Փաստ ինֆո

Նախկինում դեսպանատներ ենք ունեցել, որ համարյա պետական ֆինանսավորում չեն ունեցել: Այս մասին, այսօր՝ ապրիլի 25-ին, կառավարության նիստում հայտարարեց ՀՀ վարչապետ Նիկոլ Փաշինյանը՝ նշելով, որ նման բան հիշում է խորհրդարանական քննարկումներից։

«Կամ այդպիսի կամ դրան մոտ իրավիճակներ եղել են»,-ասաց վարչապետը, ինչը հաստատեց ԱԳ նախարար Զոհրաբ Մնացականյանը:

«Տպավորություն է ստեղծվում, որ երբեմն եղել են իրավիճակներ, երբ գոյություն են ունեցել սեփական դեսպանատներ, որտեղ նույնիսկ գույքը եւ ամեն ինչը պատկանում է կոնկրետ մարդու: Բայց նրանք հանդես են գալիս պետության անունից: Սա տարօրինակ վիճակ է, անկախ նրանից, թե ով է դեսպանը: Բազմաթիվ հարցեր են ծագում եւ այդ հարցերի պատասխաններ գտնելը օրակարգային է այսօրվա Հայաստանի համար»,-ընդգծեց Փաշինյանը:

Նշենք, որ այսօր կառավարությունը որոշեց կառավարության պահուստային ֆոնդից ԱԳՆ-ին 2019 թվականի համար հատկացնել 347,5 մլն դրամ (շուրջ 714 հազար դոլար)՝ օտարերկրյա պետություններում հավատարմագրված ՀՀ դիվանագիտական ծառայության մարմինների գործունեության ապահովման նպատակով:

Պարզվում է նախկինում արտերկրում մի շարք ՀՀ դիվանագիտական ներկայացուցչությունների ղեկավարների պաշտոնում կատարվել են նշանակումներ, որոնք ԱԳՆ համակարգից չէին։ Նրանցից մի մասը՝ մասնավորապես Վատիկանում, Ժնեւում եւ Լոնդոնում ՀՀ դիվանագիտական, Լիոնում եւ Լոս Անջելեսում ՀՀ գլխավոր հյուպատոսական ներկայացուցչությունների ղեկավարները իրենց առաջարկությամբ հրաժարվել էին հասանելիք աշխատավարձերից, ընտանիքի անդամներին փոխհատուցման գումարներից, բնակարանների վարձավճարներից, բժշկական ապահովագրությունից եւ ներկայացուցչական այլ ծախսերից:

Աղբյուր` Փաստինֆո