Փաստ ինֆո

«Հայբիզնեսբանկ»-ի սեփականատեր Վիտալի Գրիգորյանցի ներկայացուցիչների կողմից կեղծ փաստաթղթերի օգտագործման փաստի առթիվ հարուցվել է քրեական գործ։ Այս մասին «Փաստինֆո»-ին հայտնեց փաստաբան Կարեն Բատիկյանը։

Ավելի վաղ հայտնել ենք, որ Բատիկյանը ներկայացնում է հայազգի մի գործարար-կինոպրոդյուսերի շահերը, ով մեղադրվում է Վիտալի Գրիգորյանցից առանձնապես խոշոր չափի՝ 20.203.565.650 ՀՀ դրամին համարժեք 49.045.000 ԱՄՆ դոլարի հափշտակություն կատարելու մեջ: Նրան մեղադրանք է առաջադրվել ՀՀ ՔՕ-ի 178-րդ հոդվածի 3-րդ մասի 1-ին կետով, սակայն նա իրեն մեղավոր չի ճանաչում՝ պնդելով, որ մեղադրանքը ուռճացված է եւ հիմնավոր չէ։

Փաստաբան Կարեն Բատիկյանի խոսքով՝ Գրիգորյանցի ներկայացուցիչները կեղծ դիմումներ են ներկայացրել իր պաշտպանյալի ռուսաստանյան փաստաբանների անունից, որոնցով պնդել են, թե իր պաշտպանյալը ահաբեկիչ է եւ հակաօրինական վարք ունեցող մարդ. «Երբ ես 2019 թվականի փետրվարին ներգրավվեցի գործով, կապ հաստատեցի նրա ռուսաստանյան փաստաբանների հետ, ովքեր էլ հերքեցին այդ փաստաթղթի իրական լինելը, եւ այդ հերքումով իմ պաշտպանյալի նկատմամբ գրավ կիրառվեց»։  

Կինոպրոդյուսերը պնդում է, որ «Հայբիզնեսբանկ»-ի սեփականատիրոջից գումար չի հափշտակել. Իր ձեռքից փորձում են խլել ԱՄՆ-ում գտնվող հողատարածքը

Նշենք, որ հետագայում տուժող կողմի ներկայացրած միջնորդությունը քննարկելով դատարանը մարտի 28-ին կրկին որոշել է մեղադրյալի նկատմամբ որպես խափանման միջոց կիրառել կալանավորումը, ինչի դեմ մեղադրյալի փաստաբանը վերաքննիչ բողոք է ներկայացրել։

Բացի այդ՝ փաստաբանը նաեւ դիմել է կազմակերպված հանցավորության գլխավոր վարչություն, որտեղ նյութեր են նախապատրաստվել եւ ապրիլի 12-ին գործ հարուցել Ռուսաստանի փաստաբանների դիմումները կեղծելու դեպքի առթիվ։

Բատիկյանը փոխանցմամբ՝ ի սկզբանե հանցագործության մասին հաղորդումը ներկայացվել է մեր իրավապահ մարմիններին, ընդ որում՝ ենթադրյալ հանցագործությունը կատարելուց 5-6 տարի հետո. «Այսինքն՝  50 միլիոն ԱՄՆ դոլար կորցնողը 5-6 տարի սպասո՞ւմ է»,-ասում է նա ու հավելում. «ԱՄՆ-ից եկած պատասխանում հարցրել էին ՝ որեւէ անգամ այս հարցով դիմե՞լ են ԱՄՆ իրավապահ մարմիններին, սակայն չեն դիմել»։

«Հայբիզնեսբանկ»-ի սեփականատեր Վիտալի Գրիգորյանցին սպանելու համար քիլլեր ենթադրյալ փնտրողը նրա նախկին գործընկերն է

Ըստ նրա՝ իր պաշտպանյալը 30 տարի ապրել է ԱՄՆ-ում, ու հենց եկել է ՌԴ, նրան կալանավորել, տարել են մեկուսարան, որտեղ էլ նա մնացել է 11 ամիս. «Մեր հեղափոխությունից հետո նոր միայն տեղափոխեցին Հայաստան, բախտները չբերեց, որ հեղափոխություն եղավ, թե չէ այնքան պիտի պահեին ու ճնշեին, որ նա ի վերջո հրաժարվեր ԱՄՆ-ում գտնվող իր հողատարածքից, բայց դե հիմա էլ կարծես չարաշահումները շարունակվում են»,-ասում է պաշտպանն ու եզրափակում. «Ինչպես կալանքի երկարաձգումն են կեղծել, նույն էլ կերպ քրեական գործում կան ավելի ցայտուն խախտումներ»։

Լուսանկարում՝ փաստաբան Կարեն Բատիկյանը

Հեղինակ` Միլենա Խաչիկյան