Փաստ ինֆո

Ներկրվող ցեմենտի համար պետտուրք սահմանելու նախագծի քննարկումներին կմասնակցեն բոլոր շահագրգիռ կողմերն ու մասնագետները: ԱԺ-ում տեղի ունեցած ճեպազրույցում այսօր ասել է տնտեսական հարցերի մշտական հանձնաժողովի նախագահ Բաբկեն Թունյանը՝ նշելով, որ քննարկումներին կհրավիրվեն նաեւ «ԱրարատՑեմենտ»-ից ներկայացուցիչներ։

«Նրանց հետ սերտ համագործակցություն եմ ակնկալում: Շուկայի գլխավոր խաղացողներն իրենք են և եթե չմասնակցեն, նշանակում է քննարկումն արդյունավետ չի լինի», - ասաց Բաբկեն Թունյանը՝ կարևորելով տեղական արտադրողին պաշտպանված և մրցունակ տեսնելը:
ԱԺ տնտեսական հանձնաժողովի նախագահը վստահեցնում է՝ փորձում են հավասարակշռված լուծում գտնել: Ներկայիս իրենց գործողություններն էլ որակեց որպես հետևանքները դիտարկելու աշխատանք, - «Հիմա հետևանքներն ենք փորձում դիտարկել ու հասկանալ՝ ինչ ունենք և ինչ կարող է կատարվել: Խորքային գնահատական չունենք, թե դա հարակից ճյուղերի և ՀՀ տնտեսության վրա ինչպես է ազդելու: Չունենք նաև սերտիֆիկացված լաբորատորիաներ, որ բոլոր պարամետրերով կարողանանք ցեմենտի նորմալ գնահատում տանք», - ասաց հանձնաժողովի նախագահը՝ ավելացնելով, որ պետք է վեր հանել նաև այս խնդիրը:

Բաբկեն Թունյանն ավելի վաղ նաև նշել էր, որ չեն կարող ամեն անգամ մեկ ընկերության լավություն անելով՝ անտեսել մյուսների շահերը, - ««Հրազդան ցեմենտ» գործարանը արդեն մեկ անգամ օգտվել է Կառավարության բարեհաճությունից: 2016 թվակականի մայիսին ԱԺ-ում օրենքի տեսքով նրան զիջել են 500 մլն դրամի հարկեր և տույժեր»:

Հայաստան ներկրվող ցեմենտի տուրքերի մասին ապրիլի 30-ին ԱԺ-ում լսումներ կանցկացվեն:
Հիշեցնենք, որ Ազգային ժողովն ապրիլի 19-ին առաջին ընթերցմամբ ընդունել է կառավարության կողմից ներկայացված «Պետական տուրքի մասին» օրենքում լրացում կատարելու մասին և կից ներկայացված օրենքում լրացում կատարելու մասին նախագծերի փաթեթը: Նախագծի համաձայն՝ ցեմենտի մեկ տոննայի ներկրման համար 22 հազ. Դրամ տուրք է սահմանվում: ԱԺ «Բարգավաճ Հայաստան» և «Լուսավոր Հայաստան» խմբակցությունները դեմ էին քվեարկել նախագծին:

Հեղինակ` Հասմիկ Կոշկարյան