Փաստ ինֆո

Ժխտողականության դեմ պայքարը եղել և մնում է մեզ համար արտաքին քաղաքականության գերակայություններից մեկը, և առնվազն 21 տարի է, ինչ մենք հետևողականորեն միջազգային օրակարգում տանում ենք առաջ Ցեղասպանության կանխաարգելման օրակարգը: Այս մասին այսօր Ցեղասպանության հուշահամալիր կատարած այցի ժամանակ, լրագրողների հետ զրույցում ասել է ՀՀ արտաքին գործերի նախարար Զոհրաբ Մնացականյանը:

‹‹ Ցեղասպանության կանխարգելումը միջազգային պարտավորություն է և միջազգային համակարգում այդ գործիքները, կարողությունները ամրապնդելը, զարգացնելը շարունակական գործընթաց է և մենք շարունակական աշխատելու ենք այդ ուղղությամբ››,-ասաց արտաքին գործերի նախարարը:
Նա նշեց, որ Հայստանի նախաձեռնությամբ Միացյալ ազգերի կազմակերպության օրակարգում դեկտեմբերի 9-ը հռչակվել է Ցեղասպանությունների կանխարգելման և զոհերի հիշատակի օր: ‹‹Հայաստանը մշտապես ի հայտ է բերում և նորոգում բանաձևեր: Այս գործընթացը կանգ չի առնելու, քանի որ ամեն անգամ, երբ մարդկությունը կանգ է առնում և ասում ‹‹այլևս երբեք››, այդ ‹‹այլևս երբեք››-ը նորից կրկնվում է, և մենք պարտավորված ենք, քանի որ գիտենք Ցեղասպանության գինը››,-ասաց Մնացականյանը:

Նրա խոսքով, այս ամենն ի հայտ է բերում ամենակարևոր պատգամը, որ ժխտված, մերժված արդարությունը չի կարող կորել, և անպատժելիությունը չի կարող ընդունելի լինել:

Նա նշեց, որ հայոց Ցեղասպանության ճանաչման գործընթացը քայլ է Ցեղասպանությունները կանխարգելելու ուղղությամբ, որովհետև դա պատգամ է, որ անպատժելիությունը չի աշխատելու:

Պատասխանելով լրագրողի այն հարցին, թե հնարավոր է Երևանը հաշտեցման գործընթաց սկսի և պարտադրի Անկարային բացել սահմանները, Մնացականյանն ասաց.

‹‹Դժբախտաբար պաշտոնական Անկարայից եկող լուրերը հուսադրող չեն կամ հակառակը ավելի քննադատության են նման››:

Հեղինակ` Սոնա Գեւորգյան