Փաստ ինֆո

ՀՀ վարչապետ Նիկոլ Փաշինյանի կարծիքով՝ ինքը մեծամասամբ, գրեթե 100 տոկոսով կատարել է իր նախընտրական խոստումները։ Մասնավորապես՝ նա նշեց, որ հեղափոխության ժամանակ հայտարարել էր,որ  իշխանության  չի գալիս կադրային ջարդ անելու եւ պնդեց, որ իր խոստումը պահպանել է։ «Այս խոստումը 100 տոկոսով լիարժեք կատարվել է։ Մենք կառավարման համակարգում մեկ միլիմետր անգամ չենք շեղվում դրանից։ Այսօր պետական կառավարման համակարգի 97 տոկոսը նույն մարդիկ են։ Սա շատ դեպքերում մեզ համար խնդիր է։ Մեզ դրա համար քննադատում են, բայց մենք համարում ենք, որ սա ճիշտ ճանապարհ է, որովհետեւ իսկապես մեր հեղափոխությունը սոցիալիստական մեծ հեղափոխությունը չի»,- ասաց վարչապետը։

Ըստ նրա, կատարվել է նաեւ ՀՀ պետական բյուջեն երկու տարում 30-40 տոկոսով ավելացնելու է խոստումը՝ նշելով, որ 2019-ի բյուջեով 2018-ի նկատմամբ եկամտային մասը 10 տոկոսի աճ է ունեցել։ «Ես արդեն ասել եմ, որ այս տարի գնում ենք պետական բյուջեի եկամտային մասի գերակատարման։ Մեր հաշվարկները ցույց են տալիս, որ մի 4-5 տոկոսով առնվազն կգերակատարենք։ Ես չեմ ուզում ավելի լավատեսական կանխատեսումներ անել, բայց մենք գնում ենք այս խոստման կատարմանը։ Այս պահի դրությամբ այդ խոստումը 90 տոկոսով կատարված է»,- նշեց վարչապետն ու ավելացրեց.

«Խոստացել եմ, որ Սաշիկի արագաչափերի բոլոր չվճարված տուգանքները պետք է զրոյացվեն։ Մենք դա արել ենք, համաներում ենք իրականացրել, որտեղ 13 մլրդ գումարները ներվել են։

Խոստացել եմ, որ պետք է փոխվեն տնտեսական հարաբերությունները, վերացվեն մենաշնորհները։ Սա 100 տոկոսով կատարվել է։ Այսօր ոչ ոք չի կարող ասել, որ ունի մենաշնորհ, առնվազն հնարավորությունների իմաստով։ Իհարկե, այն մարդիկ որոնք մենաշնորհ են ունեցել, հիմա շուկայում իրենց հնարավորություններն ավելի լավ են, բայց վերջին անգամ ես կառավարության հաշվետվության ժամանակ ցույց տվեցի, թե ինչ դրական դինամիկա ունենք բենզինի շուկայում, բանանի շուկայում, շաքարի շուկայում»։

Վարչապետի փոխանցմամբ՝ 100 տոկոսով կատարվել են նաեւ արտաքին քաղաքական ռեվերսներ չեն լինելու, ՀԱՊԿ անդամ մնալու, քաղաքական հետապնդումներ չիրականացնելու, մարտի 1-ի պատասխանատուներին պատասխանատվության ենթարկելու, նոր կառավարությունում օլիգարխներ չունենալու, բիզնեսի կոռուպցիոն կապանքներից ազատագրելու, ազատ թափանցիկ ընտրությունների անցկացնելու, ընտրակաշառքի իսպառ բացառելու, քաղբանտարկյալների խարանից ազատվելու խոստումները։

Աղբյուր` Փաստինֆո