Փաստ ինֆո

«Եթե կլինկերի վրա պետտուրք չի կիրառվում, բնական է, որ որևէ ցեմենտ արտադրող ընկերությունը դասական իմաստով այլևս չի արտադրի բարձրորակ ցեմենտ», - այս մասին ասաց ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը՝ նշելով, որ  փոխարենը կսկսեն արտադրվել էժան կլինկերի հիմքի վրա ցեմենտ։

Պետությունը չպետք է թույլ տա, որ էժանության հաշվին վտանգավոր զարգացումներ ունենանք։ Կլինկերով արտադրված ցեմենտի որակական ցուցանիշները դեռևս ապացուցված չեն։ Պատգամավորի խոսքով բավական ժամանակ է այդ ապրանքատեսակը ներկրվում է, սակայն ոչ մի անգամ որևէ եզրակացություն կամ փորձաքննություն չի ներկայացվել - «Խնդրահարույց հարց է այն, որ չունենք անհրաժեշտ սարքավորումներ, լաբորատորիաներ, որպեսզի հստակ այս պահին կարողանանք իմանալ կլինկերի ամբողջ բաղադրությունը։ Պետք է ուղարկենք միջազգային փորձաքննության և անվերապահորեն հիմք ընդունել դրանց արդյունքները», - «Փաստինֆո»-ի հարցին ի պատասխան ասաց պատգամավորը։ Ինչ վերաբերում է այս հարցով   ԱԺ տնտեսական հանձնաժողովին կից ստեղծվող ենթահանձնաժողովին «Բարգավաճ Հայաստան»-ի մասնակցությանը՝ Սերգեյ Բագրատյանն ասաց. «Ակտիվ ենք մասնակցելու, որ հակափաստարկներով ապացուցենք մեր տեսակետի ճշմարտացիությունը։ Պարտավոր ենք լուրջ ուսումնասիրել այս հարցերը։ Իրավունք չունենք մեր տնտեսական դաշտը, հայրենական արտադրողներին այս գործում մենակ թղնել»։

«Բարգավաճ Հայաստան» խմբակցության պատգամավորի կարծիքով, եթե նախագիծը երկրորդ ընթերցմամբ ընդունվի, ապա բնական է, որ էժան կլինկերից արտադրված ցեմենտ կարտադրվի և կփակվեն աշխատատեղերը, քանի որ որևէ մեկը չի կարող երկար ժամանակ վնասով աշխատել, - «Մարդիկ չեն ցանկանա արտադրել մի ապրանք, որը շուկայում մրցունակ չի լինելու։ Այսինքն ինչու պետք է ցեմենտ արտադրող գործարանները, այդ թվում «ԱրարատՑեմենտը», «ՀրազդանՑեմենը» արտադրեն բարձրորակ ցեմենտ, պահեն այդքան աշխատատեղեր և քիչ շահույթով աշխատեն այն դեպքում,  երբ կարող են դրա կեսգնով այդ ապրանքը վաճառել, էժան, անորակ և չպահել այդքան աշխատատեղ»։

Սերգեյ Բագրատյանի կարծիքով տեղական ցեմենտը արպես արտաքին շուկա արտահանելու ապրանք մրցունակ չէ, խնդիրներից մեկը տրանսպորտն է, - «Տեղափոխման գինն այնքան թանկ է, որ հնարավոր չէ մրցունակ շուկա գտնելը։ Կարող էինք Վրաստան և Իրան արտահանել, բայց երկուսն էլ ունեն սեփական արտադրություն։ Այսինքն մենք ավելի էժան չենք կարող առաջարկել նրանց»։

Հեղինակ` Հասմիկ Կոշկարյան