Փաստ ինֆո

Քաղաքագետ Հայկ Մարտիրոսյանի կարծիքով՝ ՊՎԾ պետ Դավիթ Սանասարյանի գործը շինծու է:

«Իմ խորին համոզմունքն է այն, որ այստեղ քաղաքական գործընթացներ են գնում»,- այսօր տեղի ունեցած մամուլի ասուլիսում հայտարարել է քաղաքագետ Հայկ Մարտիրոսյանը՝ նշելով, որ տվյալ քրեական գործն առավելապես քաղաքական է, սակայն տրվում է իրավական ձևակերպում:

‹‹Շատ տխուր է, որ այսպես կոչված հետհեղափոխական Հայաստանում մենք ունենք առաջին քաղաքական գործը, և սա հեղափոխություններին շատ բնորոշ բան է. ‹‹լավագույն զավակները առաջինն են խժռվում հեղափոխության կողմից››, և որից հետո թերմանցքը բարձրանում է վերև››,-ասաց քաղաքագետը:
Նրա խոսքով, այս գործընթացը իշխանություններն սկսել են ամենապայծառ, ամենաազնիվ կերպարից:

‹‹Ես և Սանսարյանը միասին ճանապարհ ենք անցել և ես տեսել եմ նրա անմնացորդ նվիրումը, քաջությունն ու սկզբունքայնությունը:Կարծում եմ, որ էդպիսի մարդիկ չեն կարող 10-11 ամիսների ընթացքում‹‹փչանալ›› կամ գնալ ինչ-որ կեղտոտ բաների, մանավանդ որ հստակ է՝ նա որևէ շահ չի ունեցել, դա անգամ երևում է պաշտոնական հաղորդագրություններից››,-ասաց Մարտիրոսյանը:

Ըստ քաղաքագետի՝ տվյալ այս գործընթացը վարչապետին ձեռնտու է՝ ցույց տալու իր անաչառությունը, որ անգամ հեղափոխության երկրորդ դեմքին կարող է ‹‹փուռը տալ››:

‹‹ԱԱԾ-ի մեղադրանքը մաքսիմում ձգում է անփությության, որովհետև չկա հանցակազմ, չկա որևէ ընտանեկան, ընկերական կապ: Եվ մարդիկ կարծում են, թե Դավիթ Սանասարյանը մեղադրվում է «փող ուտելու» կամ կոռուպցիոն սխեմաների մեջ: Ուզում եմ հասկանալ՝ այս երկրում ԱԱԾ-ն ուրիշ բան չունի՞ զբաղվելու, ինչպե՞ս կարելի է այդ կառույցին ամենավերին իշխանությունը անընդհատ դնի ինչ-որ գործերի վրա, ինչ-որ կոռուպցիայի վրա››,-ասաց քաղաքագետը:

Նա կարծում է, որ հիմա քաղաքական դաշտի վերաձևում է տեղի ունենում, ‹‹մեջտեղից հանվում է›› շատ ազդեցիկ կառույցի ղեկավար:

‹‹Սանասարյանը ազդեցիկ է նրանով, որ անգույն չէ, ինչպես մնացած գրեթե բոլորը։ Նա նաև անկախ խաղացող է դաշտում, թիմի անդամ չէ: Ճիշտ է կուսակցության անդամ է, բայց բոլորն էլ գիտեն, որ Սանասարյանը ընդհանրապես թիմի անդամ չի ընկալվում››,-ասաց քաղաքագետը:

Մարտիրոսյանի խոսքով, թիմի ներսում կան բաժանումներ, տարբեր թևեր, իսկ Սանասարյանը թևեր չունի, ինքն իրենով առանձին մի թև է:

Ըստ նրա, ստեղծվել են 2 բևեռներ՝ Սանասարյանն ու Ազգային անվտանգության ծառայությունը, և հիմա կարծես իշխանություններն էլ են խոսում, որ դաշտում պետք է մնա կամ մեկը, կամ մյուսը:

‹‹Կարծում եմ, որ եթե մեղադրող կողմն իմանար, որ այսպիսի խնդիր է դրվելու, ապա սրա մեջ չէր մտնի: Մյուս կողմից չեմ բացառում, որ ապացույցներն ստեղծվեն, այսպես կոչված ‹‹կարվեն›› ապացույցներ և ամեն գնով Սանասարյանը մեղավոր ճանաչվի››,-ասաց քաղաքագետը:

‹‹Հետևորդների մի զգալի բանակ և վարչապետը նույնպես, սիրում են լինել միանձնյա լիդեր և ուզում են միայն իրենք փայլեն: Վարչապետն ունի փայլ, բայց չգիտեմ՝ ինչու է թերևս անհանգստանում, որ իր փայլը կարող է խամրել կողկից ինչ-որ մեկի փայի պատճառով››,-ասաց Մարտիրոսյանը:

Հեղինակ` Սոնա Գեւորգյան