Փաստ ինֆո

Վարչապետ Նիկոլ Փաշինյանը ներկա է գտնվել Ազգային անվտանգության անվտանգության ծառայության սահմանապահ զորքերի օրվա կապակացությամբ կազմակերպված միջոցառմանը:

Իր խոսքում վարչապետ  Փաշինյանը, մասնավորապես, նշել է.

«Հայաստանի Հանրապետության ազգային անվտանգության ծառայության սահմանապահ զորքերի հարգելի՛ ծառայողներ, պետակա՛ն այրեր,

թույլ տվեք նախ բոլորիս շնորհավորել այսօրվա տոնի՝ Սահմանապահի օրվա կապակցությամբ: Սահմանը, ընդհանրապես, ամենախորհրդավոր երևույթներից մեկն է, որ կարող է գոյություն ունենալ կամ գոյություն ունի: Ընդամենը մի գիծ, որից այն կողմ, թեկուզ մեկ մետր այն կողմ զգում ես տնից հեռու և որից ընդամենը մեկ սանտիմետր այս կողմ զգում ես ինչպես տանը: Հայաստանի Հանրապետություն ասելով՝ առաջին հերթին մենք նկատի ունենք մեր սահմանները, որովհետև այդ սահմաններով է տեղորոշվում մեր տեղը երկիր մոլորակի վրա, մեր տեղն արևի տակ, մեր ապագան և անցյալի մասին մեր պատկերացումը:

Եվ ուրեմն սահմանապահ ծառայությունը, Սահմանապահի օրն այս առումով ունի չափազանց կարևոր նշանակություն: Այսօր մենք նշում ենք Սահմանապահի օրը՝ նկատի ունենալով առաջին հերթին Ազգային անվտանգության ծառայությանը, առաջին հերթին Ազգային անվտանգության ծառայության սահմանապահ զորքերին: Բայց ուզում եմ ընդգծել, որ մեզ հայտնի հանգամանքների բերումով այսօր սահմանապահ լինելը ոչ միայն աշխատանքային կոչում է, այլև առաքելություն: Եվ այդ առաքելությունն այսօր պատվով կատարում են, այո՛,  Սահմանապահ զորքերի ծառայողները, այսօր այդ առաքելությունը պատվով կատարում են Հայաստանի Հանրապետության զինված ուժերի ծառայողները, այսօր այդ առաքելությունը կատարում են Ոստիկանության զորքերի ծառայողները: Այսօր Հայաստանի Հանրապետությունում առնվազն դե ֆակտո գոյություն ունի այնպիսի հասկացություն, ինչպիսին է սահմանապահ գյուղ կամ սահմանապահ բնակավայր: Եվ այս առումով, այս տոնը՝ Սահմանապահի օրը, տոն է ոչ միայն Ազգային անվտանգության ծառայության սահմանապահ զորքերի, այլև մեր զինված ուժերի համար, մեր ժողովրդի համար, որովհետև մեզնից յուրաքանչյուրը՝ անկախ նրանից Երևանում է աշխատում, թե Հայաստանի Հանրապետության սահմանի որևէ ուղեկալում կամ տարածքում, առաջին հերթին մտածում է սահմանի մասին, որովհետև սահմանի անվտանգությունը մեր երկրի անվտանգությունն է, մեր ապագայի անվտանգությունն է, մեր երեխաների անվտանգությունն է:

Ուզում եմ շնորհակալություն հայտնել ձեզ՝ ձեր կատարած ծառայության համար:  Ես ուզում եմ շնորհակալություն հայտնել Հայաստանի Հանրապետության զինված ուժերին՝ Հայաստանի Հանրապետության սահմանի իրենց վստահված հատվածի պաշտպանության համար: Ես ուզում եմ շնորհակալություն հայտնել Ոստիկանության զորքերի ծառայողներին՝ իրենց վստահված սահմանի պահպանության համար: Ես ուզում եմ շնորհակալություն հայտնել Ռուսաստանի Դաշնության սահմանապահ զորքերին՝ Հայաստանի Հանրապետության պետական սահմանի իրենց վստահված հատվածի պահպանության համար: Ես ուզում եմ շնորհակալություն հայտնել սահմանապահ գյուղերի բնակիչներին՝ իրենց սահմանը պահպանելու, ապրեցնելու և իրենց սահմանն ամուր պահելու համար:

 Եվ ուրեմն, շնորհավորում եմ Հայաստանի Հանրապետության Սահմանապահի օրը»:

 Այնուհետև, ԱԱԾ սահմանապահ զորքերի զինծառայողները հանդես են եկել տոնական շքերթով և ցուցադրական հնարքներով: Վարչապետ Փաշինյանը ԱԱԾ տնօրեն Արթուր Վանեցյանի ուղեկցությամբ այցելել է Սահմանապահ զորքերի վարչական շենք, ծանոթացել տեխնիկական հագեցվածությանը, ուսումնական կենտրոնի գործունեությանը: Վարչապետին են ներկայացվել նաև սահմանապահ զորքերի տեխնիկական միջոցներն ու դրանց հնարավորությունները:    

Աղբյուր` Փաստինֆո