Փաստ ինֆո

Ոստիկանությունը ուսումնասիրությունների արդյունքում սպառնալիքի հատկանիշներ չի հայտնաբերել «Politik.am» կայքի գլխավոր խմբագիր Բորիս Մուրազիին հասցեին համացանցում կատարված գրառումներում։Այս մասին «Փաստինֆո»-ի գրավոր հարցմանն ի պատասխան հայտնեցին ՀՀ ոստիկանության կազմակերպված հանցվաորության դեմ պայքարի գլխավոր վարչությունից։

Հիշեցնենք, որ «Politik.am» կայքի գլխավոր խմբագիր Բորիս Մուրազին մարտի 20-ին հայտարարել էր իր եւ իր ընտանիքի անդամների նկատմամբ ճնշումների, ոստիկանության ֆեյսբուքյան «ֆեյքերի» կողմից հնչեցված սպառնալիքների մասին: Խմբագրի դիտարկամբ` սպառնալիքներն սկսվել են ոստիկանապետի մասին հրապարակումներից հետո` կատարվածը գնահատելով որպես ճնշում իր մասնագիտական գործունեության վրա: Մարտի 21 -ին ոստիկանությունը պաշտոնապես հայտարարեց, որ ահազանգի հետքերով ուսումնասիրություն են սկսել:

«Փաստինֆո»-ն գրավոր հարցմամբ դիմեց ՀՀ ոստիկանություն` խնդրելով պարզաբանել, թե ուսումնասիրությունն ինչ ընթացակարգով է իրականացվել, արդյոք իրեն ու իր ընտանիքի անդամներին սպառնալու մասին խմբագրի հայտարարությունները դիտարկվել են որպես հաղորդում հանցագործության մասին եւ նյութեր նախապատրաստվել ՀՀ քրեական դատավարության օրենսգրքի 180-րդ հոդվածով սահմանված կարգով: Եթե այո, ապա նյութերի նախապատրաստման արդյունքում հարուցվե՞լ է քրեական գործ, թե՞ ոչ` նկատի ունենալով, որ նյութերի նախապատրաստման համար սահմանված 10-օրյա ժամկետը լրացել է: Հարուցվելու դեպքում խնդրել էինք տեղեկացնել նաեւ թե որ հոդվածով է հարուցվել, իսկ եթե մերժվել է,ապա որ հիմքով:

ՀՀ ոստիկանության կազմակերպված հանցավորության դեմ պայքարի գլխավոր վարչության պետի ստորագրությամբ ստացված պատասխանում ասվում է, որ ոչ թե նյութեր են նախապատրաստվել, այլ ստուգումներ իրականացվել` «Ոստիկանության հրահանգով սպառնում են ինձ ու ընտանիքիս. Բորիս Մուրազի» վերտառությամբ politik.am կայքի հրապարակման կապակցությամբ` պարզելու «սպառնալիքի» առկայության կամ բացակայության հանգամանքը:

«Իրականացված ստուգումների ընթացքում պարզվել է, որ ՀՀ ոստիկանության պետի հանձնարարությամբ հասարակայնության հետ կապի եւ լրատվության վարչության պետը հեռախոսազանգով կապ է հաստատել Բ.Մուրազիի հետ եւ առաջարկել նրան ՀՀ ոստիկանության ԿՀԴՊ գլխավոր վարչությունում հաղորդում ներկայացնել իր նշած սպառնալիքի մասին, այնուհետեւ նույն առաջարկը կրկնվել է հրապարակավ՝ ՀՀ ոստիկանության «www.police.am» պաշտոնական կայքի միջոցով, սակայն վերջինս հաղորդում չի ներկայացրել։

Ստուգումների շրջանակներում ուսումնասիրվել ինչպես վերը նշված թեմայի շուրջ համացանցում առկա հրապարակումները, այնպես էլ՝ դրանց կապակցությամբ տարբեր օգտատերերի կողմից համացանցում կատարված մեկնաբանությունները, որոնց արդյունքում ՀՀ քրեական օրենսգրքի 137-րդ հոդվածով նախատեսված առերևույթ հանցագործության՝«սպանության,առողջությանը դիտավորությամբ ծանր վնաս պատճառելու կամ գույք ոնչնացնելու սպառնալիքի» հատկանիշներ չեն հայտնաբերվել։

Արարքը կարող է որակվել ՀՀ քրեական օրենսգրքի 137-րդ հոդվածով, եթե առկա է սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքն իրականացնելու իրական վտանգ, ինչը սակայն, ըստ ստուգողական գործողությունների, բացակայում է տվյալ դեպքում»,- նշված գրավոր պատասխանում։

Այսպիսով՝ փաստվում է, որ լրագրողին սպառնալու մամուլի հարապարակումները չեն դիտարկվել որպես հանցագործության մասին հաղորդում, թեեւ ՀՀ քրեական դատավարության օրենսգրքի 176-րդ հոդվածի 2-րդ մասի համաձայն քրեական գործ հարուցելու առիթ են հանդիսանում նաեւ մամուլի հրապարակումները, երկրորդ՝ նյութեր չեն նախապատրաստվել՝ ՀՀ քրեական դատավարության օրենսգրքի 180-րդ հոդվածով սահմանված կարգով, որի պարագայում անհրաժեշտ կլիներ որոշում կայացնել քրեական գործի հարուցումը մերժելու մասին, ինչը թույլ կտար կողմին վիճարկել այն, երրորդ՝ ստուգումն իրականացրել է այն մարմինը, որի ենթակայության տակ գտնվող ենթադրյալ ֆեյքերը սպառնացել են լրագրողին։

Հեղինակ` Գեւորգ Մողրովյան