Փաստ ինֆո

Հայաստանի Քրեակատարողական հիմնարկներում գերծանրաբեռնվածության խնդիր չկա:  Այս իշխանությունների օրոք այս խնդիրը և դրանից բխող բոլոր արատավոր երևույթները վերացված են: Այսօր հրավիրված ասուլիսում հայտարարել է ՀՀ արդարադատության նախարար Արտակ Զեյնալյանը:

Նրա փոխանցմամբ՝  ապրիլի 1-ի դրությամբ ՔԿՀ-ներում պահվում է 2287 անձ, ինչը 1248-ով պակաս է 2018թ.ի նույն ժամանակահատվածի համեմատ: Այդ անձանցից 985-ը կալանավորներ են իսկ 1302-ը՝ դատապարտյալներ:  2019թ.-ի առաջին եռամսյակի ընթացքում ՔԿՀ-ներից ազատվել է 339 անձ, որոնցից 341 պայմանական վաղաժամկետ, 2-ը՝ հիվանդության պատճառով , 59 համաներումով, իսկ մյուսների ժամկետը լրացել է:

«ՔԿՀ-ներում յուրաքանչյուր մահճակալի վրա գրանցված է մեկ դատապարտյալ, և հետևաբար դրանից բխող բոլոր արատավոր երևույթները վերացված են: Մենք չունենք գաղտնագրված ավելցուկ, թաքուն դատապարտյալ և կալանավորված, իսկ մեր ՔԿՀ-ներում մահճակալների թիվը մոտ 5350 է»,-ասաց նախարարը:

Նրա խոսքով, դատապարտյալներից 281-ը ներգրավվել է տարաբնույթ աշխատանքներում, և դա իրականցվել է դատապարտյալների զբաղվածությունն ապահովելու և սոցիալական վերականգնողական միջոցառումներ իրականացնելու նպատակով: 89 դատապարտյալ իրացրել է իր կրթական իրավունքը: Մասնավորապես՝ 22-ը հանրակրթական, 63-ը մասնագիտական, 4-ը բարձրագույն և հետբուհական:

Խոսելով ՔԿՀ-ների կենցաղային պայմանների մասին՝ արդարադատության նախարարն ասաց՝ 2019թ.-ի հունվարի 1-ին սկսվել են Նուբարաշեն ՔԿՀ-ի ներքին կոյուղու ցանցի արտաքին և ներքին ջրամատակարարման ցանցի, սանհանգույցների, բաղնիքների և խոհանոցի էլեկտրահամակարգերի կապիտալ շինարարական աշխատանքները: 

«Նաև տեղի են ունենում էլեկտրական ենթակայանի նորոգման աշխատանքներ: Իսկ Վարդաշեն ՔԿՀ-ում սկսել են արտաքին կոյուղու ցանցի և 143 մետր երկարությամբ պարսպի կապիտալ շինարարական աշխատանքները»,-ասաց Զեյնալյանը:

Նա նշեց, որ նույնականացման քարտեր և անձնագրեր են տրամադրվել 45 կալանավորված և դատապարտված անձի, իսկ դատապարտյալների հիվանդանոցում իրականացվել է ներքին ջրամատակարարման ցանցի ընթացիկ վերանորոգում:

Նախարարի խոսքով,  ոլորտի բարեփոխմանն ուղղված փաթեթն ՆԺ-ի կողմից վերջնական ընդունվելու արդյունքում դատապարտյալներին ՔԿՀ-ներում տեղաբաշխելու գործընթացում հաշվի կառնվի նաև այն հանգամանքը, թե տվյալ հիմնարկում պատիժ կրելու դեպքում արդյոք երաշխավերվում է մերձավոր ազգականների հետ կապը, այսինքն հնարավորինս բնակավայրին մոտ լինելու խնդիրը:

Զեյնալյանը նշեց, որ բացի կարճատև տեսակցությունից կալանավորված անձանց կտրամադրվի նաև երկարատև տեսակցություն երկու ամսվա ընթացքում առնվազն մեկ անգամ:

«Վերանալու է օրենսդրական այն կանոնը, ըստ որի կարճատև մեկնում չտրամադրելը կապվում է միայն անձի կատարած հանցագործության ծանրության հետ: Կարճատև մեկնում կտրամադրվի բոլոր այն դեպքերում, երբ դատապարտյալի երեխան հայտնվել է կյանքի դժվարին իրավիճակներում»,-ասաց նախարարը:

Նա տեղեկացրեց, որ հստակեցվել է նույնականացման քարտ կամ ժամանակավոր վկայական ստանալու իրավունքը: Կարճատև մեկնում ստացած անձինք այս իրավունքը կարող են իրացնել ընդհանուր հիմունքներով՝ սովորական քաղացիների նման, իսկ ազատությունից զրկվելու վայրերում վարչակազմի միջոցով:

Նախարարի փոխանցմամբ  2019թ.-ի առաջին եռամսյակի ընթացքում ՔԿՀ-ներից ազատվել է 339 անձ, որոնցից 341 պայմանական վաղաժամկետ, 2-ը՝ հիվանդության պատճառով , 59 համաներումով, իսկ մյուսների ժամկետը լրացել է:

Հեղինակ` Սոնա Գեւորգյան