Փաստ ինֆո

Ես նեղը չեմ ընկել, չեմ ընկնում, չեմ ընկնելու: Կարող էի շարունակել գործընթացը, բայց քանի որ ավագանին է տրամադրել այդ մարդկանց անվճար այդ տարածքները, ես էլ ասացի՝ եկեք հարցը լուծենք ավագանու դաշտում: Ավագանու այսօրվա նիստում հայտարարել է Երեւանի քաղաքապետ Հայկ Մարությանը՝ արձագանքելով «Բարգավաճ Հայաստան» խմբակցության ղեկավար Միքայել Մանրիկյանի հայտարարությանը, թե, երբ քաղաքապետը նեղն է ընկնում, դիմում է ավագանու երեք խմբակցություններին և կոչ է անում ստեղծել ժամանակավոր հանձնաժողով:

Հիշեցնենք, որ խոսքը վերաբերում է Բուզանդի 3 հասցեում գտնվող կազմակերպություններին տրամադրված տարածքների հարցի լուծմանը, քանի որ դրանք տրամադրվել են կամ անվճար, կամ ցածր գներով:

Քաղաքապետն ասաց, որ հարցը ավագանու քննարկման է ներկայացնում իր բարի կամքի դրսեւորման արդյունքում։ «Դուք տվել եք, դուք որոշեք՝ շարունակում ենք տալ, թե ոչ,- ասաց քաղաքապետը՝ նշելով, որ եթե ավագանին ուզում է իր կողքին լինել՝ միասին լավ գործեր անելու համար, ապա ինքն ուրախ կլինի, իսկ եթե չի ուզում, չի կարող ստիպել:

«Խոսքը չի գնում միայն այլ խմբակցությունների մասին, նաև մեր խմբակցության ավագանու անդամները տեղյակ չեն այն գործերից, որը անում է քաղաքապետարանը: Օրենքում կետ չկա, որ ամեն քայլի մասին քաղաքապետարանը տեղյակ պետք է պահի: Սա աբսուրդ կդառնա, քանի որ մենք օրական հարյուրավոր որոշումներ ենք կայացնում և ամբողջ այդ ինֆորմացիան ձեզ փոխանցելու համար ևս մեկ քաղաքապետարանի չափով անձնակազմ է պետք»,-ասաց Մարությանը:

Հեղինակ` Սոնա Գեւորգյան