանք առանձնացրեցին հայկական տոլման, լավաշը, խորովածը, գարեջուրը, սուրճը:

Աղբյուր` Փաստինֆո