Փաստ ինֆո

Իշխանության որոշակի առաջնահերթություններ կարծես մեկ-մեկ հրապարակ են բերվում, ընդ որում, նախ՝ հանրային միջավայրում են փորձարկվում դրանք՝ ինչպես տևական ժամանակ սեռական փոքրամասնությունների քարոզչությունն էր իրականացվում՝ ծիածանագույն դրոշների ներքո համաժողովների հնարավոր անցկացման, լեռնային գյուղում գեյ-փարթիի կազմակերպման և սեռական փոքրամասնությունների կողմից ոստիկանական բաժանմունքում ոստիկան ծեծելու համատեքստում, թե՝ տեսեք-տեսեք՝ մենք ազատ ու անարգել մեր ուզածն անում ենք՝ ընդհուպ մինչև վերջերս տրանսգենդերի ելույթը ԱԺ-ում, իսկ օրերս մարիխուանայի, այսինքն թմրամիջոցների լեգալացման թեման նախ՝ փողոցում՝ քարոզչությունից սկսվեց:

Արդեն իսկ ԱԺ «Իմ քայլը» իշխանական խմբակցության պատգամավոր, Նիկոլայ Բաղդասարյանը հայտարարել է, որ ապրիլի 20-ին հանրային վայրում մարիխուանայի միջազգային օր նշող և այդ համատեքստում հօգուտ մարիխուանայի օրինականացման, այսինքն՝ ապաքրեականացման քարոզ անող երիտասարդն իր հարազատ եղբայրն է: Այսինքն, ի՞նչ է ստացվում՝ եղբայրներից մեկն սկսում է փողոցային ակցիաներից, իսկ մյուս՝ իրավաբան եղբայրը Ազգային Ժողովում այն ընթացք տվող պատգամավորը կամ դրանցից մե՞կը գուցեթե կլինի: Բնականաբար, այս ակցիային հաջորդելու է հարցն ԱԺ տեղափոխելը, քննարկումներ անցկացնելը: Ի դեպ, այս քարոզչական ակցիայի իրականացնողն իր արարքը մեկնաբանում էր որպես սեր՝ առ մարիխուանա: Իսկ նրա պատգամավոր եղբայրը՝ Նիկոլայ Բաղդասարյանը հայտարարում է, որ իր ազգականների մտքերի և տեսակետների հետ չի ցանկանում նույնանալ:

Լուսահոգի ընկերս՝ Գրիգոր Բաբայանը եթե լսեր, թե ոմն մեկը հրապարակավ հայտարարում է, թե ինքը մարիխուանա է սիրում, շատ կոշտ կասեր՝ «սիրում ես՝ կեր»:

Հա էլի, գնա կեր, քեզ տուր մարիխուանային, ներծծվիր դրանով, գլխիդ կանաչ տերևներով պսակ հյուսիր, զավակներիդ, հարազատներիդ շրջանում էլ կարող ես գովքն անել ու ավելի հեռուն գնալ, մի խոսքով՝ սերդ ոնց ուզում ես արտահայտիր, բայց հանրային միջավայրում դու իրավունք չունես: Քո իրավունքն ավարտվում է այնտեղ, որտեղ սկսվում է իմը, որտեղ բախվում է իմ իրավունքին: Ավելին, այդպիսով դու բախվում ես քրեական օրենսգրքին:

Ազատության հրապարակում` մայրաքաղաքի ամենաբանուկ հատվածում, երեխաների աչքի առաջ ո՞վ է քեզ թույլ տվել՝ մարիխուանան որպես երկնքից իջած մանանա ներկայացնելու գործունեություն ծավալես:

Ի դեպ, մինչ այդ փողոցային նախաձեռնությունը, մարիխուանայի հանդեպ դրական վերաբերմունքը տևական ժամանակ արդեն քարոզվում է սոցցանցային և լրատվական տարբեր հարթակներով: Դրանցից մեկն ԱԺ փոխխոսնակ Ալեն Սիմոնյանի՝ դեռևս 2017 թվականին ստեղծած «Օրինական Հայաստանում» ֆեյսբուքյան խումբն է, որն այսօր 5 ադմին ունի և որոնցից մեկը շարունակում է ինքը լինել: Մարիխուանա քարոզողների խմբի անդամների մեջ ՔՊ-ական շրջանակներից ահագին մարդիկ կան, այդ թվում, նաև՝ փոխվարչապետ Տիգրան Ավինյանը, ՏԿ նախարար Սուրեն Պապիկյանը, ԿԳ նախարար Արայիկ Հարությունյանը, ԱԺ արտաքին հարաբերությունների հանձնաժողովի նախագահ Ռուբեն Ռուբենյանը, ԱԺ պատգամավոր՝ Հրաչյա Հարությունյանը, պետական կառավարման համակարգի ներկայացուցիչներ, ավագանու անդամներ, նաև՝ լրագրողներ…

Հայտնի է՝ մարիխուանան թմրամիջոց է, որն օգտագործողի մոտ այն աստիճանաբար կարող է կախվածության առաջացնել, իսկ ցանկացած կախվածություն՝ հիվանդություն է: Այս համատեքստում արժե հիշատակել ամերիկացի լրագրող Ալեքս Բերենսոնի հեղինակած «Պատմեք ձեր երեխաներին» գրքի մասին, ուր նա ահազանգ է հնչեցնում՝ այս համատեքստում մեղադրելով լրագրող գործընկերներին մարիխուանայի վտանգների իրազեկման առումով հանրության շրջանում իրենց պարտավորություների մեջ թերանալու և պատշաճ կերպով իրականությունը չներկայացնելու համար:

Այն, որ մարիխուանան անվտանգ չէ, ինչպես փորձում են ներկայացնել դրա օրինականացման կողմնակիցները, մասնագիտական շրջանակներն են փաստում նաև: Պարզվում է՝ Հանրության մոտ առկա է թյուրըմբռնում կապված բժշկական նպատակներով և որպես թմրամիջոց օգտագործվող մարիխուանայի հետ, ըստ այդմ, բժշկական մարիխուանան, հայտնի որպես CBD, չի ազդում մարդու ուղեղի այն հատվածներին, որի վրա ազդում է որպես թմրամիջոց օգտագործած մարիխուանան, որը հայտնի է THC անվամբ:

Ցավոք, մեր որոշ լրատվամիջոցներ նույնպես վերջին շրջանում մարիխուանան ներկայացնում են որպես բազմաթիվ հիվանդությունների բուժիչ բալասան, մինչդեռ հստակ է, որ բժշկական նպատակներով և իբրև թմրամիջոց օգտագործվող մարիխուանան պիտի զանազանել, իսկ դեռահասների շրջանում հաստատ բազմաթիվ հիվանդությունների բուժմամբ չէ, որ փորձում են գրավել մերօրյա քարոզիչները:

Ի դեպ, այն հարցին, թե նման օրինագիծ ԱԺ բերվելու պարագայում Ն. Բաղդասարյանն ի՞նչ դիրքորոշում կցուցաբերի, պատգամավորը պատասխանել է. «Ես որոշ ժամանակ ԱՄՆ–ում եմ անցկացրել, գիտեմ, որ այնտեղ օրինական է, Վրաստանում օրինական է, մի քանի պետություններում մահապատիժ է նախատեսվում, հետեւաբար այդ հարցը պետք է խորությամբ ուսումնասիրել, որովհետեւ ընկերներ ունեմ, որոնք օգտագործում են, պայքարում են մի այլ կարգի, ընկերներ ունեմ, որ դեմ են դրան։ Պետք է խորությամբ ուսումնասիրել, եթե լավ բան է, կողմ ենք, եթե վատ բան է, դեմ ենք։ Ես ընդհանրապես չեմ օգտագործել, նույնիսկ սիգարետ չեմ օգտագործում»։

«Խորապես ուսումնասիրման» համար հավելեմ, որ հոգեբաններն ուղղակի կապ են տեսնում մարիխուանայի օրինականացման և աշխարհում ահագնացող բռնությունների և սպանությունների միջև, զգուշացնելով, որ դրա ազդեցությամբ բռնարարքների հավանականությունը առավել մեծ է:

Այսինքն, ի՞նչ է ստացվում, մի կողմից մենք պայքարում ենք ընտանեկան բռնությունների դեմ, զուգահեռաբար էլ՝ արևմտյան կառույցների «ցուցումով» ՝մարիխուանայի օրինականացման քարո՞զ ենք անում՝դրանով պայմանավորված հնարավոր բռնություններ և հանցագործություններ ծնելու համա՞ր: Մի կողմից տոտալ պայքար ենք հայտարարում ծխախոտի դեմ, մյուս կողմից մարիխուանայի օրինականացման քարոզ անում բարձր մակարդակո՞վ:

Խեղված սերու՞նդ ենք ուզում ունենալ:

Հեղինակ` Անահիտ Եսայան