Փաստ ինֆո

«2018 թվականի ընթացքում լրագրողների մասնագիտական օրինական գործունեությունը խոչընդոտելու դեպքերի առթիվ ընդհանուր թվով հարուցվել է 12 քրեական գործ»,-այսօր այս մասին հայտնել է Հայաստանի Հանրապետության քննչական կոմիտեի հատուկ կարեւոր գործերով քննության գլխավոր վարչության պետի տեղակալ Վիգեն Մեսրոպյանը «Մարդու իրավունքների պաշտպանության կոալիցիա»-ի կողմից  կազմակերպված հանրային քննարկման ժամանակ։

Նրա փոխանցմամբ՝ հիշյալ ժամանակահատվածում լրագրողների մասնագիտական օրինական գործունեությունը խոչընդոտելու դեպքերի առթիվ հարուցված 12 քրեական գործերից 3-ը՝ 4 անձի վերաբերյալ, մեղադրական եզրակացությամբ ուղարկվել է դատարան։ Հիշյալ գործերով որպես մեղադրյալ ներգրավված անձանց խափանման միջոց է կիրառվել ստորագրությունը՝ չհեռանալու մասին. «2 քրեական գործով վարույթը կարճվել է հանցակազմի բացակայության հիմքով, 2-ով էլ՝ կասեցվել որպես մեղադրյալ ներգրավման ենթակա անձանց ինքնությունը պարզված չլինելու հիմքով»,-նշել է նա՝ հավելելով, որ 1 քրեական գործ նախաքննությունը շարունակելու համար ուղարկվել է ՀՔԾ, 1-ով էլ՝ նախաքննությունը շարունակվում է։

Վիգեն Մեսրոպյանը նշել է նաեւ, որ 2019 թվականի հունվար ամսվա դրությամբ լրագրողների մասնագիտական գործունեությունը խոչընդոտելու դեպքերի առթիվ հարուցվել է 2 քրեական գործ, որոնցով նախաքննությունը շարունակվում է։

Անդրադառնալով 2018 թվականի դրությամբ Քննչական կոմիտեում առկա ակտիվիստների իրավունքների խախտումներով հարուցված քրեական գործերին՝ ՀԿԳ վարչության պետի տեղակալը նշել է, որ Քննչական կոմիտեի ստորաբաժանումներում քաղակտիվիստների վերաբերյալ հարուցվել եւ քննվել է 23 քրեական գործ, որոնցից 6-ը՝ 9 անձանց վերաբերյալ մեղադրական եզրակացությամբ, ուղարկվել են դատարան։ 9-ի նկատմամբ էլ նախաքննական մարմնի կողմից որպես խափանման միջոց կիրառվել է ստորագրություն չհեռանալու մասին. «Քաղակտիվիստների վերաբերյալ 14 քրեական գործ միացվել է վարույթում քննվող այլ քրեական գործերի, 1 քրեական գործի վարույթը կասեցվել է որպես մեղադրյալ ներգրավման ենթակա անձի ինքնությունը պարզված չլինելու հիմքով, 2 քրեական գործով նախաքննությունը շարունակվում է»,- նշել է նա։ Հիշյալ գործերով որպես մեղադրյալ ներգրավված են 18 անձինք։

Իրավապաշտպանների վերաբերյալ 2017 թվականի ընթացքում քննվել են 3 քրեական գործեր՝ հարուցված ՀՀ ՔՕ-ի 137-րդ հոդվածի 1-ին մասի հատկանիշներով. «Դրանք վերաբերել են «Արթուր Սաքունցին, Զարուհի Հովհաննիսյանին եւ լրագրողական գործունեությամբ զբաղվող Մհեր Արշակյանի նկատմամբ սպառնալիքներ գործադրելու դեպքերին»,-նշել է Մեսրոպյանը. «Սրանցից մեկը վարույթը կարճվել է հանցակազմի բացակայության հիմքով, 2-ով էլ՝ կասեցվել որպես մեղադրյալ ներգրավման ենթակա անձանց ինքնությունը պարզված չլինելու հիմքով»։

Հեղինակ` Միլենա Խաչիկյան