Փաստ ինֆո

ՊՎԾ պետին առաջադրված մեղադրանքը հիմնավորվելու դեպքում՝ այն կդառնա լավագույն ցուցիչը, որ Հայաստանում օրենքի առաջ բոլորը հավասար են։ «Փաստինֆո»-ի հետ զրույցում ասաց փաստաբան Արմինե Ֆանյանը։

‹‹Եթե նախաքննության ընթացքում փաստվի, որ իսկապես նման չարաշահումներ են տեղի ունեցել, բնականաբար, ՀՀ-ում օրենքի առաջ հավասարության սկզբունք կա, և հանցանք կատարած յուրաքանչյուր  ոք պետք է ենթարկվի քրեական պատասխանատվության ››,-ասաց փաստաբանը՝ միաժամանակ արձանագրելով, որ որեւէ մեկը չպետք է անօրինական հետապնդման ենթարկվի։

Նա իրավաչափ համարեց, որ վարչապետը քննության այս փուլում Դավիթ Սանասարյանին չազատեց աշխատանքից։

‹‹Մենք գիտենք, որ գոյություն ունի անմեղության կանխավարկած, և որևէ մեկին չի կարելի պնդել, որ նա մեղավոր է քանի դեռ ապացուցված չէ նրա մեղավորություն օրինական ուժի մեջ մտած դատական ակտով››,-ասաց Ֆանյանը՝ ավելացնելով, որ, եթե քննության այս այս փուլում պաշտոնից ազատվեր Սանասարյանը, ապա կստացվեր, որ կանխակալ մոտեցում կա նրան առաջադրված մեղադրանքի նկատմամբ:

‹‹Մինչև չհիմնավորվի նրան առաջադրված մեղադրանքը, մինչև օրինական ուժ չստանա նրա դատական ակտը, բնականաբար, նրան աշխատանքից ազատելը կվկայեր պաշտոնատար անձանց կանխակալ վերաբերմունքի մասին››,-ասաց փաստաբանը:

Նրա խոսքով, նման դեպքերի համար Քրեական դատավարության օրենսգիրքը նախատեսում է համապատասխան դատավարական հարկադրանքի միջոց. այն է՝ պաշտոնավարումը ժամանակավորապես դադարեցնել, մինչև գործով որոշման կկայացվի:

‹‹Այդ որոշումը  կարող է կայացնել քննիչը, օրինակ Դավիթ Սանասարյանի նկատմամբ քրեական հետապնդումը դադարեցնելով կամ գործը դատարան ուղարկելով››,-նշեց Ֆանյանը:

Հիշեցնենք, որ ՊՎԾ պետին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով, այն է՝ պաշտոնական լիազորությունները չարաշահելը:

Ազգային անվտանգության ծառայության տարածած պաշտոնական հաղորդագրության համաձայն՝ բավարար ապացույցներ են ձեռք բերվել, որոնք առերևույթ վկայում են այն մասին, որ Սանասարյանը, հանդիսանալով ՊՎԾ ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով` իր աշխատակիցների կողմից փաստացի կառավարվող ընկերության ձեռնարկատիրական գործունեությանը նպաստելու նպատակով իր պաշտոնեական դիրքն առերևույթ օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:

Նախաքննության օրինականության նկատմամբ հսկողություն իրականացնող դատախազի համաձայնությամբ քննիչի կողմից 18.04.2019թ. որոշում է կայացվել ՀՀ պետական վերահսկողական ծառայության ղեկավար Դավիթ Սանասարյանի պաշտոնավարությունը ժամանակավոր դադարեցնելու մասին, որն ուղարկվել է ՀՀ վարչապետին: Վարչապետն էր ապրիլի 19-ին հանձնարարել է Դավիթ Սանասարյանին՝ ապահովել քննիչի որոշման կատարումը։

Սանասարյանը  ԱԱԾ-ի առաջադրած մեղադրանքը շինծու է որակել՝ նշելով, որ դա անգամ ապացուցման կարիք չունի:

Հեղինակ` Սոնա Գեւորգյան