Փաստ ինֆո

Բարձրաստիճան պաշտոնատար անձանց էթիկայի հանձնաժողովը Պետական վերահսկողական ծառայության պետի պաշտոնակատար Արգիշտի Քյարամյանի ներկայացրած հայտարարագրի տվյալների արժանահավատությունն ու ամբողջականությունը կարող է ստուգել միայն մայիսի 31-ից հետո, երբ ավարտվի տարեկան հայտարարագրերի ներկայացման ժամկետը: Այս մասին ‹‹Փաստինֆո››-ի հետ զրույցում ասաց Էթիկայի հանձնաժողովի անդամ Էդգար Շաթիրյանը:

Հիշեցնենք, որ ՊՎԾ պետի պաշտոնակատարի հայտարարգրում նշված է, որ նրա դրամական միջոցները կազմում են  32 մլն դրամ և 46 հազար ԱՄՆ դոլար: Նա հայտարարել էր, եթ գումարները իրեն նվիրել են  քեռին եւ արտերկրում գտնվող այլ բարեկամներ:

‹‹Փաստինֆո››-ի հարցին, թե արդյոք Բարձրաստիճան պաշտոնատար անձանց էթիկայի հանձնաժողովը կարող է ստուգել՝ Քյարամյանի խոսքերի արժանահավատությունը՝  Շաթիրյանն ասաց, որ  էթիկայի հանձնաժողովը կարող է վերլուծություններ, ուսումնասիրություններ կատարել միայն իր լիազորությունների շրջանակներում՝ իրեն հասու գործիքակազմի միջոցով, իսկ բանկային հաշիվներն ստուգելու իրավունք հանձնաժողովը չունի։

‹‹Օրենքում հստակ նշված է, որ բանկային գաղտնիք համարվող տեղեկություններին հանձնաժողովը հասանելություն չունի: Այս դեպքում պետք է պարզել՝ ով է փոխանցել, երբ և որքան, իսկ այդ լրազորությունը միայն իրավապահ մարմիններն ունեն››,-ասաց էթիկայի հանձնաժողովի անդամը:

Նա նշեց նաև, որ էթիկայի հանձնաժողովը հայտարարություննները ստուգել կարող է օրենքով  վերապահված շրջանակներում, օրինակ շարժական գույքը, անշարժ գույքը, արժեթղթերը հանձնաժողովին հասանելի են, բայց բանկային հաշիվները՝ ոչ:

‹‹Փաստինֆո››-ն փորձեց  ճշտել նաև՝ արդյո՞ղ էթիկայի հանձնաժողովը պատրաստվում է դիմել դատախազություն: Շաթիրյանն ասաց, որ  դատախազություն դիմելու հետ կապված օրենքը հստակ կառուցակարգեր է նախատեսում. եթե կան առերևույթ իրավախախտման հատկանիշներ, ապա կառուցվում է վարչական իրավախախտման վերաբերյալ գործի վարույթ: ‹‹Եթե հանձնաժողովը պարզում է, որ առկա են հայտարարագրման ենթակա տվյալներ թաքցնելու կամ կեղծ տվյալներ ստեղծելու առերևույթ հատկանիշներ, կասեցվում է վարույթը:Այնուհետև նյութերն ուղարկվում են դատախազություն››,-տեղեկացրեց Շաթիրյանը:

Հեղինակ` Սոնա Գեւորգյան