Փաստ ինֆո

«Մեղադրանքը, որ առաջադրվել է Դավիթ Սանասարյանին, ամբողջությամբ հիմնավորված է՝ կատարված  հարցաքննություններով եւ առերեսումներով»,-այսօր այս մասին հայտարարեց ԱԱԾ տնօրեն Արթուր Վանեցյանը՝ հավելելով. «Չխախտելով անմեղության կանխավարկածը՝ հորդորում եմ բոլորին մի քիչ համբերել. երբ գործը կուղարկվի դատարան, հանրությունը հնարավորություն կունենա ծանոթանալ այն ապացույցների հետ, որոնք ձեռք են բերվել քրեական գործի նախաքննության ընթացքում, եւ կգնահատի դրանց իսկությունը»։

Անդրադառնալով գործով կալանավորված եւ երեկ ազատ արձակված մեղադրյալ Սամվել Ադյանին՝ Արթուր Վանեցյանը հիշեցրեց, որ ԱԱԾ քննչական դեպարտամենտի քննիչը եւ հսկող դատախազը Վերաքննիչ դատարանում բողոքարկել են Ադյանի կալանավորումը երկարացնելու միջնորդության մերժման մասին դատարանի որոշումը, իսկ մյուս երկուսի՝ Գ. Խաչատրյանի եւ Տ. Ավետիսյանի ազատ արձակվելու մասով ԱԱԾ տնօրենն ասաց. «Եթե նպատակահարմար են գտել ազատ արձակել, ուրեմն՝ այդպես է։ Եթե մենք թույլ տանք որեւէ խախտում, հավատացած եղեք, որ Դատախազությունը համապատասխան կերպ կարձագանքի»։

Արթուր Վանեցյանի խոսքով՝ հարուցված քրեական գործն ու Սանասարյանին մեղարդանք առաջադրելը մեծ աղմուկ են ստացել, բայց պետք չէ շարունակ շահարկել թեման. «Ես՝ որպես ԱԱԾ տնօրեն, պարտավոր եմ իրականացնել օրենքով վերապահված իմ լիազորությունները՝ անկախ նրանից մեղադրվողը կլինի իմ ազգականը, բարեկամը, զինակիցը թե ընկերը. եթե խախտել է օրենքը, պետք է պատասխան տա»։

ԱԱԾ տնօրենը վստահեցնում է՝ եթե նախաքննության ընթացքում ԱԱԾ աշխատակիցները թույլ կտան անօրինականություններ, նրանք եւս կպատժվեն, եւ նրանց պատիժը կլինի ավելի խիստ։

Լրագրողների այն հարցին,  թե ինչու է Սանասարյանի վերաբերյալ քրեական գործը քննվում ԱԱԾ-ում, ոչ թե ՀՔԾ-ում, Արթուր Վանեցյանը պատասխանեց. «Երբ քրեական գործը հարուցվել է, ոչ թե Սանասարյանին է մեղադրանք առաջադրվել, այլ հարուցվել է «Զորաշեն» ՍՊԸ-ի կողմից իրականացված անօրինականությունների վերաբերյալ տեղեկություններ ստանալու հիման վրա, իսկ այդ ժամանակ  այդ քրեական գործով անցնող անձը ՀՔԾ-ի սուբյեկտ չի հանդիսացել»։

Արթուր Վանեցյանը խնդիր չի տեսնում գործը ՀՔԾ տեղափոխելու մեջ. «Ես կասկած չունեմ, որ մեր քննիչները աշխատում են օրենքի սահմաններում, բայց եթե կան նման կասկածներ, եւ Գլխավոր դատախազը նման որոշում կկայացնի, ես ոչ մի խնդիր չեմ տեսնում»,-ասաց նա։

ԱԱԾ տնօրենը խոսեց նաեւ արտասահմանում գտնվող ՊՆ նախկին նախարարից եւ ԴԱՀԿ նախկին պետից. «Ես չեմ կարծում, թե ԴԱՀԿ նախկին պետը տիրապետում է այնպիսի տեղեկությունները, որոնք կարող է սպառնալ ՀՀ անվտանգությանը, իսկ ՊՆ նախարարի մասով, իհհարկե, որոշ խնդիրներ տեսնում եմ, բայց պարոն վարչապետը արդեն մեկնաբանեց այդ ամենը. զինված ուժերը անընդհատ փոխվում են նման արտահոսքից խուսափելու համար»։

Աղբյուր` Փաստինֆո