Փաստ ինֆո

Մենք որևէ մեկին արտոնյալ պայմաններ չենք տալիս և այլևս որևէ խուց չկա, որը չի խուզարկվում: Այս մասին այսօր լրագրողների հետ զրույցում ասաց Արդարադատության նախարար Արտակ Զեյնալյանը:

««Զոն» նայողների արտոնություններ»-ը, որոնք եղել են նախկին իշխանությունների ժամանակ, վերացել են, այսինքն չկա խուց, որը չի խուզարկվում, չկա այնպիսի անձ, որից արգելված իր չի բռնագրավվում»,-ասաց Զեյնալյանը:
Նա նշեց, որ իրենց իշխանության գալը արտոնությունների դարաշրջանի ավարտն է եղել:

«Նախկինում դուռ բաց պահելու վճարն էր անօրինական, ներսում գումարի շարժը վերացրել ենք»,-ասաց նախարարը:

Խոսելով բանտարկյալների խաղերի մասին, Զենյալյանն ասաց. «Կարող են խաղալ օրինական, թույլատրելի խաղեր. օրինակ շաշկի: Սեղանի խաղերով կարող են նաև ղումար խաղալ, և ոչ թե առձեռն գումարներ են պտտվում այդտեղ, այլ կարող են գրանցվել: Եվ սա վերացնելու համար նախ պետք է վերացնել «օբշյակ» հասկացությունը»,-ասաց Զենյալյանը:

Նա նշեց, որ դրսի պատուհանից, այսպես կոչված կոնով, փոխանցումները վերացնելու համար կամ պետք է ճաղավանդակները փոքրացնել, ինչը կհանգեցնի իրավունքների խախտման, կամ պետք է զրահապատ պատուհաններ տեղադրվեն և ներքին օդափոխության համակարգ լինի, ինչը կարժենա 800մլն դրամ:

«Այդ ամբողջը վերահսկել այն աշխատակազմով, որը մենք այսօր ունենք հնարավոր չէ, և նաև պետք է օրենսդրորեն արգելք դրվի, իսկ դատապարտյալների կողմից միմյանց իրեր փոխանցելու օրենսդրական արգելք չկա : Մարդիկ կարող են դրսից ներս և ներսից դուրս փոխանցել չարգելված իրեր»,-ասաց նախարարը:

Նրա խոսքով, իրերի արգելված լինել-չլինելը ստուգելու համար պետությունը միջոցներ չունի:

Զենյալյանը տեղեկացրեց նաև, որ օպտիմալացման աշխատանքներ են իրականացվում և նախատեսվում է փակել երկու քրեակատարողական հիմնարկ:

«Քրեակատարողական հիմնարկների արտաքին պահակակետերն էլ փոխարինելու ենք էլեկտրոնային հսկողության մեխանիզմներով, որպեսզի այդ հաստիքները կարողանանք վերախմբավորել և տանել ներս՝ ներքին անվտանգությունը ապահովելու համար»,-ասաց արդարադատության նախարարը:

Աղբյուր` Փաստինֆո