Փաստ ինֆո

«ՊՎԾ պետի  պաշտոնում ժամանակավոր պաշտոնակատար դեռեւս ես չեմ, վարչապետը նման որոշում չի կայացրել»,-այսօր այս մասին լրագրողների հետ զրույցում ասել է Դավիթ Սանասարյանի տեղակալ Արգիշտի Քարամյանը՝ միաժամանակ չբացառելով, որ հնարավոր է՝ ինքը ժամանակավորապես փոխարինի Սանասարյանին. «Վարչապետն ինչպես որոշի, այդպես էլ կլինի, ես դա չեմ բացառում»,-ասել է նա։

Անդրադառնալով Դավիթ Սանասարյանին առաջադրված մեղադրանքին՝ Քարամյանն ասել է, որ կա քրեական պրոցես, եւ ինքը, լինելով իրավաբան, իրեն թույլ չի տա դրան որեւէ գնահատական տալ. «Ես ինքս ծանոթ չեմ գործի նյութերին, միայն կուզեմ ասել, որ կարճ ժամանակ է, ինչ ճանաչում եմ Սանասարյանին, բայց կարծում եմ, որ նա հայրենասիրական բացառիկ դրսեւորումներ ցուցաբերած եւ արդարության, անաչառության տեսանկյունից բացառիկ որակներ ունեցող անձնավորություն է»,-նշել է նա։

Խոսելով ՊՎԾ ներկայիս մթնոլորտի մասին՝ Քարամյանն ասել է, որ այն բավականին աշխատանքային է. «Կան ծրագրեր, որ սկսվել են Սանասարյանի անմիջական մասնակցությամբ, եւ այսօր, փառք Աստծո, հասցնում ենք իրենց տրամաբանական ավարտին։ Դրանք ուսումնասիրություններ են, օրինակ, Քրեակատարողական հիմնարկում, Բժշկակական համալսարանում»։

Լրագրողների՝ իր ունեցվածքի վերաբերյալ հարցերին Քարամյանը չցանկացավ պատասխանել՝ կոռեկտ չհամարելով դրա մասին խոսել. «Ես պաշտոնապես հայտարարում եմ, որ որեւէ կլանային կամ կոռուպցիոն համակարգում չեմ եղել եւ բիզնեսով չեմ զբաղվել»։

Ինչ վերաբերում է ՊՎԾ աշխատակից Սամվել Ադյանի լիազորությունները դադարեցնելուն, Արգիշտի Քարամյանի խոսքով՝ երբ կա քրեական գործ, որպես կանոն ծառայողական քննությունները կասեցվում են. «Մյուս կողմից ես չեմ բացառում նաեւ, որ Ադյանը, հաշվի առնելով, որ չի կարողանում ներգրավված լինել ծառայողական պարտականությունների կատարման մեջ, միգուցե դիմում գրի»։

Քարամյանը փոխանցեց նաեւ, որ իրենք՝ աշխատակիցները, մեծ հույս ունեն, որ Դավիթ Սանասարյանը կվերադառնա եւ կշարունակի ղեկավարել կառույցը։

Աղբյուր` Փաստինֆո