Փաստ ինֆո

Սահմանադրական դատարանը չափազանց խիստ ձեւով է արձանագրել  Վճռաբեկ դատարանի կողմից Վաչագան Ղազարյանի իրավունքների խախտման փաստը։ «Փաստինֆո»-ի հետ զրույցում աասաց սահմանադրագետ Արամ Վարդեւանյանը՝ մեկնաբանելով ՍԴ-ի ապրիլի 16-ի որոշումը եւ ավելացրեց, որ դա այն որոշումներից է, որը զարգացնում և արմատավորում է իրավունքի գերակայության սկզբունքը:

Ավել վաղ հայտնել ենք, որ նշված որոշմամբ ՍԴ-ն արձանագրել է, որ Վճռաբեկ դատարանը, վարույթ չընդունելով Վաչագան Ղազարանի վճռաբեկ բողոքը, անտեսել է  իր իսկ  իրավական դիրքորոշումները եւ խախտել Սահմանադրության 27-րդ հոդվածի 1-ին մասի 4-րդ կետում, ինչպես նաև 61-րդ հոդվածի 1-ին մասում ամրագրված իրավունքները։

 «Սահմանադրական դատարանի նշված որոշումը պետք է հստակ ազդակ հանդիսանա Վճռաբեկ դատարանի քրեական պալատին՝ իր մոտեցումները փոփոխելու համար: Կարծում եմ այս իրավական դիրքորոշումը չի վերաբերում միայն իրավագիտության դոկտոր, պրոֆեսոր, վճռաբեկ դատարանի քրեական պալատի դատավոր՝ Սերժիկ Ավետիսյանին»,- ասաց մեր զրուցակիցը:

Ըստ նրա՝ Սահմանադրական դատարանը հստակ դիրքորոշում է արտահայտել նաեւ Սահմանադրությամբ երաշխավորված հետադարձ ուժի արգելքի սկզբունքի մասով: «Տվյալ դեպքում մենք գործ ունեինք քրեական օրենսգրքի բլանկետային նորմի հետ, որում հենց տեղի էր ունեցել փոփոխություն /Վաչագան Ղազարյանի կողմից զբաղեցված պաշտոնը չէր ընդգրկվել հանրային ծառայության բարձրաստիճան պաշտոնատար անձանց ցուցակում, ովքեր պարտավորվում են հայտարարագիր ներկայացնել/, այլ կերպ վերջինիս մասով տեղի էր ունեցել ապօրինի հարստացման հոդվածի ապաքրեականացում»,- ասաց Ա.Վարդանյանը։

ՍԴ որոշումից հետո Վաչագան Ղազարյանի շահերը ներկայացնող փաստաբանը դիմում կներկայացնի դատական ակտի վերանայման համար

Սահմանադրական դատարանը նաեւ արձանագրել է, որ , որ խափանման միջոց կալանքը ընտրելու կամ ժամկետը երկարացնելու կամ վերահաստատելու վերաբերյալ միջնորդությունը քննարկելիս դատարանները, հավաստելով քրեական վարույթը բացառող հանգամանքների առերևույթ առկայությունը և կիրառելիությունը, պարտավոր են  ընդամենը մերժել նախաքննության մարմնի միջնորդությունը: Նկատեք, եզրույթը ապացուցման շեմի «առերևույթ» առկայությունն է: Նշվածը հենց բխում է սահմանադրական կարգի հիմունք հանդիսացող իրավունքի գերակայության սկզբունքից:

«Սահմանադրական դատարանի այս դիրքորոշումը մեծ ազդեցություն է ունենալու իրավակիրառական պրակտիկայում, քանի որ Բարձր դատարանը ըստ էության հաստատեց, որ յուրաքանչյուր պնդում, հանգամանք, որ ներկայացվում են փաստաբանների կողմից պետք է պատշաճ գնահատականի արժանանան դատարանների կողմից, հատկապես կալանավորման դեպքերում՝ որպես անձի անձնական ազատությանն առավել ինտենսիվ միջամտության, ծանրության աստիճան: Հակառակ իրավիճակում արձանագրվելու է արդար դատաքննության և անձնական ազատության իրավունքի խախտումներ»,- ասաց Ա.Վարդեւանյանը՝ ընդգծելով. «Սահմանադրական դատարանը նաև հիշեցրեց Վճռաբեկ դատարանին, որ վերջիններս ոչ թե հայեցողական, այլ պարտադիր ատյան են հանդիսանում, ուստի վճռաբեկ բողոքը վարույթ ընդունելու հարցը լուծելը Վճռաբեկ դատարանի ոչ թե հայեցողական, այլ պարտադիր լիազորությունն է»:

Աղբյուր` Փաստինֆո