Փաստ ինֆո

Արդեն մի քանի օր է իշխանության տարբեր օղակների, հասարակական և իրավական տարբեր շրջանակների քննարկման թեժ թեմաներից մեկը ՊՎԾ ղեկավար Դավիթ Սանասարյանն է։

ԱԱԾ-ում քննվող քրեական գործի շրջանակներում նրան մեղադրանք է առաջադրվել պաշտոնեական լիազորությունները չարաշահելու համար՝ ՀՀ քրեական օրենսերքի 308-րդ հոդվածի հատկանիշներով ու խափանման միջոց ընտրվել ստորագրությունը՝ չհեռանալու մասին:

Ըստ այդմ, քննիչը միաժամանակ դատախազի համաձայնությամբ որոշում է կայացրել Դավիթ Սանասարյանի պաշտոնավարությունը ժամանակավոր դադարեցնելու մասին , ինչն ուղարկվել է ՀՀ վարչապետին, որն էլ հանձնարարել է Դավիթ Սանասարյանին՝ ապահովել քննիչի որոշման կատարումը։

Պաշտոնեական լիազորությունների չարաշահման հոդվածով անցնող բազմաթիվ պաշտոնյաներ ունեցել ենք և կունենանք, սակայն Դավիթ Սանասարյանի դեպքը լինելով բազմաշերտ է և խորքային՝ ի ցույց է դնում իշխանության ներսում առկա տարաձայնությունները։

Սորոսականներն անցել են գրոհի և անթաքույց ԱԱԾ-ին մեղադրում են Սանասարյանի նկատմամբ «գործ սարքելու» մեջ՝ այդպիսով թիրախավորելով ոչ միայն ԱԱԾ տնօրենին, այլ նաեւ՝ վարչապետ Փաշինյանին, քանի որ փաստացի այդպիսով ընդունում են, որ Փաշինյանի պաշտոնավարման օրոք եւս հնարավոր է, որ «գործեր սարքվեն», մարդիկ քաղաքական հետապնդման ենթարկվեն։ Իսկ եթե գործող բարձրաստիճան պաշտոնյայի նկատմամբ հնարավոր է «գործ սարքել», ապա նախկինների նկատմամբ կարելի ու կարելի է։

Փաստորեն, միայն մեկ «յուրայինի» նկատմամբ մեղադրանքի առաջադրումն ի ցույց դրեց, թե որքան փխրուն ու խոցելի վիճակում է Նիկոլ Փաշինյանը. թավշյա հեղափոխության ուղին անցած երիտասարդներն անձեռնմխելիություն են պահանջում, ուզում են, որ յուրայիններին «բան ասող» չլինի, օրենքի ուժը իրենց վրա պետք է զգան միայն սեւերը, նախկինները։

Վարչապետը հայտնվել է հեղափոխական –սորոսականների սարդոստայնում՝ մի կողմից փորձում է ապացուցել, որ երկրում բան է փոխվել ու անգամ յուրայինների նկատմամբ քրեական գործեր կհարուցվեն՝ հիմքերի առկայության պարագայում, մյուս կողմից՝ գրոհի են անցել սորոսականները, որոնք իշխանության համն առնելով՝ ուզում են օգտվել բոլոր տեսակի բարիքներից։

«Քանի դեռ ես վարչապետ եմ՝ արտոնյալ մարդ չի լինելու, սկսած իմ հարազատ քաղաքական ուժից, մերձավոր շրջապատից»,- դեռեւս 2018 թվականի սեպտեմբերին հայտարարել էր վարչապետը՝ ըդգծելով. «Հայաստանում օլիգարխներ չկան և չեն լինելու, Հայաստանի վարչապետի «քիփ», վարչապետի բաջանաղ, վարչապետի «քուչի լավ տղա», «լավ տղու հետ օրթախ գործ ունենալու, 50 տոկոս փայ մտնողների ինստիտուներ չեն լինելու, մոռացեք դրանց մասին»:

Վարչապետի այս հայտարարությունը, որը փոքր ինչ խմբագրական փոփոխություններով այս մեկ տարվա ընթացքում բազմիցս հնչել է՝ պարզվում է այնքան էլ լուրջ չեն ընդունել առաջին հերթին հենց վարչապետին «քիփերը», ովքեր այսօր դուրս են եկել նրա դեմ՝ մեղադրելով նրա պաշտոնավարման շրջանում գործեր «սարքելու» մեջ։

«Իմ դեմ իրականացվողը շինծու է»,- ապրիլի 18-ին հայտարարեց Դավիթ Սանասարյանը, ով մեղադրվում է պաշտոնեական լիազորությունները չարաշահելու մեջ։

«Պետական կառավարման համակարգում հերթով թիրախավորում են որոշ մարդկանց ու սկսում «ցխել»,- ապրիլի 18-ին հայտարարեց Դանիել Իոննիսյանը, երբ արդեն հայտնի էր, որ ԱԱԾ-ում քննվող քրեական գործով ապացույցներ կան ՊՎԾ պետ Դավիթ Սանասարյանի կողմից առերեւույթ չարաշահումներ թույլ տալու վերաբերյալ ու սա այն դեպքում, երբ Վարչապետի մամուլի խոսնակ Վլադիմիր Կարապետյանը նույն օրը շատ հստակ ազդակ տվեց՝ արձանագրելով, որ «ԱԱԾ-ն վարչապետին ենթակա կառույց է»։

«Մենք իրականացրել ենք սիրո եւ համերաշխության հեղափոխություն, բայց եթե որեւէ մեկը մեր այս դիրքը կփորձի մեկնաբանել որպես թուլություն, նա կզգա այդ հեղափոխության, պետության եւ օրենքի ուժը: Այսինքն՝ որեւէ մեկը հանկարծ չփորձի մեր պոզիտիվիզմը մեկնաբանել որպես թուլություն»,- ասել է վարչապետը՝ 2018 թվականի մայիսին Դավիթ Սանասարյանին ներկայացնելով Պետական վերահսկողական ծառայության աշխատակազմին։
Հիմա այդ օրենքը ուժն իրենց վրա զգում են հենց գործող իշխանության ներկայացուցիչները, իսկ թե որքանով նրան կհաջողվի այդպիսով զսպել իր «քիփերի» նկրտումները՝ ցույց կտա ապագան։

Հեղինակ` Մարինե Մինասյան