Փաստ ինֆո

ՊՎԾ պետ Դավիթ Սանասարյանի պաշտպանները դիմել են ՀՀ գլխավոր դատախազ Արթուր Դավթյանին՝ Սանասարյանին առաջադրված մեղադրանքները եւ նրա լիազորությունների կասեցման որոշումները վերացնելու նպատակով։ Այս մասին «Փաստինֆո»-ն տեղեկացավ Սանասարյանի պաշտպան Արսեն Սարդարյանից։

Թե փաստական ինչ հանգամանքներ են ներկայացրել, պաշտպանական կողմն այս պահին չի կարող ասել՝ պայմանավորված նախաքննության գաղտնիությամբ. «Իրավական առումով ասեմ միայն այն, որ արարքը, որի մեջ մեղսագրում են Դավիթ Սանասարյանին, նա չի կատարել, եւ առհասարակ, այն փաստական հանգամանքները, որ գործում առկա են, ողջամտորեն ցույց են տալիս, որ Սանասարյանի գործողություններում առերեւույթ հանցակազմ չկա»,-նշեց Սարդարյանը։

Նրա խոսքով՝  իր պաշտպանյալին մեղսագրվող հանցագործությունը պահանջում է երեք պարտադիր հատկանիշ, եւ դրանցից մեկի բացակայությունն էլ արդեն այդ արարքը դարձնում է քրեորեն ոչ հետապնդելի. «Տվյալ դեպքում այդ պարտադիր հատկանիշները՝ առանձին-առանձին վերցված, բացակայում են, այսինքն՝ Սանասարյանի գործողություններում նույնիսկ առերեւույթ հանցակազմ չկա»,- նշեց նա՝ հավելելով, որ իր կարծիքով՝ նախաքննական մարմինը պարզապես սխալվել է, ինչը, ըստ իրեն, մեր իրականության մեջ հաճախ է պատահում. «Պարզապես այս դեպքում այդ սխալը շատ ակնհայտ է, այդ պատճառով էլ մենք մի փոքր ապշած ենք»։

Դատախազին ուղղված բողոքում պաշտպանները խնդրել են նաեւ, որ գործը ԱԱԾ վարույթից հանձնվի այլ մարմնի՝ նշելով, որ Սանասարյանն այս դեպքում ԱԱԾ-ի նկատմամբ վստահություն չունի. «Ակնհայտ անմեղ մարդուն ակնհայտ անհիմն մեղադրանք առաջադրելը եւ դրան հաջորդող չհիմնավորված որոշում ընդունելը մեզ մոտ լուրջ կասկածներ են առաջացրել առ այն, որ տվյալ մարմինը կարող է օբյեկտիվ եւ բազմակողմանի քննություն իրականացնել, այսինքն՝ այնտեղ կանխակալ վերաբերմունք կա, ինչով պայմանավորված էլ խնդրել ենք, որ գործն այլ մարմնի տրամադրվի»։

Անդրադառնալով ԱԱԾ-ի՝ վարչապետին ենթակա մարմին լինելուն եւ ըստ այդմ՝ վարչապետի կողմից կանխակալ վերաբերմունք ունենալուն՝ Արսեն Սարդարյանը իրավական առումով կոռեկտ չհամարեց այդ մեկնաբանությունները՝ նշելով, որ վարչապետը, ըստ էության, բազմաթիվ գերատեսչությունների ղեկավարն է, բայց դա չի նշանակում, որ ցանկացած գործողության համար նա պետք է պատասխանատու  անձ լինի, առավել եւս՝ միտում ունենա. «Հարգելով վարչապետին՝ քննիչը իր գործառույթներում անկախ է, եւ առհասարակ, քննչական դեպարտամենտը ՀՀ քրդատի համաձայն ղեկավարվում է  օրենքով, եւ եթե նա օրենքը սխալ է մեկնաբանում, իր սխալ մեկնաբանության վերաբերյալ հսկողություն իրականացնող մարմինը ոչ թե ԱԱԾ-ի ղեկավարությունն է, այլ՝ դատախազությունն ու դատարանը»,-նշեց փաստաբանը եւ հավելեց. «Իմ խորին համոզմամբ՝ մեր վարչապետը շատ օբյեկտիվ անձնավորություն է, եւ այն, որ փորձեր են կատարվում՝ վարույթ իրականացնող մարմնի  սխալները կապել նրա հետ, ակնհայտ անտրամաբանական է, եւ գործող օրենսդրության հետ որեւէ առնչություն չունի»։

Ինչ վերաբերում է վարչապետի հայտնած դիրքորոշմանը, պաշտպանները համամիտ են դրան եւ կիսում են այն։

Հիշեցնենք, որ Նիկոլ Փաշինյանը, անդրադառնալով Սանասարյանին առաջադրված մեղադրանքին, ֆեյսբուքյան իր էջում գրել էր. «Դավիթը իմ ընկերն է նույնպես, բայց լավ իմացեք՝ Հայաստանում անձեռնմխելի մարդիկ չկան։ Ընդդիմադիր լինի թե իշխանավոր, հեղափոխական լինի, թե հակահեղափոխական։ Թողեք նորմալ քննություն ընթանա։ Եթե դուք չթողնեք, ես դա կապահովեմ։ Օրենքով ինձ տրված լիազորությունների շրջանակներում»,-ասել էր ՀՀ վարչապետը։

Հեղինակ` Միլենա Խաչիկյան