Փաստ ինֆո

Ես կարծում եմ, որ ելույթ ունենալով չէ, որ Ցեղասպանության ճանաչման կամ դատապարտման ուղղությամբ պետք է գործ անել: Ելույթի մեջ ներառելը այնքան էլ խնդիր չի կարող դառնալ, եթե կա տեսլական Թուրքիայի հետ հարաբերությունները ինչպես ձևավորելու հարցում:

Անդրադառնալով վարչապետին հասցեին հնչող մեղադրանքներին, որ ԵԽԽՎ-ում Ցեղասպանության թեմայով ելույթ չի ունեցել, լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոնդ Մարուքյանը:

Նա նշեց, որ տվյալ պարագայում այսօրվա իշխանությունները այդ տեսլականը չեն ներկայացրել և այդ ուղղությամբ որևէ քայլ հիմա չի կատարվում:

Խոսելով տարբեր խորհրդարաններում Ցեղասպանության ճանաչման գործընթացի մասին՝ Մարուքյանն ասաց, որ այն տարբեր կողմեր փորձում են իրենց վերագրել, սակայն աշխատում է հայ համայնքը, հայդատի գրասենյակները, դեսպանությունները և կոնկրետ որեւէ մի կողմ չի կարող ասել, որ դա իր ձեռքբերումն է:

ԼՀԿ առաջնորդը մարդկության կողմից Ցեղասպանության ճանաչման ուղղությամբ լուրջ տեղաշարժ համարեց Իտալիայի խորհրդարանի դատապարտող հայտարարությունն ու քվեարկությունը։ Հիշեցնենք, որ հայտարարությանը որեւէ պատգամավոր դեմ չի քվեարկել. Եղել են միայն ձեռնպահներ։  

Նրա խոսքով՝ ‹‹Լուսավոր Հայսատան››-ի տեսլականն այն է, որ Թուրքիայի հետ դիվանագիտական հարաբերությունների կարգավորման ուղղությամբ աշխատանքները պետք է սկսել  սահմանի բացումից, մարդկանց միջև շփումների վերականգնումից, և միայն դրանից հետո կարելի է անցնել կնճռոտ հարցերին:

‹‹Երբ երկու կողմերը նախապայմաններ են բերում՝ ունենում ենք այն ինչ ունենք՝ 20 տարուց ավելի փակ սահման: Մինչդեռ օդային շփումները կան, այսինքն առևտուրը կա, ՀՀ քաղաքացիներ կան Թուրքիայում աշխատող: Հիմա հո ջայլամի պես գլուխներս չե՞նք մտցնելու հողի տակ, ասենք մեր քաղաքացիները Թուրքիայում չեն աշխատում››,-ասաց Մարուքյանը:

Նա նշեց, որ այդ քաղաքացիների շահերը պետք է պաշտպանել, իսկ դրա համար պետք է դիվանագիտական առաքելություն ունենալ Թուրքիայում:

ԼՀԿ առաջնորդը նշում է, որ Թուրքիան Հայստանին սահմանակից երկիր է, և ոչ Հայաստանն է պատրաստվում իր տարածքից հեռանալ, և  կարծես թե ոչ էլ Թուրքիան, հետևաբար սա իրողություն է, որի հետ պետք է հաշվի նստել և լուծումներ գտնել:

‹‹Խորհրդարանական մակարդակում պետք է ասեմ, որ ԵԽԽՎ-ում մենք այդպիսի խոսակցություններ ժամանակ առ ժամանակ ունենում ենք՝  թուրքական պատվիրակության ներկայացուցիչների հետ: Եվ ոչ բոլոր դեպքերում է, որ Ադրբեջանի հետ են քվեարկում: Եթե մենք շատ շփումներ ունենանք, կարող է այն մնացածն էլ չլինի››,-ասաց Մարուքյանը:

Նրա կարծիքով, պետք է պրոակտիվ մոտեցում ունենալ և ոչ թե ռեակտիվ,  պետք չէ սպասենք ինչ-որ բան ասեն, որ պատասխանենք կամ ինչ-որ բան նախաձեռնեն, դրա դեմ պայքարենք, այլ մենք պետք է նախաձեռնություններով հանդես գանք:

Հեղինակ` Սոնա Գեւորգյան