Փաստ ինֆո

2019 թվականի ապրիլի 11-ին Գեղարքունիքի ընդհանուր իրավասության դատարանը՝ դատավոր Յ. Իսկոյանի նախագահությամբ, քննելով 25 տարվա ամուսինների ծեծկռտուքի դեպքի առթիվ դեռ նախորդ տարվա հոկտեմբերին հարուցված քրեական գործը, որոշում է կայացրել դատապարտել նրանց 40 եւ 50 հազար ՀՀ դրամի չափի տուգանի, ապա՝ համաներմամբ ազատ արձակել պատիժը կրելուց։

Ամուսինները, որ Գեղարքունիքի մարզի բնակիչներ են, կենցաղային հարցի շուրջ գտնվել են լարված փոխհարաբերությունների մեջ, ինչի արդյունքում ամուսինը տևական ժամանակ հեռացել է տնից և բնակվել այլ վայրում: 2018 թվականի սեպտեմբերի 3-ին վերադառնալով իրենց բնակարան՝ կնոջից պահանջել է հեռանալ տնից, ինչի կապակցությամբ վիճաբանել են միմյանց հետ, որն ավելի ուշ վերածվել է փոխադարձ կռվի:
Ըստ քրեական գործի տվյալների՝ կինը հարձակվել է ամուսնու վրա՝ փորձելով նրան հրելով դուրս հանել բնակարանից, սակայն ամուսինը դիմադրել է և դուրս չի եկել։ Դրանից հետո կինը, վերցնելով խոհանոցային դանակը, իրեն պաշտպանելու նպատակով սպառնացել է ամուսնուն դրանով հարվածել, եթե վերջինս մոտենա իրեն կամ դուրս չգնա բնակարանից: Ամուսինը չի հավատացել կնոջ խոսքերին եւ մոտեցել է նրան, նրա նկատամամբ բռնություն գործադրելով խլել դանակը և նետել դուրս: Սկսված փոխադարձ կռվի ժամանակ ամուսինները քաշքշել են միմյանց և հարվածներ հասցրել մեկմեկու մարմնի տարբեր մասերին:

Ամուսնու հարվածներից մեկը դիպել է կնոջ քթին, ինչի արդյունքում վերջինիս քիթը վնասվել է։ Կինն էլ իր հերթին խոհանոցում դրված հախճապակյա տարրայով հարվածել է տանից հեռացող ամուսնու գլխին: Հարվածից վերջինս կորցրել է գիտակցությունը և վայր ընկել:

Դեպքի առթիվ ՀՀ Գեղարքունիքի մարզային քննչական վարչության Վարդենիսի քննչական բաժնում 03.10.2018 թ.-ին հարուցվել էր քրեական գործ։ Կնոջը մեղադրանք էր առաջադրվել ՀՀ ՔՕ-ի 117-րդ հոդվածով, այն է՝ դիտավորությամբ առողջությանը թեթև վնաս պատճառելը, իսկ ամուսնուն՝ 118-րդով, այն է՝ ծեծելը կամ այլ բռնի գործողություններ կատարելը։ Նրանց նկատմամբ որպես խափանման միջոց էր ընտրվել ստորագրությունը՝ չհեռանալու մասին։

Նշենք, որ ապրիլի 11-ին կայացած նիստում կինն իրեն մեղավոր է ճանաչել եւ նշել, որ դեմ չէ իր նկատմամբ համաներում կիրառելուն, իսկ ամուսինը մեղավոր չի ճանաչել՝ պնդելով, որ ինքն ընդամենը մեկ անգամ է բրդել և քաշքշել կնոջը, եւ ուրիշ հարված չի հասցրել։

Այսպիսով՝ կինն ու ամուսինը դատապարտվել են համապատասխանաբար 50.000 ու 40.000 ՀՀ դրամի չափով տուգանքների եւ համաձայն Էրեբունի-Երևանի հիմնադրման 2800-ամյակի, ինչպես նաեւ՝ «Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ Ազգային Ժողովի կողմից 01.11.2018թ. ընդունված օրենքի 2-րդ հոդվածի 1-ին կետի 3-րդ ենթակետի՝ անմիջապես համաներմամբ ազատ են արձակվել պատիժը կրելուց։

Աղբյուր` Փաստինֆո