Փաստ ինֆո

Մեր հիմնական խնդիրը չպետք է լինի աշխարհից պահանջել, որ դատապարտեն Ցեղասպանությունը, այլ այն, որ մենք այնքան ուժեղ լինենք, որ մեր հետ այլևս չկարողանան այդպես վարվել:

Այսօր Ծիծեռնակաբերդի հուշահամալիր կատարած այցի ժամանակ ասաց 6-րդ գումարման Ազգային ժողովի պատգամավոր Արամ Սարգսյանը:
‹‹Բնության մեջ էլ, պետությունների պատմության մեջ էլ ուժեղ կենդանիները խժռում են փոքրերին, ուժեղ պետությունները ուտում են փոքր ժողովուրդներին, դրանով իրենց տարածքներն են մեծացնում, իրենք են հզորանում, բայց Աստված նույնիսկ այն ամենափոքրերին էլ հնարավորություններ է տվել դրա դեմ պայքարելու, կերակուր չդառնալու››,-ասաց Սարգսյանը:

Նրա կարծիքով՝ Ցեղասպանության նկատմամբ դիրքորոշում ցուցաբերած երկրներին կարելի է բաժանել 3 խմբի.
‹‹Առաջինը այն երկրներն են, որոնք անկեղծ են պատմության, աշխարհի, իրենց խղճի առաջ. Դրա փայլուն օրինակը Ֆրանսիան է: Երկրորդ խմբի երկրները այն երկրներն են, որոնք ցեղասպանությանը անդրադառնում են այն դեպքերում, երբ ինչ-ինչ խնդիրներ ունեն Թուրքիայի հետ և այդ ժամանակ իրենց սենատներում հայտնվում է Հայկական հարցը՝ շահարկելու համար: Դրա բացառիկ օրինակը Իսրայելն է: Երբ Թուրքիայի հետ հարաբերությունները վատանում են, իրենք հիշում են, որ հայոց Ցեղասպանություն է եղել››,-ասաց Սարգսյանը:

Նրա խոսքով՝ երրորդ խմբում ընդգրկված են այն երկրները, որտեղ հայկական համայնքը մեծ է և հայկական հարցի մասին խոսվում է ընտրությունների շրջանում: Սարգսյանը սրա փայլուն օրինակ է համարում Ամերիկայի Միացյալ Նահանգները:

Խոսելով հատուցման մասին նախկին պատգամավորն ասաց՝ նախ պետք է ճշտել, հասկանալ ինչ պահանջ ենք դնում և հատուցում ասելով ինչ ենք հասկանում:
‹‹Ես այն կարծիքին եմ, որ Ցեղասպանության ճանաչման պահանջը որպես պետության արտաքին քաղաքականության համար մեկ օրակարգային խնդիր դնելը մեր արտաքին քաղաքականության մանևրելու հնարավորությունները փոքրացնում է և ընդհանուր առմամբ ոչ մի խնդիր այդ առումով չի լուծում››,-ասաց նա:
Սարգսյանը խոսեց նաև նոր իշխանությունների մասին և ասաց, որ նրանք բավականին բարդ ժառանգությւոն են ստացել և հնարավոր չէ այսօրվա իշխանությունների գործունեությունը 6-7 ամսվա կամ մեկ տարվա անցածով գնահատելը:

‹‹Շատ լուրջ խնդիրներ կան, որոնք թե՛ տնտեսական, թե՛ քաղաքական, թե՛ ռազմաքաղաքական բալանսի վերականգնման պահանջ են դնում, իսկ դա վերականգնելու համար իսկապես լուրջ աշխատանք է պետք անել››,-ասաց նախկին պատգամավորը:
Նա նշում է, որ հայ ժողովուրդը պետք է հիշի, որ լուրջ փորձություններով է անցել և կայուն է մնացել, պետք է հիշի, որ եթե աշխարհաքաղաքական գործոն չդառնանք, ապա աշխարհաքաղաքական փաստ կարող է դառնալ իր իմացությամբ, գիտելիքներով և այսօվա ունեցած պետությամբ:

‹‹Պետք է հայերի մեջից հանվի զոհի հոգեբանությունը և պետք է ուժեղ դառնալ, հակառակ դեպքում ինչքան էլ ասենք հիշում և պահանջում ենք, միևնույն է բան չի փոխվելու››,-ասաց Սարգսյանը:

Հեղինակ` Սոնա Գեւորգյան