Փաստ ինֆո

Մերսման սրահների անվան տակ բազմաթիվ երևույթներ են կատարվում, որոնք լուրջ ուսումնասիրության կարիք ունեն: Մենք կարող ենք այս մերսման սրահները բնորոշել, որպես թրաֆիքինգի օջախներ:

Այսօր Ազգային ժողովում «Մարդկանց թրաֆիքինգի և շահագործման ենթարկված անձանց նույնացման և աջակցության մասին» ՀՀ օրենքում փոփոխություններ ու լրացումներ կատարելու մասին Կառավարության ներկայացրած օրենքի նախագիծի քննարկման ժոամանակ ասաց «Բարգավաճ Հայաստան» խմբակցության պատգամավոր Սերգեյ Բագրատյանը:

Նա առաջարկեց նախագծի հիմնական զեկուցող, աշխատանքի և սոցիալական հարցերի նախարարի տեղակալ Գեմաֆին Գասպարյանին ուսումնասիրել այդ երևույթն ու հնարավորինս շուտ  փակել  Երևանում գործող թրաֆիքինգի այդ կենտրոնները:

Հարցին պատասխանելով, նախարարի տեղակալն ասաց՝ թրաֆիքինգի զոհերի հետ կապված կա երկու գործընթաց՝ աջակցության և պաշտպանության:

«Աջակցության գործընթացը իրականացնում է ՀՀ աշխատանքի և սոցիալական հարցերի նախարարությունը, իսկ պաշտպանության գործընթացը՝ ոստիկանությունը»,-ասաց Գասպարյանը:

Նա նշեց, որ իրենք պատրաստ են աջակցել, իսկ քրեական գործեր հարուցելն ու վարույթ ընդունելն արդեն ոստիկանության տիրույթում է 

Փոխնախարարին ի պատասխան Սերգեյ Բագրատյանն ասաց, որ հարցը չի տալիս իրեն ուղղորդելու համար և  հավելեց․ «Ես Ձեզ ասում եմ՝ ուսումնասիրեք այդ երևույթները և դրանց մասին համապատասխան եզրակացությունները ներառեք առաջինից երկրորդ ընթերցման ժամանակ․ թե չէ՝ ով պետք է զբաղվի դրանով՝ ձեզանից լավ գիտենք»։ 

Հեղինակ` Սոնա Գեւորգյան