Փաստ ինֆո

Մեր տոնացույցի նորագույն՝ Քաղաքացու տոնին հետաքրքիր է քննախույզ հայացքով վերլուծել, թե անցած մեկ տարվա ընթացքում դիվանագիտական հարթության մեջ ի՞նչ ձեռքբերումներ է արձանագրել հետհեղափոխական Հայաստանի Հանրապետությունը:

Այս հարցը քաղաքական գործիչ, «Ակունք» քաղաքական վերլուծությունների կենտրոնի տնօրեն Ռուբեն Հակոբյանը առաջին հերթին դիտարկում է Արցախի խնդրի լուծման համատեքստում և այն համոզման է, որ վերջին մեկ տարվա ընթացքում մեր դիվանագիտությունը ոչ շահեկան վիճակում է հայտնվել: «Իհարկե, բարդագույն հարց է, որևէ մեկը թող գլուխ չգովի, պատրաստի դեղատոմս չկա: Խնդիրը դիվանագիտական հարթության մեջ է, բայց այս մեկ տարվա ընթացքում, ցավոք, մեր դիվանագիտությունը վակուումի մեջ է: Երբեք մենք այսքան մեկուսացված չենք եղել: Միաժամանակ, այս ընթացքում ոչ մի բարեկամ չենք կարողացել ձեռք բերել: Հեղափոխությունը ծափահարողներ եղան և… ընդամենը»:

Ըստ Մինսկի խմբի՝առաջ Ադրբեջանն էր ապակառուցողական դաշտում, հիմա՝ մենք Ռուբեն Հակոբյանի ներկայացմամբ՝ «Մինսկի խումբը միշտ գտել է, որ Ադրբեջանն ապակառուցողական կեցվածք ունի: Եվ Ադրբեջանը միշտ այդ խումբը լուծարելու և կամ՝ վերջինիս կազմում Թուրքիային ընդգրկելու հարց էր բարձրացնում: Այս վերջին մեկ տարվա ընթացքում, եթե ուշադրություն դարձնենք եռանախագահողների հայտարարություններին, ապա ակնհայտ է Մինսկի խումբ-Ադրբեջան հարաբերությունների մեջ դրական մոտիվացիաները:

Օրինակ վերջին անգամ Ադրբեջանում լինելով եռանախագահները գոհունակություն հայտնեցին Ալիևի և արտգործնախարարի զրույցից, իսկ Ադրբեջանը, որը միշտ մերժողաբար էր տրամադրված, հիմա սկսել է հայտարարել, թե՝ միայն Մինսկի խմբով պիտի Արցախի հարցը լուծվի: Ինչ վերաբերվում է Հայաստանին, ապա այսօր մենք ենք մի տեսակ հայտնվել ապակառուցողական դաշտում»:

Այս առումով նա հիշեցնում է Մինսկի խմբի կեցվածքը՝ ի պատասխան ՀՀ վարչապետ Նիկոլ Փաշինյանի Արցախը բանակցային գործընթաց վերադարձնելու անհրաժեշտության, շատ կոպիտ պատասխանեցին, մոտավորապես այս հանգի՝ եթե մեզ վրա եք հույսներդ դրել, իզուր: «Արցախը կարող է ընդգրկվել բանակցային գործընթացում, եթե երկու կողմերը՝ Հայաստանը և Ադրբեջանը համաձայնեն: Իհարկե, վատ չէր, որ Փաշինյանն այդ հարցը բարձրացրեց, բայց եթե այն միշտ հայտարարության մակարդակում է մնում, արդեն մի քիչ ծիծաղելի է դառնում»:

ՀԱՊԿ գլխավոր քարտուղարի տեղը կորցնելը լուրջ կորուստ էր

Այս մեկ տարվա ընթացքում մենք մեկուսացվեցինք և կորցրեցինք մեր բարեկամներին ՝ հայտարարում է Ռուբեն Հակոբյանը՝անդրադառնալով ՀԱՊԿ-ի և ԵԱՏՄ-ի հետ ՀՀ հարաբերություններին: Նրա համոզմամբ՝ ,,այս երկու կարևոր կառույցների շրջանակում մենք դաշնակիցների կորուստնր ունեցանք: Բնականաբար, տարածաշրջանային առումով ԵԱՏՄ, ՀԱՊԿ այս երկու կառույցներն են, որ խարսխային նշանակություն ունեն մեզ համար: ՀԱՊԿ-ի գլխավոր քարտուղարի՝ քվոտայով մեզ վերապահված տեղը կորցնելը ոչ միայն մեզ համար շատ լուրջ կորուստ էր, այլև՝ ՀԱՊԿի հանդեպ նման վերաբերմունքն անընդունելի էր:

Ռ. Հակոբյանի կարծիքով՝ նոր իշխանության հայտարարությունը՝ ՀԱՊԿ ռազմական կառույցը իբր հանցագործի կողմից ղեկավարվելու վերաբերյալ, ուղղակի ապտակ էր և ՌԴ-ի և ՀԱՊԿ-ի անդամ պետությունների համար: Փաստն այն է, որ ՀԱՊԿ գլխավոր քարտուղարի մեր տեղը կորցրինք, այն մեր ձեռքից առան և եթե չեմ սխալվում, նոր նշանակվողի համար էլ ասացին՝ ինչ երաշխիք, որ մի նոր հանցագործի չեք նշանակի: Այսինքն, մենք ՀԱՊԿ-ը կորցրեցինք, իսկ Արցախի անվտանգության մասին խոսելիս, որպես անվտանգության երաշխավոր՝ ՀԱՊԿ-ին առաջնային նշանակություն տալը մեր պետության ընտրությունն ու կամքն է եղել:

Աղբյուր` Փաստինֆո