Փաստ ինֆո

«Քաղաքացիաիրավական վեճի վերաբերյալ քրեական գործ է հարուցվել, մինչդեռ մեր Վճռաբեկ դատարանը բազմաթիվ դիրքորոշումներ ունի՝ այն մասին, որ նման վեճերի արդյունքում գործ հարուցելը անթույլատրելի է»,-«Փաստինֆո»-ի հետ զրույցում այս մասին հայտարարել է փաստաբան Կարեն Բատիկյանը։

Վերջինս ներկայացնում է գործարար, կինոպրոդյուսերի շահերը, ով մեղադրվում է «Հայբիզնեսբանկ»-ի սեփականատեր Վիտալի Գրիգորյանցից առանձնապես խոշոր չափի՝ 20.203.565.650 ՀՀ դրամին համարժեք 49.045.000 ԱՄՆ դոլարի հափշտակություն կատարելու մեջ: Նրան մեղադրանք է առաջադրվել ՀՀ ՔՕ-ի 178-րդ հոդվածի 3-րդ մասի 1-ին կետով, սակայն իրեն մեղավոր չի ճանաչում՝ պնդելով, որ մեղադրանքը ուռճացված է եւ հիմնավոր չէ։

Ինչպես արդեն նշել ենք մեղադրյալը «Հայբիզնեսբանկ»-ի սեփականատեր Վիտալի Գրիգորյանցի նախկին գործընկերն է, ում վստահությանն արժանանալով՝ ժամանակին նշանակվել է Գրիգորյանցին պատկանող ԱՄՆ-ում գործող ընկերության տնօրեն։ Ըստ մեղադրանքի՝ Ֆիլմարտադրության շուկա մուտք գործելու համար Գրիգորյանցին առաջարկել է մի ընկերություն, որը փաստացի պատկանել է իրեն, սակայն որպես հիմնադիր-տնօրեն ներկայացրել է գոյություն չունեցող այլ անձի տվյալներ։ Սակայն նրա պաշտպան Կարեն Բատիկյանի խոսքով՝ գործում բավարար տեղեկություններ կան այդ «գոյություն չունեցող անձ»-ի իրական լինելու մասին. «Այդ մարդը գոյություն ունի, նա ԱՄՆ քաղաքացի է, եւ նրա հաշվեհամարին գումար է փոխանցվել, այսինքն՝ քրեական գործով այդ տեղեկությունը խեղաթյուրված է, ինչը, ես չեմ կարող ասել, միտումնավոր է արվել թե վրիպել է նախաքննական մարմնի աչքից»,-ասում է նա եւ հավելում. «Գործով անցնող բոլոր մարդիկ ԱՄՆ քաղաքացիներ են, եւ ինչ տեղի է ունեցել, տեղի է ունեցել ԱՄՆ-ում, հետեւաբար՝ այս գործը ընդհանրապես այստեղ չպետք է քննվեր»։

«Հայբիզնեսբանկ»-ի սեփականատեր Վիտալի Գրիգորյանցին սպանելու համար քիլլեր ենթադրյալ փնտրողը նրա նախկին գործընկերն է

Պաշտպանի խոսքով՝ եթե գումարը վերցվեր, բայց ֆիլմ չարտադրվեր, քննարկման առարկան այլ կլիներ, բայց այս պարագայում գումարը փոխանցվել է, ֆիլմն՝ արտադրվել. «Խոսքը վերաբերում է համաշխարհային ճանաչում ստացած 14 ֆիլմերի մասին, որոնցից կարող եմ նշել, օրինակ, «Փախուստ բանտից»-ը։ Եթե նայեք, կտեսնեք, որ իմ պաշտպանյալը նշվում է որպես ֆիլմի պրոդյուսեր»։

Մեր դիտարկմանը, թե ըստ մեղադրանքը՝ նա ոչ թե ամբողջ գումարն է հափշտակել, այլ մի մասը ներդրել է ֆիլմարտադրության ոլորտում, մյուսը՝ յուրացրել, Բատիկյանն արձագանքեց՝ ասելով. «Խնդիրն այն է, որ կոնկրետ ֆիլմի եկամուտը պակաս է եղել ծախսված գումարից, ինչի պատճառով մեր դատավարական հակառակորդը իմ պաշտպանյալից պահանջել է մնացած շահույթը փոխհատուցել. «Ֆիլմարտադրությունը կարգավորվել է պայմանագրով. ամեն ֆիլմի համար պայմանագիր է կնքվել, որոնցով այնքան մանր հարցեր են լուծվել, օրինակ՝ գումարների բաշխումը կամ այն, թե դա որ կազմակերպությունը պետք է վերահսկի, իսկ այդ կազմակերպություններից ոչ մեկը ներգրավված չէ, եւ գործով չի հարցաքննվել։ Իմ պաշտպանյալը գործով միակ մեղադրյալն է, եւ մեղադրվում է տուժողի եւ նրա 4-5 ընկերների ցուցմունքների հիման վրա»,-ասում է Բատիկյանը։

Ի վերջո գույքային վեճ եղել է կողմերի միջեւ թե ոչ, նա չգիտի. «Առերեւույթ գոյություն ունի, բայց ես չգիտեմ՝ կա թե չկա, պայմանագիրը իմ պաշտպանյալի հետ չի կապվել, կապվել է այլ անձի հետ, որը քրեական գործով հարցաքննված չէ, քրեական գործը քննող անձը կոնկրետ տեղեկություններ չի ներառել մեղադրանքի որոշման մեջ»։

Փորձել են քիլլեր վարձել` «Հայբիզնեսբանկ»-ի սեփականատիրոջը եւ նույն բանկի խորհրդի նախագահի սպանելու համար

«Փաստինֆո»-ի այն հարցին, թե այս պարագայում իր պաշտպանյալը որեւէ շարժառիթ տեսնո՞ւմ է, որն է հանիրավի, ինչպես նա է ասում, մեղադրանք առաջադրելու պատճառը՝ Բատիկյանը պատասխանեց, որ ԱՄՆ-ի Մալիբու քաղաքում մի հողատարածք կա, որի բաժնետեր է նաեւ իր պաշտպանյալը, եւ այն վիճելի տարածք է. «Դրա վերաբերյալ ԱՄՆ-ում հիմա քաղաքացիական դատավարության կարգով գործ է ընթանում, ու ըստ իմ պաշտպանյալի ներկայացրած հանգամանքների՝ այս ամենը կատարվում է նրա համար, որ իր վրա ճնշում գործադրեն, հողը իր ձեռքից խլեն»։ Թե ով է հողատարածքի մյուս բաժնետերը, Բատիկյանը պաշտոնական տեղեկություն չունի։

Նշենք, որ այս քրեական գործը հարուցվել է 2017 թվականի հոկտեմբերին, պաշտպանյալի խոսքով՝ հաղորդումը տալուց անմիջապես հետո. «Ընդ որում, քրեական գործի հարուցման որոշումը ամբողջովին արտատպված է հանցագործության մասին հաղորդումից»,-ասում է նա։

Հավելենք, որ հիշյալ մեղադրյալն այս պահին կալանավորված է։ Պաշտպանական կողմը բողոք է ներկայացրել Վերաքննիչ դատարան՝ ընդհանուր իրավասության դատարանի` մեղադրյալին կալանավորելու որոշման դեմ։

Հեղինակ` Միլենա Խաչիկյան