Փաստ ինֆո

ՀՅԴ բյուրոյի տնտեսական հետազոտությունների պատասխանատու Սուրեն Պարսյանի համար զարմանալի են Կառավարության հայտարարություններն այն մասին, որ պետական բյուջեն համալրվել է լրացուցիչ 44 մլրդ դրամով։ «2018 թ.-ի պետական բյուջեի համաձայն՝ հարկեր-ՀՆԱ հարաբերակցությունը կազմում էր 21.3 %  այն դեպքում, երբ 2019 թ.-ի պետբյուջեում նախատեսված էր 20.7 %։ Այսինքն 2019-ին մոտ 0.6 %  քիչ է այս հարաբերակցությունը։ Կանխամտածված 2019-ի բյուջեում արդեն իսկ քիչ էին պլանավորել հարկերի հավաքագրումը, որպեսզի հետո հանրությանը տեղեկացնեն լրացուցիչ գումարների մասին ու պարգևավճարներ նաշանակեն», - «Փաստինֆո»-ի հետ զրույցում ասաց տնտեսագետը։

Անդրադառնալով «Վիճակախաղերի մասին» օրենքում առաջարկվող փոփոխություններին՝ ՀՅԴ բյուրոյի տնտեսական հետազոտությունների պատասխանատուն նշեց, որ նախաձեռնությունը սահմանված է այնպես, որ դրանից կօգտվի մեկ տնտեսվարող սուբյեկտ, - «Կառավարության ներկայացրած նախաձեռնության արդյունքում բոլոր բուքմեյքերականները չէ, որ փակվելու են։ Կփակվեն բոլորը բացի մեկ, առնվազն երկու ընկերությունից և դաշտը կխոշորացվի»։ Տնտեսագետի խոսքով նպատակը դաշտը վերահսկելի դարձնելն է, իսկ մեկ-երկու տնտեսվարողին վերահսկելն ավելի հեշտ է։ Կառավարության այս նախաձեռնությունը Սուրեն Պարսյանի կարծիքով սխալ մոտեցում է, քանի որ համացանցի միջոցով  մարդիկ կշարունակեն օգտվել այդ ծառայություններից, - «Ներկայումս կան բազմաթիվ ծրագրեր, որոնք հնարավորություն են տալիս շրջանցել կառավարության սահմանափակումները և նրանք դրանցից  հանգիստ կարողանում են օգտվել բանկային փոխանցումների, բանկային քարտերի միջոցով»։

Հիշեցնենք, որ «Վիճակախաղերի մասին» օերնքում փոփոխություն կատարելու մասին Ալեն Սիմոնյանի, Սիփան Փաշինյանի և Նաիրա Զոհրաբյանի նախագծով առաջարկվում է թույլատրել բացել մեկական բուքմեյքերական գրասենյակ միայն Ջերմուկ, Մեղրի, Սևան և Ծաղկաձոր քաղաքներում։ Նախագծով արգելվում է նաև ավտոմատացված սարքավորումների միջոցով վիճակախաղերի կազմակերպումը։

Հեղինակ` Հասմիկ Կոշկարյան