Փաստ ինֆո

«Մոտ ապագայում հանրության, քաղհասարակության թե՛ մասնագիտական, թե՛ պառլամենտական գործընկերների հետ պետք է պարզեցնենք հարկային օրենսգիրքը»,- այս մասին այսօր Հարկային օրենսգրքի փոփոխությունների նախագծի խորհրդարանական լսումների ժամանակ ասաց ՊԵԿ նախագահ Դավիթ Անանյանը։

Վերջինս կարևորեց հարկային համակարգը բարելավելու կառավարության որդեգրած փոփոխությունների փուլերը, - «Նպատակ ունեինք, որ արագ պետք է առաջին փուլի փոփոխություններն իրականցավեին, որպեսզի իրական տնտեսվարողն իր առօրյայում հարկման համակարգի փոփոխությունների հետ մեկտեղ կարողանար բիզնեսով զբաղվել»։

ԱԺ տնտեսական հարցերի մշտական հանձնաժողովի նախաձեռնությամբ տեղի ունեցած խորհրդարանական լսումներին քննարկվեցին ակցիզային հարկերի, շահութահարկի, եկամտահարկի համահարթեցման և մի շարք այլ թեմաներ։ Եկամտահարկի նախատեսվող համահարթեցման պարագայում ՀՀ ֆինանսների նախկին նախարար Վարդան Արամյանն առաջարկում է գույքը հարկել պրոգրեսիվ կերպով։ Նրա խոսքով կան շատ երկրներ, երբ անցնում են միասնական եկամտային հարկի դրույքաչափի։ Նմանատիպ երկրներում պրոգրեսիվության խնդիրը լուծվում է գույքահարկի միջոցով, - «Եթե եկամուտները հարկելու պրոգրեսիվություն ապահովելու տեսանկյունից չես կարողանում տնտեսությանն օգնել, ապա պրոգրեսիվությունը կարելի է ապահովել գույքահարկի միջոցով»։ Հիշեցնենք, որ հարկային օրենսգրքի փոփոխությունների ծրագրով առաջարկվում է եկամուտը համահարթեցնել մինչև 23 %, տարեցտարի նվազեցնել՝ հասցնելով 20 %: ՀՀ ֆինանսների փոխնախարար Արման Պողոսյանի փոխանցմամբ էլ տնտեսության զարգացման հնարավորություններն ու առաջնահերթությունները հասկանալու համար վերլուծություններ կատարվել են, - «Արտահանմանը կողմնորոշված ճյուղերի շահութաբերությունը զիջում է ներքին սպառմանը կողմնորոշված ոլորտների շահութաբերությանը։ Հետևաբար ներդրումները կատարվում են ավելի շահութաբեր», - ասաց ֆինանսների փոխնախարարը, ավելացնելով, որ հարկային գործիքներով աջակցության հնարավորությունները սահմանափակ են, - «Արտահանվող ապրանքն ազատված է ավելացված արժեքի հարկից և ակցիզային հարկից։ Աջակցության միակ ուղղությունը պետք է լինի ուղղակի հարկերի գծով բեռի նվազեցումը»։

Հեղինակ` Հասմիկ Կոշկարյան