Փաստ ինֆո

Սահմանների բացում նշանակում է Հայաստանի կործանում, դա մի պատ է, որը մեզ պաշտպանում է: Այս նման հայտարարությամբ է հանդես եկել քաղաքագետ Հայկ Մարտիրոսյանը:

Նրա գնահատմամբ՝ սահմանների բացումն անընդունելի է և պետք է հիշել, որ արևմտյան կողմում Սահարայի անապատ կա:

Խոսելով Արցախի հարցի լուծման մասին, քաղաքագետն ասաց. ‹‹Ժամանակն է՝ սթափվենք, հասկանանք՝ ինչ է նշանակում Արցախի հարցը լուծել, իսկ ի՞նչ հարց կա Արցախում, որ լուծենք: Ուզում ենք, որ պարտված թշնամին, ով պարբերաբար հարձակվում է, ճանաչի մեր հաղթանակը և դրա դիմաց ստանա հաղթանակից մի բա՞ն››:

Նրա խոսքով, հարցը լուծված է Հայաստանի համար և ժամանակն է, որ Հայաստանը ունենա տարածքային պահանջներ, քանի որ իրեն հարգող պետությունը պետք է ունենա այդ պահանջը, իսկ Հայաստանը առայժմ իրեն չի հարգում:

‹‹Ենթադրենք Ադրբեջանը ճանաչեց Արցախի անկախությունը, հետո մենք ինչի՞ հույս ունենք, որ ադրբեջանցիների հետ եղբայրություն ենք անելու, աղջիկ ենք տալու, գնալու ենք առևտուր անենք Բաքվի շուկայում, հանգստանալու ենք Կասպից ծովի ափին, իրենք են գալու ներդրումներ անելու, ի՞նչ ենք ակնկալում: Լավ այդ աստիճանի հիմարության մեջ թաթախված և համոզված կարելի՞ է լինել, ապշեցուցիչ բաներ կան, որ միայն Հայաստանում են անում››,-ասաց Մարտիրոսյանը:

Նա նշեց՝ վստահ է, որ այս մտածելակերպի հիմնական պատասխանատու ՀՀ առաջին նախագահ Լևոն Տեր-Պետրոսյանն է :

‹‹Այս գաղափարախոսությունը Տեր-Պետրոսյանը վերարտադրել է ի դեմս Ռոբերտ Քոչարյանի և Սերժ Սարգսյանի, ու սերունդների գիտակցության մեջ մեխել թեզեր, որոնք անհեթեթության գագթնակետն են››,-ասաց քաղաքագետը:
Նա անդրադարձ կատարեց նաև երեկ Ծիծեռնակաբերդի հուշահամալիրում Արտաքին գործերի նախարար Զոհրաբ Մնացականյանի այն հայտարարությանը, որում ասվում է՝ Հայաստանը առանց նախապայմանների պատրաստ է Թուրքիայի հետ բանակցությունների:

‹‹Իսկ ինչու՞ առանց նախապայմանների, բա արժանապատվությունը որտե՞ղ է, դուք կարդու՞մ եք Թուրքիայի նախագահի ‹‹twitter››-ի գրառումները: Լավ, առաջ էինք անարժանապատիվ, բա հիմա է՞լ ենք անարժանապատիվ››,-ասաց Մարտիրոսյանը:

Քաղաքագետը բնորոշմամբ՝ կառավարությունից արժանապատիվ հայտարարություններ են անում վարչապետն ու պաշտպանության նախարարը, բայց ամենակարևորը արտաքին գործերի նախարարն է, ով «աշխարհի ամենազգուշավոր արտաքին գործերի նախարարն է››։
Նրա խոսքով, վտանգավոր թեզ է դրվում շրջանառության մեջ, ըստ որի պահանջատիրություն պետք չէ ունենալ, պետք է աշխատել, որպեսզի Հայաստանը հզորանա, մեզ հետ հաշվի նստեն և միայն մեր հզորանալու պարագայում կարող ենք պահանջատեր լինել:

‹‹Նախ մենք դրա ժամանակը չունենք, կա՞ արդյոք մի միամիտ, որ կարծում է՝ ՀՀ-ն կարող է այնքան հզորանալ, որ Թուրքիան Հայաստանի հետ հաշվի նստի: Նման բան անհնար է անգամ 200 տարի հետո, եթե Թուրքիան ինքը չփլուզվի››,-ասաց Մարտիրոսյանը:

Հեղինակ` Սոնա Գեւորգյան